ការជួសជុលផ្លូវជាតិ៤៨ ពីស្រែអំបិល ទៅកោះកុង សម្រេចបានប៉ុន្មានហើយ?

2018-10-21 07:27:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងសាធារណការ និងដឹកជញ្ជូន បានឱ្យដឹងនៅថ្ងៃទី២១ ខែតុលា ឆ្នាំ២០១៨នេះថា ផ្លូវជាតិលេខ៤៨ ត្រូវបានជួសជុលសម្រេចជាង ៧០ភាគរយហើយ ដោយគ្រោងនឹងធ្វើឱ្យបានរួចរាល់ទាន់បុណ្យសមុទ្រនាពាក់កណ្តាលខែធ្នូ ខាងមុខនេះ។

ក្រសួងលើកឡើងថា ផ្លូវជាតិនេះមានប្រវែង ១៥០គីឡូម៉ែត្រ ចាប់ពីផ្លូវបំបែកស្រែអំបិល ទៅដល់ទីរួមខេត្តកោះកុង ដោយក្នុងនោះប្រវែង ៦៣គីឡូម៉ែត្រ ត្រូវទទួលរងការខូចខាតដោយជំនន់ទឹកភ្លៀង ការដឹកលើសទម្ងន់កម្រិតកំណត់ និងកត្តាធម្មជាតិផ្សេងទៀត។

ក្រុមការងារកំពុងសិក្សាត្រួតពិនិត្យផ្លូវជាតិលេខ៤៨ ដើម្បីជួសជុល (រូបថត៖ ក្រសួងសាធារណការ និងដឹកជញ្ជូន)

ផ្លូវនេះត្រូវបានបែងចែកជា ៩១កំណាត់ខ្លីៗ ដើម្បីជួសជុល ឱ្យបានទាន់ពេលវេលា ដោយកម្លាំងចម្រុះរបស់ក្រសួងសាធារណការ និងដឹកជញ្ជូន កងវិស្វកម្ម និងភាគីពាក់ព័ន្ធ ប្រើគ្រឿងចក្រសរុប ១១៤គ្រឿង។ ការជួសជុលនេះ គ្រោងចំណាយថវិកាប្រមាណ ១២លានដុល្លារ។

ក្រសួងដដែលនេះបន្តថា ផ្លូវជាតិលេខ៤៨ បានរងការខូចខាត ដោយដល់អាយុកាល ហើយត្រូវស្ថាបនាឡើងវិញ និងដោយសារការដឹកលើសទម្ងន់កំណត់ ព្រមទាំងស្ថានភាពអាកាសធាតុ ដែលមានភ្លៀងឥតឈប់ឈរនៅតំបន់នោះ។

បើតាមការថ្លែងរបស់រដ្ឋមន្រ្តីក្រសួងសាធារណការ លោក ស៊ុន ចាន់ថុល កាលពីសប្តាហ៍មុន ការជួសជុលផ្លូវជាតិលេខ៤៨នេះ នឹងត្រូវធ្វើឱ្យបានជាប់រឹងមាំ និងថែទាំរយៈពេលយ៉ាងតិច ២ឆ្នាំ ដោយសារតែផ្លូវនេះ នឹងត្រូវលើកកម្ពស់គុណភាពទៅជាប្រភេទបេតុងកៅស៊ូ (AC) ក្រោមកម្ចីរបស់កូរ៉េ។ ការចាប់ផ្តើមសាងសង់លើកកម្រិតគុណភាពផ្លូវនេះ នឹងធ្វើឡើងនៅឆ្នាំ២០២០ ដោយក្រុមហ៊ុនកូរ៉េ៕