Ronaldo បំបែកកំណត់ត្រាធំៗ ៤ ក្នុងឆ្នាំ ២០១៨

2018-11-02 08:32:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

Cristiano Ronaldo ជាកំពូលកីឡាករបាល់ទាត់ ដែលឈ្នះពានរង្វាន់ជាច្រើន ទាំងនៅជម្រើសជាតិ នៅក្លឹបអាជីព និងពានរង្វាន់ផ្ទាល់ខ្លួន។ ប្រធានក្រុមជម្រើសជាតិព័រទុយហ្គាល់ ដែលកំពុងប្រកបអាជីពនៅក្លឹបអ៊ីតាលី Juventus រូបនេះ ក៏ធ្លាប់បំបែកកំណត់ត្រាជាច្រើនផងដែរ។

បើគិតតែឆ្នាំ ២០១៨ នេះ Ronaldo បានបំបែកកំណត់ត្រាធំៗ ចំនួន ៤។ នេះបើយោងតាមវិបសាយកីឡា Sports Keeda។ កំណត់ត្រាទាំង ៤ នោះ មានដូចខាងក្រោម៖

១. កំណត់ត្រា ទាត់បញ្ចូលទីក្នុងការប្រកួតអន្តរជាតិ ចំនួន ៩កម្មវិធីជាប់គ្នា

ទាត់បញ្ចូលទីនៅ World Cup ទល់នឹងអេស្ប៉ាញក្នុងប្រកួតដំបូងក្នុងវគ្គចែកពូល Ronaldo បានបង្កើតកំណត់ត្រាក្លាយជាកីឡាករអឺរ៉ុបដំបូងទាត់បញ្ចូលទីក្នុងការប្រកួតអន្តរជាតិចំនួន៩កម្មវិធីជាប់គ្នា។ កំណត់ត្រានេះអាចបញ្ជាក់បានថា Ronaldo មិនត្រឹមតែខ្លាំងក្នុងក្លឹបអាជីពទេ សម្រាប់ជម្រើសជាតិក៏មិនធម្មតា។

កម្មវិធីទាំង៩ដែលកីឡាករសញ្ជាតិព័រទុយហ្គាល់រកគ្រាប់បាល់បានមាន៖ 2004 Euros, 2006 World Cup, 2008 Euros, 2010 World Cup, 2012 Euros, 2014 World Cup, 2016 Euros, 2017 Confederations Cup, 2018 World Cup។

២. កំណត់ត្រា កីឡាករវ័យលើ៣០ឆ្នាំ ដែលមានតម្លៃខ្លួនថ្លៃជាងគេ

ការប្រកាស Ronaldo ចាកចេញពី Real Madrid ក្រោយចំណាយពេល៩ឆ្នាំបានធ្វើឲ្យពិភពលោកភ្ញាក់ផ្អើលជាខ្លាំង។ Madrid បានសម្រេចចិត្តលក់ម្ចាស់ពាន Ballon d'Or ៥សម័យទៅកាន់ Juventus ក្នុងតម្លៃ១០០លានអឺរ៉ូ នាំឲ្យគេជាប់កំណត់ត្រាកីឡាករលើវ័យ៣០មានតម្លៃខ្លួនថ្លៃជាងគេ។

៣. កំណត់ត្រា អ្នកទាត់បញ្ចូលទីច្រើនជាងគេ ក្នុងក្រុមជម្រើសជាតិនៅទ្វីបអឺរ៉ុប

បន្ទាប់ពីរកបានគ្រាប់ទី៨៥ឲ្យជម្រើសជាតិព័រទុយហ្គាល់ Ronaldo បានហក់ឡើងលើអតីតជម្រើសជាតិហុងគ្រីលោក Ferenc Puskas ១គ្រាប់ ក្លាយជាកីឡាករទាត់បញ្ចូលទីច្រើនជាងគេសម្រាប់ជម្រើសជាតិនៅទ្វីបអឺរ៉ុប។

៤. កំណត់ត្រា កីឡាករដំបូងគេ ដែលឈ្នះពាន UEFA Champions League បានចំនួន ៥ដង

ក្រោយយកឈ្នះ Liverpool 3-1 នៅវគ្គផ្ដាច់ព្រ័ត្រ Champions League ក្លឹប Real Madrid បានគ្រងពាននេះ៣ឆ្នាំជាប់ និងជាលើកទី៤ក្នុង៥រដូវកាលចុងក្រោយ។ ជ័យជម្នះនេះក៏ជួយឲ្យ Ronaldo ជាកីឡាករដំបូងឈ្នះ UCL ៥លើកក្នុងនោះម្ដងជាមួយ Manchester United និង៤ដងជាមួយ Real៕

អត្ថបទ៖ សុខ សុវត្ថិ