អង្គការសម្ព័ន្ធសត្វព្រៃ សងសំណង ៣ពាន់ដុល្លារដល់ប្រជាពលរដ្ឋស្រុកកោះកុង ក្រោយផ្ទុះការតវ៉ា

2018-11-11 03:29:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អង្គការសម្ព័ន្ធសត្វព្រៃ (វាយអេត) បានសងសំណងនៃការខូចខាតពីការកាប់បំផ្លាញផលដំណាំប្រជាពលរដ្ឋនៅស្រុកកោះកុង ខេត្តកោះកុង ចំនួន ៣ពាន់ដុល្លារ ហើយអង្គការនេះ យល់ព្រមមិនប្តឹងប្រជាពលរដ្ឋ ទៅតុលាការ ដែលពួកគេបានដុតបំផ្លាញសម្ភារៈវត្ថុនោះទេ។

ការសងសំណងនេះ គឺបន្ទាប់ពីក្រុមមន្ត្រីអង្គការសម្ព័ន្ធសត្វព្រៃ បានកាប់បំផ្លាញដំណាំហូបផ្លែរបស់ប្រជាពលរដ្ឋអស់ជាច្រើនដើម កាលពីថ្ងៃទី៦ ខែវិច្ឆិកា ឆ្នាំ២០១៨ ដោយអង្គការនេះចោទថា ប្រជាពលរដ្ឋទាំងនោះ ដាំដំណាំនៅលើដីព្រៃអភិរក្ស។ ការណ៍នេះ ធ្វើឲ្យប្រជាពលរដ្ឋប្រមាណជា ៣០០នាក់ ផ្ទុះកំហឹង នាំគ្នាធ្វើការតវ៉ានៅទីស្នាក់ការអង្គការនេះ ក្នុងឃុំត្រពាំងរូង ស្រុកកោះកុង។ ការតវ៉ានេះ ឈានរហូតដល់ការដុតបំផ្លាញរថយន្តចាស់ៗ និងម៉ូតូដែលក្រុមអង្គការរឹបអូសពីបទល្មើសសត្វព្រៃ និងព្រៃឈើនាពេលកន្លងមក និងបានគប់បំបែកកញ្ចក់ទ្វារបង្អួចស្នាក់ការអង្គការផងដែរ។

រថយន្តដែលអង្គការសម្ព័ន្ធសត្វព្រៃរឹបអូសបាន ត្រូវដុតបំផ្លាញដោយប្រជាពលរដ្ឋដែលជាអ្នកតវ៉ា (រូបថត៖ ផ្តល់ឱ្យ)

ក្រោយមានករណីនេះ លោក សុខ សុទ្ធី អភិបាលរងខេត្តកោះកុង បានដឹកនាំកិច្ចប្រជុំសម្របសម្រួលការធ្វើបាតុកម្ម នៅទីស្នាក់ការអង្គការសម្ព័ន្ធសត្វព្រៃ កាលពីថ្ងៃទី៨ ខែវិច្ឆិកា ឆ្នាំ២០១៨។ លោកអភិបាលរងខេត្ត បានលើកឡើងថា គោលបំណងនៃកិច្ចប្រជុំ ដើម្បីសម្របសម្រួល រវាងប្រជាពលរដ្ឋ និងអង្គការសម្ព័ន្ធសត្វព្រៃ ជុំវិញរឿងនេះ។

សកម្មភាពសម្របសម្រួលរបស់អាជ្ញាធរខេត្តកោះកុង (រូបថត៖ ផ្តល់ឱ្យ)

ជាលទ្ធផលនៃកិច្ចប្រជុំទាំងភាគីប្រជាពលរដ្ឋ និងអង្គការសម្ព័ន្ធសត្វព្រៃ បានឯកភាពចំនួន៤ចំណុចរួមមាន៖

១-ប្រជាពលរដ្ឋព្រមទទួលយកថវិកាចំនួន ៣ពាន់ដុល្លារពីអង្គការសម្ព័ន្ធសត្វព្រៃ ដើម្បីប៉ះពាល់ផ្លូវចិត្តក្នុងការធ្វើឱ្យខូចផលដំណាំ។

២-អង្គការមិនប្តឹងប្រជាពលរដ្ឋទៅតុលាការទេ។

៣-អង្គការមិនទាមទារឱ្យសងការខូចខាត នៅទីស្នាក់ការទេ

និង៤-ប្រជាពលរដ្ឋមិនត្រូវបង្កបង្កើនផលនៅលើទីតាំងដីទំនាស់នោះទៀតទេ។

ដំណាំដែលត្រូវបានកាប់បំផ្លាញចោល ដោយអង្គការសម្ព័ន្ធសត្វព្រៃ (រូបថត៖ ផ្តល់ឱ្យ)

បើតាមលោក ជា សាវី អភិបាលស្រុកកោះកុង បានឲ្យដឹងថា ទីតាំងដីទំនាស់នេះស្ថិតក្នុងអនុក្រឹត្យលេខ៨០ របស់រាជរដ្ឋាភិបាលកម្ពុជា។ តែក្រោយមក ទីតាំងដីនេះ ត្រូវបានក្រុមយុវជនស្ម័គ្រចិត្ត ធ្វើការវាស់វែងជូនប្រជាពលរដ្ឋ កាលពីឆ្នាំ២០១២-២០១៣មកម៉្លេះ ហើយបន្ទាប់មកទៀត រាជរដ្ឋាភិបាល បានចេញអនុយោគផ្តល់ទីតាំងនោះជូនប្រជាពលរដ្ឋប្រើប្រាស់៕

អត្ថបទ៖ សោភា