រដ្ឋមន្ត្រីពាណិជ្ជកម្ម ជំរុញឥណ្ឌាបង្កើតសាកលវិទ្យាល័យបណ្តុះបណ្តាលផ្នែក IT

2018-11-02 08:37:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានជំរុញប្រទេសឥណ្ឌា ធ្វើការវិនិយោគលើវិស័យអប់រំ តាមរយៈការបង្កើតសាកលវិទ្យាល័យបណ្តុះបណ្តាលធនធានមនុស្សផ្នែកព័ត៌មានវិទ្យា និងកសិកម្ម ដើម្បីលើកស្ទួយសមត្ថភាពប្រកួតប្រជែងរបស់កម្ពុជា សំដៅទាក់ទាញការវិនិយោគផ្ទាល់ពីបរទេស និងការធ្វើពិពិធកម្ម (ពង្រីក) កំណើនសេដ្ឋកិច្ចជាតិ។

លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម (ស្ដាំ) ជួបពិភាក្សាជាមួយលោកស្រី ម៉ានីកា ជែន ឯកអគ្គរដ្ឋទូតនៃសាធារណរដ្ឋឥណ្ឌាប្រចាំនៅកម្ពុជា (ឆ្វេង)/ រូបភាព៖ ក្រសួងពាណិជ្ជកម្ម

លោករដ្ឋមន្ត្រីពាណិជ្ជកម្មបានលើកសំណើនេះឡើង នាឱកាសទទួលជួបពិភាក្សាការងារជាមួយ លោកស្រី ម៉ានីកា ជែន (Manika Jain) ឯកអគ្គរដ្ឋទូតនៃសាធារណរដ្ឋឥណ្ឌាប្រចាំនៅកម្ពុជា នាព្រឹកថ្ងៃទី២ ខែវិច្ឆិកា ឆ្នាំ២០១៨នេះ។

ជាមួយគ្នានេះ លោករដ្ឋមន្ត្រីបានលើកឡើងពីកត្តាប្រឈមរបស់កម្ពុជា ជាពិសេសបញ្ហាកង្វះធនធានមនុស្សដែលមានគុណភាព ដើម្បីបម្រើគម្រោងវិនិយោគធំៗ និងបានស្នើសុំលោកស្រីឯកអគ្គរដ្ឋទូត ជួយកៀងគរវិនិយោគិនឥណ្ឌា មកសហការជាមួយក្រុមហ៊ុនក្នុងស្រុក ដើម្បីបង្កើតសាកលវិទ្យាល័យ ដែលមានកម្មវិធីសិក្សាទាក់ទងព័ត៌មានវិទ្យា និងបច្ចេកទេសកសិកម្មទំនើប សម្រាប់និស្សិតកម្ពុជា។

«ប្រទេសឥណ្ឌាមានភាពលេចធ្លោលើវិស័យបច្ចេកវិទ្យា និងមានកម្មវិធីសិក្សាល្អៗទាក់ទងព័ត៌មានវិទ្យា និងកសិកម្ម ដូច្នេះសូមជួយនាំយកកម្មវិធីសិក្សាទាំងអស់នោះ មកចែករំលែកដល់និស្សិតកម្ពុជា ដើម្បីអភិវឌ្ឍន៍ប្រទេស និងឆ្លើយតបតម្រូវការវិនិយោគិនបរទេស»។ លោក ប៉ាន សូរស័ក្តិ បានបន្ថែម។

ជាការឆ្លើយតប លោកជំទាវ ម៉ានីកា ជែន បានសន្យានាំយកសំណើលោករដ្ឋមន្ត្រីពាណិជ្ជកម្ម ទៅជម្រាបរដ្ឋាភិបាល និងវិស័យឯកជនឥណ្ឌា ឱ្យចូលមកបណ្តាក់ទុនលើវិស័យអប់រំ និងវិស័យកសិកម្ម ដើម្បីចូលរួមលើកស្ទួយសមត្ថភាពប្រកួតប្រជែងរបស់កម្ពុជា នៅក្នុងប្រព័ន្ធពាណិជ្ជកម្មសាកល៕

អត្ថបទ៖ វាសនា