ក្រសួងគ្រោងចំណាយ១៥លានដុល្លារ ដើម្បីសាងសង់ផ្លូវ៥២ខ្សែនៅខេត្តសៀមរាប

2018-11-07 02:22:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងសាធារណការ និងដឹកជញ្ជូន នឹងផ្ញើរបាយការណ៍រួមមួយដាក់ជូនរាជរដ្ឋាភិបាល ដើម្បីស្នើសុំថវិកាប្រមាណ ១៥លានដុល្លារអាមេរិក ដើម្បីសាងសង់ផ្លូវខ្នែងចំនួន ៥២ខ្សែ តភ្ជាប់ផ្លូវជាតិលេខ៦ និងផ្លូវ ១១ខ្សែទៀតក្នុងខេត្តសៀមរាប។

ការជួសជុលផ្លូវមួយខ្សែ នៅខេត្តសៀមរាប (រូបថត៖ មន្ទីរសាធារណការ និងដឹកជញ្ជូនខេត្តសៀមរាប)

លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងឲ្យដឹងដូច្នេះ នៅក្នុងកិច្ចប្រជុំអន្តរក្រសួងស្តីពីការងារជួសជុល និងថែទាំផ្លូវថ្នល់ក្នុងខេត្តសៀមរាប ដែលបានប្រព្រឹត្តទៅនៅសាលាខេត្តសៀមរាប ដោយមានការចូលរួមពីលោក ពិន ប្រាកដ អភិបាលរងខេត្ត តំណាងក្រសួងអភិវឌ្ឍន៍ជនបទ តំណាងក្រសួងវប្បធម៌ និងវិចិត្រសិល្បៈ និងតំណាងអាជ្ញាធរជាតិអប្សរា កាលពីថ្ងៃទី៦ ខែវិច្ឆិកា ឆ្នាំ២០១៨។

លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងនៅក្នុងកិច្ចប្រជុំអន្តរក្រសួងស្តីពីការងារជួសជុល និងថែទាំផ្លូវថ្នល់ក្នុងខេត្តសៀមរាប (រូបថត៖ ក្រសួងសាធារណការ និងដឹកជញ្ជូន)

ជាមួយគ្នានេះ ដើម្បីចូលរួមចំណែកក្នុងការទប់ស្កាត់ការដឹកជញ្ជូនលើសទម្ងន់ឲ្យកាន់តែមាន ប្រសិទ្ធភាព ក្រសួងសាធារណការ និងដឹកជញ្ជូន បានឯកភាពដាក់បញ្ចូលក្រសួងអភិវឌ្ឍន៍ជនបទជា សមាជិកគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ និងបាន ផ្ដល់ជញ្ជីងចល័តចំនួនពីរគ្រឿងដើម្បីទប់ស្កាត់ការដឹកជញ្ជូនលើសទម្ងន់កម្រិតកំណត់។

លោកទេសរដ្ឋមន្ត្រី ក៏បានជំរុញលើកទឹកចិត្តឲ្យវិស័យឯកជនចូលរួមចំណែកក្នុងការអភិវឌ្ឍហេដ្ឋារចនាសម្ព័ន្ធផ្លូវថ្នល់នៅខេត្តសៀមរាប ឲ្យមានការរីកចម្រើនផងដែរ ដើម្បីផ្លាស់ប្តូរមុខមាត់ខេត្តនេះ ឲ្យស័ក្ដិសមជាខេត្តទាក់ទាញទេសចរណ៍មួយយ៉ាងសំខាន់៕

អត្ថបទ៖ លាភ.