នាយករដ្ឋមន្រ្តីវៀតណាម និងឡាវ ជួបជាមួយ ស៊ី ជីនពីង នៅក្រុងសៀងហៃ

2018-11-05 02:45:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Thongloun Sisoulith នាយករដ្ឋមន្រ្តីឡាវ និងលោក Nguyen Xuan Phuc នាយករដ្ឋមន្រ្តីវៀតណាម កាលពីថ្ងៃទី៤ ខែវិច្ឆិកា ឆ្នាំ២០១៨ ម្សិលមិញ បានជួបពិភាក្សាដាច់ដោយឡែកពីគ្នា ជាមួយលោក ស៊ី ជីនពីង ប្រធានាធិបតីចិន អំឡុងមេដឹកនាំអាស៊ានទាំងពីរ ទៅចូលរួមពិរព័ណ៌ការនាំចូលអន្តរជាតិរបស់ចិន លើកទី១ នៅក្រុងសៀងហៃ ភាគខាងកើតនៃប្រទេសចិន។

លោក Thongloun Sisoulith នាយករដ្ឋមន្រ្តីឡាវ (ឆ្វេង) ចាប់ដៃជាមួយលោក ស៊ី ជីនពីង ប្រធានាធិបតីអាមេរិក អំឡុងជំនួបនៅក្រុងសៀងហៃ កាលពីថ្ងៃទី៤ ខែវិច្ឆិកា ២០១៨/ រូបភាព៖ Xinhua

អំឡុងជួបជាមួយ លោកនាយករដ្ឋមន្រ្តីឡាវ លោក ស៊ី ជីនពីង បានលើកឡើងថា ទំនាក់ទំនង ចិន-ឡាវ ស្ថិតនៅចំណុចល្អបំផុតក្នុងប្រវត្តិសាស្រ្ត។ លោក ស៊ី ក៏បានអំពាវនាវឲ្យខិតខំធានាដំណើរការរលួនក្នុងការសាងសង់ផ្លូវដែក ចិន-ឡាវ និងអភិវឌ្ឍការសាងសង់ច្រករបៀងសេដ្ឋកិច្ច ចិន-ឡាវ។ រីឯលោកនាយករដ្ឋមន្រ្តីឡាវវិញបានបញ្ជាក់ថា គម្រោងធំៗជាច្រើន ដូចជា ផ្លូវដែក ចិន-ឡាវ កំពុងដំណើរការដោយរលូន។

ចំណែកអំឡុងជំនួបជាមួយលោកនាយករដ្ឋមន្រ្តីវៀតណាម លោក ស៊ី ជីនពីង បានលើកឡើងថា ចិន និងវៀតណាម គួរប្រកាន់ខ្ជាប់នូវប្រពៃណីនៃការផ្លាស់ប្ដូរកម្រិតខ្ពស់រវាងបក្ស និងរដ្ឋទាំងពីរ។ លោកបន្ថែមថា វៀតណាមគឺជាភ្ញៀវកិត្តិយសចូលរួមក្នុងពិរព័ណ៌ការនាំចូលអន្តរជាតិរបស់ចិន ហើយចិននឹងនាំចូលទំនិញវៀតណាមបន្ថែមទៀតទៅក្នុងទីផ្សារចិន។

ជាមួយគ្នានេះ លោក ស៊ី ថា ភាគីទាំងពីរគួរធ្វើការជាមួយ ដើម្បីរក្សាសន្តិភាព និងស្ថិរភាពដែនសមុទ្រ និងលើកកម្ពស់សហប្រតិបត្តិការដែនសមុទ្រ។

លោក Nguyen Xuan Phuc នាយករដ្ឋមន្រ្តីវៀតណាម (ឆ្វេង) ចាប់ដៃជាមួយលោក ស៊ី ជីនពីង ប្រធានាធិបតីអាមេរិក អំឡុងជំនួបនៅក្រុងសៀងហៃ កាលពីថ្ងៃទី៤ ខែវិច្ឆិកា ២០១៨/ រូបភាព៖ Xinhua

ជាការឆ្លើយតប លោកនាយករដ្ឋមន្រ្តីវៀតណាមថា វៀតណាមនឹងប្រកាន់ខ្ជាប់សហប្រតិបត្តិការជាទម្លាប់ជាមួយចិន ហើយវៀតណាមនឹងដោះស្រាយបញ្ហាដែនសមុទ្រដោយសមស្រប យោងតាមមតិឯកច្ឆន្ទ និងគោលការណ៍ដែលព្រមព្រៀងគ្នាដោយមេដឹកនាំនៃប្រទេសទាំងពីរ៕

ប្រភព៖ Xinhua ប្រែសម្រួល៖ វាសនា