បឹងព្រែកទប់ លែងជាប្រភពផ្គត់ផ្គង់ទឹកស្អាតសម្រាប់អ្នកក្រុងព្រះសីហនុទៀតហើយ

2018-10-18 08:27:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋបាលខេត្តព្រះសីហនុ បានប្រកាសនៅថ្ងៃទី១៨ ខែតុលា ឆ្នាំ២០១៨នេះថា ទឹកបឹងព្រែកទប់ លែងជាប្រភពផ្គត់ផ្គង់ទឹកស្អាតសម្រាប់អ្នកក្រុងព្រះសីហនុ ប្រើប្រាស់ទៀតហើយ ខណៈដែលទឹកបឹងនេះ បានគោករាក់ និងបាត់បង់គុណភាព។

អាជ្ញាធរខេត្ត បានឱ្យដឹងថា ថ្មីៗនេះរាជរដ្ឋាភិបាល បានផ្តល់សិទ្ធិជូនក្រុមហ៊ុនឯកជន ដោយកាត់ផ្ទៃបឹងព្រែកទប់មួយចំណែកសម្រាប់ធ្វើការអភិវឌ្ឍ និងមួយភាគធំទៀត សម្រាប់កែលម្អឱ្យទៅជាសួនរមនីយដ្ឋានទេសចរណ៍។

ក្នុងគម្រោងនេះ ក៏មានការសាងសង់នូវផ្លូវកាត់ដើម្បីបញ្ចៀសចរាចរណ៍ ព្រមទាំងមានការរៀបចំតុបតែងលម្អដោយភ្លើងពណ៌ផងដែរ។ ការរៀបចំកែលម្អផ្ទៃបឹងនេះ នឹងត្រូវធ្វើឡើងប្រកបដោយលក្ខណៈបច្ចេកទេសខ្ពស់ ព្រមទាំងឱ្យក្លាយទៅជារមនីយដ្ឋានទេសចរណ៍កម្សាន្តដែលមានភាពទាក់ទាញសម្រាប់ភ្ញៀវទេសចរជាតិ និងអន្តរជាតិ មកទស្សនាកម្សាន្ត។

បឹងព្រែកទប់ ដែលស្ថិតក្នុងក្រុងព្រះសីហនុ ខេត្តព្រះសីហនុ។ រូបថត៖ FB រដ្ឋបាលខេត្តព្រះសីហនុ

រដ្ឋបាលខេត្តបន្តថា ចំពោះប្រភពទឹកស្អាត ដែលត្រូវផ្គត់ផ្គង់ឱ្យការប្រើប្រាស់របស់ប្រជាពលរដ្ឋនៅទូទាំងខេត្តព្រះសីហនុ ត្រូវបានយកចេញពីអាងស្តុកទឹកតំបន់ក្បាលឆាយ ដែលជាប្រភពទឹកធម្មជាតិ មានវិសាលភាពផ្គត់ផ្គង់លើការប្រើប្រាស់ ដោយគ្មានការព្រួយបារម្ភ ជំនួសបឹងព្រែកទប់។

សូមរំលឹកថា យោងតាមអនុក្រឹត្យ ចុះថ្ងៃទី២៣ ខែកុម្ភៈ និងទើបតែត្រូវបានផ្សព្វផ្សាយជាសាធារណៈ កាលពីថ្ងៃទី១៥ ខែតុលា ឆ្នាំ២០១៨ រាជរដ្ឋាភិបាលកម្ពុជា បានសម្រេចកាត់ដីទំហំ ១១,៥០ហិកតា ចេញពីតំបន់អភិរក្សទឹកសាបព្រែកទប់ ស្ថិតក្នុងភូមិសាស្រ្តក្រុងព្រះសីហនុ ខេត្តព្រះសីហនុ ដោយរក្សាទុកផ្ទៃដីទំហំ ៤,៨០ហិកតាជាតំបន់អភិរក្ស៕

អត្ថបទ៖ សំភី