Najib និងអតីតមន្ត្រីកំពូលម្នាក់ ត្រូវចោទពីបទរំលោភសេចក្ដីទុកចិត្ត

2018-10-25 06:48:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Najib Razak អតីតនាយករដ្ឋមន្ត្រីនៃប្រទេសម៉ាឡេស៊ី និងលោក Irwan Serigar Abdullah អតីតអគ្គលេខាធិការរតនាជាតិម៉ាឡេស៊ី នៅថ្ងៃទី២៥ ខែតុលា ឆ្នាំ២០១៨នេះ ត្រូវបានចោទប្រកាន់ពីបទរំលោភលើសេចក្ដីទុកចិត្តចំនួន ៦ករណី ដែលពាក់ព័ន្ធនឹងទឹកប្រាក់ ៦,៦ពាន់លានរីងហ្គីត (ប្រហែល ១,៥៩ពាន់លានដុល្លារអាមេរិក) របស់មូលនិធិរាជរដ្ឋាភិបាល។

លោក Najib Razak អតីតនាយករដ្ឋមន្ត្រីម៉ាឡេស៊ី និងលោក Irwan Serigar Abdullah អតីតអគ្គលេខាធិការរតនាជាតិម៉ាឡេស៊ី

ប្រសិនបើរកឃើញពិរុទ្ធភាព លោក Najib និង Irwan ត្រូវជាប់ពន្ធនាគារយ៉ាងតិច ២០ឆ្នាំ ព្រមទាំងត្រូវពិន័យជាប្រាក់។

ចៅក្រម Azman Ahmad បានកំណត់ប្រាក់ធានានៅក្រៅឃុំ ១លានរីងហ្គីត (ជិត ២៤ម៉ឺនដុល្លារអាមេរិក) ក្នុងម្នាក់ៗ។ ប្រាក់ធានាចំនួនពាក់កណ្ដាល ត្រូវបានកំណត់ត្រឹមនៅថ្ងៃព្រហស្បតិ៍ ទី២៥តុលានេះ ហើយពាក់កណ្ដាលទៀត ត្រូវប្រគល់ឲ្យបានយ៉ាងយូរមុនរយៈពេល ១០ថ្ងៃបន្ទាប់។

លិខិតឆ្លងដែនអន្តរជាតិ និងការទូតរបស់លោក Najib និង Irwan ត្រូវបានដកហូតផងដែរ។ អ្នកទាំងពីរនឹងចូលសវនាការសាជាថ្មី នៅថ្ងៃទី២៩ ខែវិច្ឆិកា ឆ្នាំ២០១៨។

ព្រះរាជអាជ្ញា បានឲ្យដឹងថា លោក Najib និង Irwan បានរំលោភលើសេចក្ដីទុកចិត្ត លើមូលនិធិរាជរដ្ឋាភិបាល សម្រាប់ព្រលានយន្តហោះអន្តរជាតិកូឡាឡាំពួរ កម្មវិធីប្រាក់ឧបត្ថម្ភមួយ និងមូលនិធិមួយចំនួនទៀត។

លោក Najib Razak អតីតនាយករដ្ឋមន្ត្រីម៉ាឡេស៊ី (រូបថត៖ Reuters)

សូមជម្រាបថា លោក Najib កំពុងប្រឈមមុខនឹងការចោទប្រកាន់ ៣២ករណី ពាក់ព័ន្ធនឹងការលាងលុយ អំពើពុករលួយ និងការរំលោភលើសេចក្ដីទុកចិត្ត ពីគម្រោង 1Malaysia Development Berhad (1MDB) ៕

ប្រភព៖ Channelnewsasia ប្រែសម្រួល៖ លាភ.