អារ៉ាប៊ីសាអ៊ូឌីត គ្រងជើងឯក AFC U19 ជាលើកទី៣ ក្រោយយកឈ្នះកូរ៉េខាងត្បូង នៅវគ្គផ្តាច់ព្រ័ត្រ

2018-11-05 01:44:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

បន្ទាប់ពីខកខានលើកពានកាលពី២ឆ្នាំមុន ពេលនេះក្រុមអារ៉ាប៊ីសាអ៊ូឌីត ធ្វើបានសម្រេចហើយ ដោយបានលើកពាន AFC U19 Championship 2018 ក្រោយយកឈ្នះ កូរ៉េខាងត្បូង ក្នុងលទ្ធផល ២-១ នៅវគ្គផ្តាច់ព្រ័ត្រកាលពីយប់មិញ។ ការប្រកួតនេះ គឺធ្វើឡើងនៅប្រទេសឥណ្ឌូណេស៊ី។

កីឡាករ U19 អារ៉ាប៊ីសាអ៊ូឌីត អបអរក្រោយស៊ុតបញ្ចូលទីកូរ៉េខាងត្បូង (រូបថត៖ FIFA U20 World Cup)

២គ្រាប់របស់អារ៉ាប៊ីសាអ៊ូឌីត ធ្វើបាននៅតង់ទី១ គឺនាទី ២ និង ២២។ ចូលដល់តង់ទី២ នៅនាទី៦៤ ទើបកូរ៉េខាងត្បូង អាចរកបាន១គ្រាប់វិញ ដោយការស៊ុតបាល់ប៉េណាល់ទី។

នេះជាលើកទី៣ហើយ សម្រាប់អារ៉ាប៊ីសាអ៊ូឌីត ដែលបានឈ្នះពានរង្វាន់នេះ ដោយលើកទី១ នៅក្នុងឆ្នាំ១៩៨៦ និងលើកទី២ នៅឆ្នាំ១៩៩២ (លើកទី២នេះ ក៏ឈ្នះកូរ៉េខាងត្បូង ២-០ នៅវគ្គផ្តាច់ព្រ័ត្រដែរ)។ កាលពីឆ្នាំ២០១៦ អារ៉ាប៊ីសាអ៊ូឌីត ក៏បានឈានចូលដល់វគ្គផ្តាច់ព្រ័ត្រផងដែរ ប៉ុន្តែប្រកួតចាញ់ ជប៉ុន ក្នុងវគ្គទាត់បាល់កាត់សេចក្តី ១១ម៉ែត្រ។

កូរ៉េខាងត្បូង ក្នុងការប្រកួតជាមួយ អារ៉ាប៊ីសាអ៊ូឌីត កាលពីយប់មិញ (រូបថត៖ FIFA U20 World Cup)

សូមរំលឹកថា អារ៉ាប៊ីសាអ៊ូឌីត បានឡើងមកដល់វគ្គផ្តាច់ព្រ័ត្រនេះ បន្ទាប់ពីឆ្លងផុតវគ្គចែកពូល ក្នុងនាមជាក្រុមលេខ១ នៅពូលD, ឈ្នះអូស្ត្រាលី នៅវគ្គ ៨ក្រុម ក្នុងលទ្ធផល ៣-១ និងឈ្នះជប៉ុន ២-០ នៅវគ្គពាក់កណ្តាលផ្តាច់ព្រ័ត្រ៕