រកឃើញបញ្ហាលើយន្តហោះ Lion Air ២គ្រឿងទៀត សង្ស័យជាមូលហេតុនៃការធ្លាក់ JT610

2018-11-03 02:05:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងដឹកជញ្ជូនប្រទេសឥណ្ឌូណេស៊ី បានប្រកាសកាលពីថ្ងៃសុក្រ ទី២ ខែវិច្ឆិកា ឆ្នាំ២០១៨ថា ខ្លួនបានរកឃើញបញ្ហា នៅលើយន្តហោះប្រភេទ Boeing 737-MAX 8 របស់អាកាសចរណ៍ Lion Air ចំនួន ២គ្រឿងទៀត រួមទាំងបញ្ហាឧបករណ៍ចង្អុលបង្ហាញមួយនៅក្នុងបន្ទប់បើកបរ។ អ្នកវិភាគសង្ស័យថា នេះជាមូលហេតុដែលធ្វើឲ្យជើងហោះហើរ JT610 របស់ Lion Air ធ្លាក់កាលពីពេលកន្លងទៅ។

អ្នកសង្គ្រោះ កំពុងយកបំណែកយន្តហោះដែលធ្លាក់ ទៅដាក់លើរថយន្ត នៅព្រលានយន្តហោះ Tanjung Priok ក្រុងហ្សាកាតា កាលពីថ្ងៃទី២ ខែវិច្ឆិកា ឆ្នាំ២០១៨ (រូបថត៖ Reuters)

ក្រសួងដឹកជញ្ជូនដដែល បានបើកការពិនិត្យលើយន្តហោះថ្មី ចំនួន ១០គ្រឿង របស់ Lion Air និង ក្រុមហ៊ុន Caruda ដើម្បីស្វែងរកមូលហេតុនៃការធ្លាក់ JT610 នៅសមុទ្រជ្វា ដែលធ្វើឲ្យ ១៨៩នាក់ស្លាប់ កាលពីថ្ងៃចន្ទកន្លងទៅ។

តាមការបញ្ជាក់ពីក្រសួងរបស់ឥណ្ឌូណេស៊ីខាងលើ យន្តហោះភាគច្រើន មានបញ្ហាដែលទាក់ទងនឹងអេក្រង់ក្នុងបន្ទប់បើកបរ និងបញ្ហាប្រព័ន្ធលំនឹង។

លោក Dudi Sudibyo អ្នកវិភាគអាកាសចរណ៍បានឲ្យដឹងថា បញ្ហាអេក្រង់ក្នុងបន្ទប់បើកបរ អាចបណ្ដាលឲ្យមានកំហុសនូវការបង្ហាញល្បឿន និងកម្ពស់របស់យន្តហោះ។ យ៉ាងណាក៏ដោយ មិនទាន់មានការបញ្ជាក់ពីមូលហេតុនៃការធ្លាក់របស់ជើងហោះហើរ JT610 ឡើយ។

សូមរំឭកថា ជើងហោះហើរ JT610 របស់ក្រុមហ៊ុនដែលបានធ្លាក់ចូលសមុទ្រកាលពីថ្ងៃទី២៩ ខែតុលា ឆ្នាំ២០១៨ បណ្ដាលឲ្យមនុស្សនៅលើយន្តហោះសរុប ១៨៩នាក់ បានបាត់បង់ជីវិត។ ជើងហោះហើរប្រភេទ Boeing 737 MAX 8 នេះ បានចាកចេញពីព្រលានយន្តហោះនៅក្រុងហ្សាកាតា កាលពីម៉ោង ៦:៣០នាទីព្រឹក ថ្ងៃទី២៩តុលា ដើម្បីហោះឆ្ពោះទៅកាន់កោះ Bangka ដែលជាកោះធំទី៩ របស់ឥណ្ឌូណេស៊ី។ ប្រហែល ១៣នាទីក្រោយមក យន្តហោះបានដាច់ការទាក់ទង។

តាមសេចក្ដីរាយការណ៍ យន្តហោះដែលធ្លាក់ ជាម៉ូដែលថ្មី ដែលទើបតែបញ្ជូនទៅឲ្យក្រុមហ៊ុន Lion Air កាលពីខែសីហា ឆ្នាំ២០១៨ ប៉ុណ្ណោះ។ ក៏ប៉ុន្តែ បើតាមលោក Edward Sirait នាយកប្រតិបត្តិក្រុមហ៊ុន Lion Air Group បានឲ្យដឹងថា យន្តហោះនេះធ្លាប់មានបញ្ហាបច្ចេកទេស ពេលធ្វើដំណើរទៅកាន់ក្រុងហ្សាកាតា មួយថ្ងៃមុនជួបឧបទ្ទវហេតុ តែគេបានជួសជុលបញ្ហានេះរួចរាល់ហើយ ។

Boeing 737 MAX 8 ជាយន្តហោះថ្មី ដែលទើបតែដាក់ឲ្យដំណើរការ កាលពីខែសីហា ឆ្នាំ២០១៨ ប៉ុណ្ណោះ។

អ្នកមុជទឹក បានរកឃើញប្រអប់ខ្មៅមួយ ពីយន្តហោះដែលបានធ្លាក់ និងបានស្គាល់អត្តសញ្ញាណសពអ្នកដំណើរម្នាក់ ក្នុងចំណោមសពអ្នកដំណើរដទៃទៀត៕

អត្ថបទទាក់ទង

ប្រភព៖ Channelnewsasia ប្រែសម្រួល៖ លាភ.