អភិបាលក្រុងព្រះសីហនុ៖ រូបស្រ្តីបរទេសងូតទឹកស្រាតនៅឆ្នេរសមុទ្រ មិនមែននៅកម្ពុជាទេ

2018-10-26 02:05:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក អ៊ី សុខឡេង អភិបាលក្រុងព្រះសីហនុ បានអះអាងថា រូបស្ត្រីបរទេសដែលងូតទឹកស្រាត រត់លេងនៅទឹកសមុទ្រ គឺមិនមែននៅសមុទ្រខេត្តព្រះសីហនុនោះទេ។ ការបដិសេធនេះ បានធ្វើឡើងបន្ទាប់បណ្តាញសង្គមហ្វេសប៊ុកបានបង្ហោះរូបភាពស្ត្រីបរទេសស្រាតងូតទឹក និងរត់លេងនៅឆ្នេរសមុទ្រក្នុងចំណោមមនុស្សជាច្រើន។

រូបស្ត្រីងូតទឹកស្រាតនៅឆ្នេរសមុទ្រ ត្រូវបានអ្នកលេងហ្វេសប៊ុកបង្ហោះចែកចាយពីមួយទៅមួយដោយបានរិះគន់អំពីវត្តមានជនជាតិចិននៅខេត្តព្រះសីហនុ។ ប៉ុន្តែការពិតរូបនេះ គឺមិនមែននៅក្នុងសមុទ្រនៃខេត្តព្រះសីហនុនោះទេ។

លោក អ៊ី សុខឡេង អភិបាលក្រុងព្រះសីហនុ បានបញ្ជាក់ប្រាប់ខ្លីៗ នៅរសៀលថ្ងៃទី២៥ ខែតុលា ម្សិលមិញថា រូបស្ត្រីស្រាតងូតទឹកនៅឆ្នេរសមុទ្រ គឺមិនមែននៅខេត្តព្រះសីហនុទេ ហើយសមុទ្រនៅកំពង់សោម មិនមានសមុទ្រចឹងទេ។ តាមលោកដឹង និងឮគេនិយាយ រូបស្ត្រីនេះ គឺនៅវៀតណាម។

ជាមួយគ្នានេះ លោកអភិបាលក្រុងព្រះសីហនុ បានសំណូមពរទៅដល់ប្រជាពលរដ្ឋខ្មែរសូមផ្សព្វផ្សាយអ្វីដែលជាការពិតបង្ហោះអ្វី កុំបំប៉ោងព័ត៍មានដែលមិនមែនជាការពិត វាខូចកិត្តិយសរបស់ប្រទេសកម្ពុជា។ ហើយការផ្សព្វផ្សាយព័ត៍មានមិនពិត វាធ្វើឲ្យមហាជនមានការយល់ច្រឡំ និងខូចមុខមាត់ប្រទេសថែមទៀតផង។

សូមបញ្ជាក់ថា តាមការចុះផ្សាយរបស់វេបសាយវៀតណាម Phunuvagiadinh បានឲ្យដឹងថា រូបស្រ្ដីស្រាតរត់លេងក្នុងសមុទ្រនោះ គឺនៅឆ្នេរមួយកន្លែង ក្នុងខេត្ត Binh Thuan របស់វៀតណាម៕