ការ​អភិរក្ស​អណ្តើក​ហ្លួង​ក្នុង​ដែន​ជម្រក​ធម្មជាតិ កំពុង​បង្ហាញ​សញ្ញា​​វិជ្ជមាន

  • 2018-10-18 07:46:48
  • ចំនួនមតិ 0 | ចំនួនចែករំលែក 21

ចន្លោះមិនឃើញ

នាយកដ្ឋាន​អភិរក្ស​ជលផល​ នៃ​ក្រសួង​កសិកម្ម ​រុក្ខាប្រមាញ់​ និង​នេសាទ​បាន​បញ្ជាក់ថា ​កិច្ចខិតខំ​ប្រឹងប្រែង​ក្នុងការ​អភិរក្ស​អណ្តើក​ហ្លួង​ ដែលជា​ប្រភេទ​សត្វ​ជិត​ផុត​ពូជ​បំផុត​ក្នុង​សកលលោក​ កំពុង​បង្ហាញ​សញ្ញា​នៃ​ភាពជោគជ័យ​ហើយ។

​កាលពីដើម​ខែតុលា ក្រុម​ល្បាត​សហគមន៍​រដ្ឋបាល​ជលផល និង​ក្រុមការងារ​តាមដាន​និង​ស្រាវជ្រាវ​ របស់​អង្គការ​សមាគម​អភិរក្ស​សត្វព្រៃ ​(WCS) បាន​រក​ឃើញ​អណ្តើក​ហ្លួង​ទាំងអស់​ បន្ទាប់ពី​លែង​​កាលពី​ខែ​វិច្ឆិកា​ឆ្នាំ​២០១៧​កន្លងទៅ​ នៅតាម​ប្រព័ន្ធ​ព្រែក​ស្រែអំបិល។ ការ​រកឃើញ​នេះ គឺ​តាមរយៈ​ឧបករណ៍​តាមដាន​ដែល​បាន​បំពាក់​លើ​ស្នូកអណ្តើក​ហ្លួង​។

អណ្តើកហ្លួង ដែលមានបំពាក់ឧបករណ៍តាមដាននៅលើស្នូក (រូបថត៖ អង្គការ WCS)

​ទិន្នន័យ​ពី​ការស្រាវជ្រាវ​ និង​តាមដាន​ បាន​បង្ហាញថា​អណ្តើក​ហ្លួង​ចំនួន​ ១​ក្បាល​បាន​ផ្លាស់​ទី​ទៅកាន់​ប្រព័ន្ធ​ព្រែក​ជី​ផាត់​ដែលមាន​ចម្ងាយ​ជិត​១០០​គីឡូម៉ែត្រ​ពី​ទីតាំង​លែង។ ​ដោយឡែក អណ្តើក​ហ្លួង​ចំនួន​១​ក្បាល​ផ្សេងទៀត​ត្រូវ​ប្រជា​នេសាទ​ប្រទះឃើញ​ជាប់​មង និង​បាន​ប្រគល់ឱ្យ​អង្គការ​WCS​ដើម្បី​ថែរក្សា​។​ លទ្ធផល​ទាំងនេះ​បាន​បញ្ជាក់ថា​ អណ្តើក​ហ្លួង​ទាំងអស់​បាននឹង​កំពុង​ផ្លាស់​ទី​ទៅកាន់​ទីជម្រក​នានា​បន្ទាប់ពី​ការលែង​។

អ្នកតាមដានស្រាវជ្រាវ សត្វអណ្តើកហ្លួង (រូបថត៖ អង្គការ WCS)

​អណ្តើក​ហ្លួង​ ស្ថិតនៅក្នុង​បញ្ជី​ក្រហម​របស់​អង្គការ ​IUCN​ ជា​ប្រភេទ​រងគ្រោះ​ជិត​ផុត​ពូជ​បំផុត។ វា​ស្ថិត​ក្នុងចំណោម​អណ្តើក​ទាំង​២៥​ប្រភេទ ​ដែល​កំពុង​រងគ្រោះថ្នាក់​ខ្លាំងជាងគេ​បំផុត​នៅលើ​ពិភពលោក​ និង​ចាត់ជា​ប្រភេទ​កំពុង​រងគ្រោះថ្នាក់​ក្នុងប្រទេស​កម្ពុជា​។​ ជាពិសេស​ព្រះរាជក្រឹត្យ​នស​/​រកត​/០៣០៥/១៤៩​ចុះ​ថ្ងៃទី​២១​ ខែមីនា ​ឆ្នាំ​២០០៥ ​បានដាក់​បញ្ចូល​សត្វ​អណ្តើក​ហ្លួង​នេះ​ជា​ប្រភេទ​សត្វ​ល្មូ​ន​តំណាងឱ្យ​ប្រទេស​កម្ពុជា​។​

សត្វ​អណ្តើក​ហ្លួង​ធ្លាប់​ត្រូវបាន​គេ​គិតថា​បាន​ផុត​ពូជ​ពី​ប្រទេស​កម្ពុជា​ទៅហើយ។ ប៉ុន្តែ​នៅក្នុង​ឆ្នាំ​២០០០​ រដ្ឋបាល​ជលផល​ និង​អង្គការ​WCS​ បាន​សិក្សា​ស្រាវជ្រាវ​ និង​រកឃើញ​មាន​ចំនួន​សត្វ​អណ្ដើក​ប្រភេទ​នេះ​ដ៏​តិចតួច​ឡើងវិញ​នៅ​តាម​ប្រព័ន្ធ​ព្រែក​ស្រែអំបិល ​ក្នុង​ប្រទេស​កម្ពុជា​។ ​

ចាប់​តាំងពី​ពេលនោះ​មក​អង្គការ ​WCS​ និង​រដ្ឋបាល​ជលផល​បាន​ធ្វើការ​រួមគ្នា​ការពារ​និង​អភិរក្ស​សត្វ​អណ្តើក​ហ្លួង​ទាំងនេះ​ពី​ការ​ផុត​ពូជ​តាមរយៈ​សកម្មភាព​ដូចជា​៖ ការ​ការពារ​សំបុក​ពង​កូន ការ​ចិញ្ចឹម និង​ថែរក្សា ការ​ពង្រឹង​ការ​អនុវត្ត​ច្បាប់​ ការទប់ស្កាត់​បទល្មើស​នេសាទ​ និង​ការជួញដូរ​សត្វព្រៃ​ការស្រាវជ្រាវ​ និង​ការតាមដាន​ជាដើម៕


អត្ថបទ៖ សំភី