អ្នកមុជទឹកម្នាក់ស្លាប់ ក្នុងបេសកកម្មរុករកយន្តហោះ Lion Air ដែលបានធ្លាក់ចូលសមុទ្រ

2018-11-04 02:01:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកមុជទឹកឥណ្ឌូណេស៊ីម្នាក់ បានស្លាប់ ក្នុងអំឡុងពេលបំពេញបេសកកម្មរុករកយន្តហោះរបស់ក្រុមហ៊ុន Lion Air ដែលបានធ្លាក់ចូលក្នុងសមុទ្រនៃកោះជ្វាខាងលិច។ នេះបើតាមមន្រ្តីឥណ្ឌូណេស៊ីមួយរូប បានឱ្យដឹងកាលពីថ្ងៃទី៣ ខែវិច្ឆិកា ឆ្នាំ២០១៨។

អ្នកមុជទឹករូបនោះមានឈ្មោះថា Syachrul Anto អាយុ ៤៨ឆ្នាំ បានស្លាប់ក្នុងបេសកកម្មនេះកាលពីថ្ងៃសុក្រកន្លងទៅ។ គាត់បានបាត់ខ្លួន ហើយមិនបានងើបឡើងមកលើផ្ទៃទឹកវិញឡើយ នៅពេលផ្អាកប្រតិបត្តិការនេះ ក្នុងអំឡុងម៉ោង ៤ល្ងាច។

លោក Syachrul Anto ដែលបានស្លាប់ក្នុងបេសកកម្មរុករកយន្តហោះ កាលពីថ្ងៃទី២វិច្ឆិកា ២០១៨។ រូបថត៖Facebook

បើតាមការចុះផ្សាយរបស់វិបសាយ Merdeka.com ប្រធានក្រុមនៃបេសកកម្មមុជទឹករុករកយន្តហោះនេះ លោក Bayu Wardoyo បាននិយាយថា សាកសពអ្នកមុជទឹករូបនោះ ត្រូវបានស្រង់ចេញពីក្នុងទឹកសមុទ្រវិញ នៅម៉ោង ៩កន្លះយប់។

វិបសាយដដែលនេះ បានដកស្រង់សម្តីលោក Isswarto មេបញ្ជាការផ្នែកស្រាវជ្រាវ និងសង្គ្រោះរបស់កងទ័ពជើងទឹកឥណ្ឌូណេស៊ីថា បញ្ហាសម្ពាធខ្យល់ អាចជាមូលហេតុនៃការស្លាប់របស់អ្នកមុជទឹករូបនោះ។ លោកថា Syachrul Anto គឺជាអ្នកធ្វើការស្ម័គ្រចិត្តមួយរូប នៃភ្នាក់ងារស្រាវជ្រាវជាតិ និងសង្គ្រោះ Basarnas។ ទោះជាយ៉ាងណា ភ្នាក់ងារ Basarnas កំពុងស៊ើបអង្កេតរកមូលហេតុនៃហេតុការណ៍នេះហើយ។

សូមរំលឹកថា ជើងហោះហើរ JT610 របស់ក្រុមហ៊ុន Lion Air បានធ្លាក់ចូលសមុទ្រកាលពីថ្ងៃទី២៩ ខែតុលា ឆ្នាំ២០១៨ បណ្ដាលឲ្យមនុស្សនៅលើយន្តហោះសរុប ១៨៩នាក់ បាត់បង់ជីវិត។ ជើងហោះហើរប្រភេទ Boeing 737 MAX 8 នេះ បានចាកចេញពីព្រលានយន្តហោះនៅក្រុងហ្សាកាតា កាលពីម៉ោង ៦:៣០នាទីព្រឹក ថ្ងៃទី២៩តុលា ដើម្បីហោះឆ្ពោះទៅកាន់កោះ Bangka ដែលជាកោះធំទី៩ របស់ឥណ្ឌូណេស៊ី។ ប្រហែល ១៣នាទីក្រោយមក យន្តហោះបានដាច់ការទាក់ទង៕

អ្នកសង្គ្រោះ កំពុងយកបំណែកយន្តហោះដែលធ្លាក់ ទៅដាក់លើរថយន្ត នៅព្រលានយន្តហោះ Tanjung Priok ក្រុងហ្សាកាតា កាលពីថ្ងៃទី២ ខែវិច្ឆិកា ឆ្នាំ២០១៨ (រូបថត៖ Reuters)

អត្ថបទទាក់ទង៖ រកឃើញបញ្ហាលើយន្តហោះ Lion Air ២គ្រឿងទៀត សង្ស័យជាមូលហេតុនៃការធ្លាក់ JT610

ប្រភព៖ Channelnewsasia ប្រែសម្រួល៖ សំភី