ប្រធានាធិបតីបារាំង ចាត់ទុក "ជាតិនិយម" ជាការក្បត់ "មនសិការស្នេហាជាតិ"
- 2018-11-12 02:24:24
- ចំនួនមតិ 0 | ចំនួនចែករំលែក 0
ប្រធានាធិបតីបារាំង ចាត់ទុក "ជាតិនិយម" ជាការក្បត់ "មនសិការស្នេហាជាតិ"
ចន្លោះមិនឃើញ
លោក Emmnuel Macron ប្រធានាធិបតីបារាំង បានជំរុញឲ្យមេដឹកនាំពិភពលោក ទាត់ចោលជាតិនិយម ដោយលោកលើកឡើងថា ជាតិនិយមជាការក្បត់មនសិការស្នេហាជាតិ។ លោកក៏បានព្រមានដែរថា "សភាវៈអាក្រក់កំពុងត្រឡប់មកបង្កចលាចល និងការសម្លាប់ឡើងវិញ"។
ការលើកឡើងរបស់លោកប្រធានាធិបតីបារាំង បានធ្វើឡើងអំឡុងពិធីរម្លឹកខួប ១០០ឆ្នាំនៃសង្រ្គាមលោកលើកទី១ នៅក្រុងប៉ារីស កាលពីថ្ងៃទី១១ ខែវិច្ឆិកា ឆ្នាំ២០១៨ ម្សិលមិញ គឺនៅមុខលោក ដូណាល់ ត្រាំ ប្រធានាធិបតីអាមេរិក លោក វ្លាឌីមៀ ពូទីន ប្រធានាធិបតីរុស្ស៊ី និងមេដឹកនាំពិភពលោកប្រមាណ ៦០រូបទៀត ដែលបានចូលរួមក្នុងពិធីនោះ។
លោក Macron ថា "ទាហានរាប់លាននាក់បានស្លាប់នៅក្នុងការប្រយុទ្ធសង្រ្គាមដ៏ខ្លាំងក្លា ដើម្បីការពារតម្លៃសាកល... អត្មានិយមនៃប្រទេសនានា គឺសម្លឹងរកប្រយោជន៍ផ្ទាល់ខ្លួនរបស់ពួកគេតែប៉ុណ្ណោះ។ ពីព្រោះមនសិការស្នេហាជាតិ ជាក់ស្ដែងគឺប្រឆាំងនឹងជាតិនិយម"។
សូមបញ្ជាក់ថា លោក ដូណាល់ ត្រាំ ប្រធានាធិបតីអាមេរិក បានចាត់ទុកខ្លួនឯងជា អ្នកជាតិនិយម និងបានដកអាមេរិកចេញពីកិច្ចព្រមព្រៀងអន្តរជាតិ រួមមានកិច្ចព្រមព្រៀងនុយក្លេអ៊ែរជាមួយអ៊ីរ៉ង់ កិច្ចព្រមព្រៀងក្រុងប៉ារីសស្ដីពីបម្រែបម្រួលអាកាសធាតុ និងកម្មវិធីសម្រាប់ជនភៀសខ្លួនរបស់អង្គការសហប្រជាជាតិ៕