ក្រុមហ៊ុនវៀតណាម ទិញយន្តហោះ៥០គ្រឿងតម្លៃ៦,៥ពាន់លានដុល្លារ ពី Airbus

2018-11-03 04:23:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុនអាកាសចរណ៍ឯកជនធំបំផុតរបស់វៀតណាម VietJet បានចុះកិច្ចព្រមព្រៀងជាមួយក្រុមហ៊ុនផលិតយន្តហោះ Airbus របស់បារាំង ដើម្បីទិញយន្តហោះចំនួន ៥០គ្រឿង ក្នុងតម្លៃសរុប ៦,៥ ពាន់លានដុល្លារអាមេរិក កាលពីថ្ងៃសុក្រទី២ ខែវិច្ឆិកា ឆ្នាំ២០១៨។

ជើងហោះហើររបស់ VietJet ត្រៀមចុះចតនៅព្រលានយន្តហោះ Tan Son Nhat ក្រុងហូជីមិញ (រូបថត៖ Reuters)

តាមឯកសារនៃកិច្ចព្រមព្រៀងពីការិយាល័យ នាយករដ្ឋមន្ត្រីបារាំង លោក Edouard Philippeបាននិយាយថា ក្រុមហ៊ុនAirbus បានចុះហត្ថលេខាលើកិច្ចសន្យាពាណិជ្ជកម្មជាមួយក្រុមហ៊ុន VietJet Air របស់វៀតណាមសម្រាប់ការទិញយន្តហោះប្រភេទ A321neo ចំនួន ៥០គ្រឿង។

កិច្ចព្រមព្រៀងនេះ គឺជាផ្នែកមួយនៃកិច្ចព្រមព្រៀងដែលបានចុះហត្ថលេខារវាងវៀតណាម និងបារាំងដែលជាដៃគូពាណិជ្ជកម្មធំបំផុតមួយរបស់រដ្ឋាភិបាលក្រុងហាណូយ ដែលចង់បង្កើនការវិនិយោគនៅក្នុងប្រទេសអតីតអាណានិគមនេះ។

ឯកសារនេះបានឲ្យដឹងទៀតថា ក្រុមហ៊ុន VietJet Airក៏បានចុះហត្ថលេខាលើអនុស្សរណៈនៃ ការយោគយល់ដែលមានទឹកប្រាក់ ៥ពាន់លានដុល្លារជាមួយក្រុមហ៊ុន Safran របស់បារាំងសម្រាប់ការជួសជុលម៉ាស៊ីន និងគ្រឿងសម្ភារៈយន្តហោះ។

សូមជម្រាបថា ក្រុមហ៊ុន VietJet កំពុងដំណើរការយន្តហោះ ៦០គ្រឿង ស្មើនឹងជើងហោះហើរ ៣៨៥ជើង ក្នុងមួយថ្ងៃ។ VietJet ធ្វើការហោះហើរនៅក្នុងប្រទេសវៀតណាម និងទៅកាន់ប្រទេសជប៉ុន កូរ៉េខាងត្បូង តៃវ៉ាន់ សិង្ហុបរី ចិន ថៃ ម៉ាឡេស៊ី មីយ៉ាន់ម៉ា និងក្រុងហុងកុង៕

ប្រភព៖ Bangkokpost ប្រែសម្រួល៖ លាភ.