កោះតូចមួយរបស់ជប៉ុន បានលិចបាត់ទាំងស្រុងហើយ

2018-11-03 07:30:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សារព័ត៌មានជប៉ុន Asahi Shimbun បានរាយការណ៍ថា កោះតូចមួយដែលមានចម្ងាយប្រហែល ៥០០ម៉ែត្រ ពីភូមិ សារ៉ូហ៊្វូតស៊ូ ស្ថិតនៅភាគខាងជើងកោះ ហុកកៃដូ ប្រទេសជប៉ុន បានលិចទាំងស្រុង។ ឆ្មាំសមុទ្រជប៉ុន នឹងបើកប្រតិបត្តិការស្វែងរកកោះដែលមានឈ្មោះថា អ៊ីសានបេហាណាគីតាកូជីម៉ា (Esanbehanakitakojima )។

ដែនទឹកភាគខាងជើងប្រទេសជប៉ុន (រូបថត៖ The Japan Times)

សេចក្ដីរាយការណ៍នេះ បានចុះផ្សាយបន្ទាប់ពីទទួលបានពីអ្នកនិពន្ធ ហ៊ីរ៉ូស៊ីម៉ា ស៊ីមីហ្ស៊ូ ដែលគ្រោងធ្វើដំណើរទៅកាន់កោះនេះដើម្បីចងក្រងជាសៀវភៅរូបភាពមួយក្បាល តែលោកមិនអាចរកឃើញកោះ អ៊ីសានបេហាណាគីតាកូជីម៉ា ឡើយ។

យោងតាមលោក ស៊ីមីហ្ស៊ូ ដែលបានសាកសួរអ្នកនេសាទនៅក្នុងតំបន់នោះ បានឲ្យដឹងថា គេមិនអាចមើលឃើញកោះនេះពីដីគោក ឬពីលើទូកដែលធ្វើដំណើរនៅជិតទីនោះឡើយ។

អាជ្ញាធរជប៉ុន មានការព្រួយបារម្ភ ចំពោះការលិចបាត់កោះដ៏តូចមួយនេះ ដោយសារតែកោះនេះ ជាសញ្ញាសម្គាល់ដែនទឹករបស់ជប៉ុននៅភាគខាងជើង ហើយប្រទេសរុស្ស៊ីបានអះអាងថា តំបន់នេះ គឺជារបស់ខ្លួន។ រុស្ស៊ី ហៅតំបន់នេះថា Kurils ដែលធ្លាប់គ្រប់គ្រងដោយទ័ពសូវៀត ក្នុងរយៈពេលខ្លីក្រោយសង្គ្រាមលោកលើកទី២។

កាលពីឆ្នាំ២០១៤ រដ្ឋាភិបាលជប៉ុន បានប្រកាសជាផ្លូវការថា កោះគ្មានមនុស្ស ដូចជាកោះអ៊ីសានបេហាណាគីតាកូជីម៉ា មានចំនួនសរុប ១៥៨កោះ ដែលស្ថិតនៅក្រោមការគ្រប់គ្រងរបស់ជប៉ុន។

យោងតាមច្បាប់អន្តរជាតិ ប្រទេសមួយអាចទាមទារថា ដែនទឹកជុំវិញកោះមួយជារបស់ខ្លួនបាន ដរាបណា គេអាចមើលឃើញកោះទាំងនោះនៅលើនីវ៉ូទឹកសមុទ្រ នៅពេលជំនោរខ្ពស់បំផុត។

តាមការវាស់ស្ទង់មួយកាលពីឆ្នាំ១៩៨៧ កោះអ៊ីសានបេហាណាគីតាកូជីម៉ា មានកម្ពស់ ១,៤ម៉ែត្រពីនីវ៉ូទឹកសមុទ្រ៕

ប្រភព៖ CNN ប្រែសម្រួល៖ លាភ.