អូស្រ្ដាលីគ្រោងជួយកសាងមូលដ្ឋានកងទ័ពជើងទឹកប្រទេសមួយ ទប់ទល់នឹងចិន

2018-11-01 07:26:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Scott Morrison នាយករដ្ឋមន្រ្តីអូស្រ្ដាលី បានបញ្ជាក់នៅថ្ងៃទី១ ខែវិច្ឆិកា ឆ្នាំ២០១៨នេះថា ប្រទេសអូស្រ្ដាលីគ្រោងជួយប្រទេសប៉ាពួញូហ្គីណេ កសាងមូលដ្ឋានកងទ័ពជើងទឹក ដែលនេះជាសកម្មភាពថ្មីចុងក្រោយរបស់អូស្រ្ដាលី ដើម្បីការពារប្រយោជន៍របស់ខ្លួនក្នុងតំបន់ប៉ាស៊ីហ្វិក ដោយប្រឈមជាមួយនឹងការបង្កើនឥទ្ធិពលរបស់ចិននៅក្នុងតំបន់នេះ។

លោក Scott Morrison នាយករដ្ឋមន្រ្តីអូស្រ្ដាលី/ រូបភាព៖ Reuters

ប្រទេសអូស្រ្ដាលី ជាច្រើនទសវត្សមកហើយ បានរីករាយនឹងឥទ្ធិពលរបស់ខ្លួននៅក្នុងតំបន់ប៉ាស៊ីហ្វិក ប៉ុន្ដែប្រទេសចិន នៅប៉ុន្មានឆ្នាំចុងក្រោយនេះ បានចូលទៅបង្កើនឥទ្ធិពលរបស់ខ្លួននៅក្នុងតំបន់នេះ ដែលសំបូរដោយធនធានធម្មជាតិដ៏មហាសាល។

ចំណែកប្រទេសប៉ាពួញូហ្គីណេ នៅឆ្នាំ២០១៨នេះ បានប្រកាសថា ប្រទេសចិនបានចាប់អារម្មណ៍ក្នុងការឧបត្ថម្ភការកសាងឡើងវិញនូវមូលដ្ឋានកងទ័ពជើងទឹកនៅលើកោះ Manus។

រីឯលោកនាយករដ្ឋមន្រ្តីអូស្រ្ដាលីនៅថ្ងៃទី១ ខែវិច្ឆិកានេះ បានថ្លែងនៅក្នុងក្រុងស៊ីដនីថា "ខ្ញុំនឹងប្ដេជ្ញាជាផ្លូវការចូលរួមគំនិតផ្ដួចផ្ដើមរួមមួយ ដើម្បីកសាងមូលដ្ឋានកងទ័ពជើងទឹកនៅលើកោះ Manus”។

សូមបញ្ជាក់ថា ក្រៅពីគម្រោងជួយកសាងមូលដ្ឋានកងទ័ពជើងទឹក អូស្រ្ដាលីនៅឆ្នាំ២០១៨នេះ នឹងប្រើប្រាស់ជំនួយរបស់ខ្លួន សម្រាប់ប្រទេសប៉ាពួញូហ្គីណេដើម្បីពង្រាយខ្សែអ៊ីនធឺណិតក្រោមសមុទ្រ ក្នុងគោលបំណងបិទក្រុមហ៊ុនទូរគមនាគមន៍ចិន Huawei Technologies Co.Ltd៕

ប្រភព៖ Channelnewsasia ប្រែសម្រួល៖ វាសនា