ផ្លូវជាតិលេខ១ និងលេខ៦ នឹងត្រូវស្ថាបនាកែលម្អ នាដើមឆ្នាំក្រោយ

2018-11-02 02:10:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ស៊ុន ចាន់ថុល រដ្ឋមន្រ្ដីក្រសួងសាធារណការ និងដឹកជញ្ជូន បានគូសបញ្ជាក់ថា ផ្លូវជាតិលេខ១ និងផ្លូវជាតិលេខ៦ នឹងត្រូវស្ថាបនា កែលម្អ និងលើកកម្ពស់គុណភាពផ្លូវ ចាប់ពីដើមឆ្នាំ២០១៩ខាងមុខ ដើម្បីធានាការប្រើប្រាស់បានជាប់យូរអង្វែង។ ការថ្លែងនេះ ធ្វើឡើងក្នុងពិធីចុះហត្ថលេខាលើអនុស្សរណៈនៃការយោគយល់ រវាងក្រសួងសាធារណការ និងក្រុមហ៊ុនទីប្រឹក្សាបច្ចេកទេស Korea Consultants International (KCI) កាលពីថ្ងៃទី៣១ ខែតុលា ឆ្នាំ២០១៨ នៅទីស្ដីការក្រសួង។

បើតាមការចុះផ្សាយរបស់ AKP ដែលដកស្រង់សម្តី ស៊ុន ចាន់ថុល ឱ្យដឹងថា រាជរដ្ឋាភិបាលកម្ពុជា បានទទួលកម្ចីសម្បទានពីធនាគារអភិវឌ្ឍន៍អាស៊ី ADBនូវទឹកប្រាក់ចំនួន ៧០លានដុល្លារ សម្រាប់គម្រោងកែលម្អបណ្ដាញផ្លូវថ្នល់ ដើម្បីធ្វើការលើកកម្រិត និងថែទាំផ្លូវជាតិទាំង២នេះ។ ក្នុងនោះកំណាត់ផ្លូវជាតិលេខ១ ពីអ្នកលឿង ដល់បាវិត និងកំណាត់ផ្លូវជាតិលេខ៦ ពីក្រុងសៀមរាប ដល់ក្រឡាញ់ ដែលមានប្រវែងសរុបចំនួន ១៤៥,៥៨គីឡូម៉ែត្រ។

ការកសាងផ្លូវទាំងពីរនេះ កាលពីមុនរាជរដ្ឋាភិបាល បានកសាងដោយចាក់កៅស៊ូប្រភេទ DBST គឺអ៊ុតកៅស៊ូមានកម្រាស់ស្ដើង ដោយសារតែកម្ពុជាមិនទាន់មានថវិកាគ្រប់គ្រាន់ក្នុងការកសាងផ្លូវឱ្យបានរឹងមាំ។ ប៉ុន្ដែ បច្ចុប្បន្ននេះ ដោយសារតែសេដ្ឋកិច្ចមានការរីកចម្រើន និងការដឹកជញ្ជូន ក៏មានការកើនឡើងផងនោះ ទើបរាជរដ្ឋាភិបាល ចាប់ផ្ដើមលើកកម្រិតផ្លូវពីការក្រាលកៅស៊ូប្រភេទ DBST ទៅជាការចាក់អ៊ុតបេតុងកៅស៊ូ AC ដើម្បីធានាការប្រើប្រាស់ជាប់បានយូរ។ លោករដ្ឋមន្រ្តីបញ្ជាក់បន្ថែម។

លោក ស៊ុន ចាន់ថុល ចុះ MoU ជាមួយតំណាងក្រុមហ៊ុនទីប្រឹក្សាបច្ចេកទេស Korea Consultants International (KCI) កាលពីថ្ងៃទី១វិច្ឆិកា ២០១៨។ រូបថត៖ ក្រសួងសាធារណការ និងដឹកជញ្ជួន

សូមជម្រាបថា MoU ដែលក្រសួងសាធារណការ បានចុះហត្ថលេខាជាមួយក្រុមហ៊ុនកូរ៉េកាលពីម្សិលមិញនេះ គឺមានទឹកប្រាក់ជាង ៣លានដុល្លារ លើគម្រោងការងារត្រួតពិនិត្យ និងគាំទ្រការអនុវត្តគម្រោងកែលម្អ និងលើកកម្រិតបណ្ដាញកំណាត់ផ្លូវជាតិលេខ១ និងផ្លូវជាតិលេខ៦។ ក្នុងនោះ ភាគីកូរ៉េ ទទួលបានជាង ២,៨លានដុល្លារ។

លោក ស៊ូ ដុង ផាក (Soo Dong Park) ប្រធានក្រុមហ៊ុន Korea Consultants International ដែលទទួលបានការត្រួតពិនិត្យ និងជាទីប្រឹក្សាបច្ចេកទេសក្នុងការស្ថាបនា លើគម្រោងទាំងពីរនេះ បានប្តេជ្ញាថា ក្រុមហ៊ុននឹងគោរពទៅតាមកិច្ចព្រមព្រៀងនេះ ហើយក្រុមជំនាញបន្ដខិតខំពិនិត្យតាមលក្ខណៈបច្ចេកទេសក្នុងការសាងសង់តាមរយៈឧបករណ៍ សម្ភារៈរបស់ក្រុមហ៊ុនដែលមានបច្ចេកវិទ្យាខ្ពស់ ដើម្បីធានាគុណភាពស្របតាមស្ដង់ដារ។

គួរបញ្ជាក់បន្ថែមថា គម្រោងស្ថាបនាកំណាត់ផ្លូវជាតិទាំងពីរនេះ នឹងធ្វើការលើកកម្រិតផ្លូវពីកម្រាល កៅស៊ី DBST បច្ចុប្បន្ន ទៅជាកម្រាលកៅស៊ូ AC ព្រមទាំងធ្វើការស្ថាបនាលូសងខាងផ្លូវ ដើម្បី រំដោះទឹកភ្លៀងចេញផងដែរ។ កំណាត់ផ្លូវទាំងពីរនេះ នឹងត្រូវធ្វើការលើកកម្រិតដោយការងារស្ថាបនា ក្រាលកៅស៊ូ AC រយៈពេល១៨ខែ ហើយបន្ដថែទាំរយៈពេល ៣៦ខែ ដែលនឹងចាប់ផ្ដើមការដ្ឋាន ពីខែមករា ឆ្នាំ២០១៩ រហូតដល់ខែមិថុនា ឆ្នាំ២០២៣ខាងមុខ៕

ប្រភព៖ AKP ប្រែសម្រួល៖ សំភី