នាវាល្បាតសម័យឆ្នាំ១៩៨០ ត្រូវបានដាក់តាំងបង្ហាញនៅខេត្តកោះកុង

2018-11-10 03:40:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អាជ្ញាធរខេត្តកោះកុង បានដាក់តាំងបង្ហាញនាវាល្បាតនៅសម័យកាលឆ្នាំ១៩៨០ ដើម្បីលើកកម្ពស់សោភ័ណភាពខេត្ត និងបង្ហាញការទាក់ទាញចំណាប់អារម្មណ៍ភ្ញៀវទេសចរជាតិ និងអន្តរជាតិ ដែលបានមកលេងកម្សាន្តក្នុងឱកាសបុណ្យសមុទ្រខាងមុខនេះ។ នេះបើតាមវេបសាយក្រសួងព័ត៌មាន ចុះផ្សាយនៅថ្ងៃទី១០ ខែវិច្ឆិកា ឆ្នាំ២០១៨។

នាវាល្បាត នៅសម័យកាលឆ្នាំ១៩៨០ ត្រូវបានដាក់តាំងបង្ហាញនៅខេត្តកោះកុង

លោកស្រី មិថុនា ភូថង អភិបាលខេត្តកោះកុងបានមានប្រសាសន៍ថា នាវាល្បាតក្នុងអំឡុងសម័យឆ្នាំ១៩៨០ ចំនួន១គ្រឿងនេះ មានប្រវែង ១៥ម៉ែត្រ ទទឹង ៥ម៉ែត្រ និងទម្ងន់ ៣៥តោន ដោយប្រើថវិកា ជួសជុលកែលម្អជាង ១០ម៉ឺនដុល្លារអាមេរិក។

លោកស្រីបានឲ្យដឹងទៀតថា នាវាល្បាតនេះ ជាកម្មសិទ្ធិរបស់ស្នងការនគរបាល ដោយអាជ្ញាធរស្នើសុំយកមកកែលម្អឲ្យស្អាតល្អ សម្រាប់បង្ហាញដល់ភ្នែកអ្នកទេសចរ ជៀសវាងទុកវាចោល។ ម្យ៉ាងវិញទៀត គឺឆ្លើយតបទៅនឹងសំណូមពររបស់ប្រជាពលរដ្ឋអ្នកកោះកុង ដែលជំរុញឲ្យអាជ្ញាធរពាក់ព័ន្ធ កែច្នៃតំបន់ទេសចរណ៍ឲ្យបានច្រើន ខណៈខេត្តជាប់សមុទ្រមួយនេះ មានសក្តានុពលខ្ពស់ខាងផ្នែកវិស័យទេសចរណ៍ធម្មជាតិ។

លោកស្រីបានបន្តថា ដើម្បីបម្រើដល់ការរៀបចំពិធីបុណ្យសមុទ្រនាពេលខាងមុខឲ្យបានល្អប្រសើរនោះ អាជ្ញាធរ និងមន្ទីរជំនាញពាក់ព័ន្ធក្នុងខេត្តកោះកុង បានផ្តោតការយកចិត្តទុកដាក់ជួសជុលកែលម្អប្រព័ន្ធហេដ្ឋារចនាសម្ព័ន្ធសំខាន់ៗជាច្រើនរួមមាន៖ ផ្លូវថ្នល់ សួនច្បារ និងដំឡើងបង្គោលភ្លើងថ្មីៗជាដើម។

លោកស្រី មិថុនា ភូថង អភិបាលខេត្តកោះកុង មានប្រសាសន៍ប្រាប់អ្នកសារព័ត៌មាន

សូមបញ្ជាក់ថា ខេត្តកោះកុង នឹងធ្វើជាម្ចាស់ផ្ទះរៀបចំពិធីបុណ្យសមុទ្រលើកទី៧ ជុំទី២ ដែលប្រារព្ធ ចាប់ពីថ្ងៃទី១៤ ដល់ថ្ងៃទី១៦ ខែធ្នូ ឆ្នាំ២០១៨ ខាងមុខនេះ។ នៅក្នុងពិធីនោះដែរ សម្តេច ហ៊ុន សែន នាយករដ្ឋមន្ត្រី និងសម្តេច ប៊ុន រ៉ានី ហ៊ុន សែន នឹងអញ្ជើញជាអធិបតីភាពក្នុងពិធីបើកជាផ្លូវការ៕