លោក ឆាយ បូរ៉ា បញ្ជាក់មូលហេតុនៃការលាលែងពីប្រធានសមាគមភាពយន្តកម្ពុជា

2018-11-12 07:22:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ឆាយ បូរ៉ា បានចុះហត្ថលេខាលាលែងពីតំណែងប្រធានសមាគមភាពយន្តកម្ពុជា កាលពីថ្ងៃទី១១ ខែកញ្ញា ឆ្នាំ២០១៨ ដោយបានដាក់ស្នើទៅកាន់លោក ស៊ិន ចាន់សាយ៉ា ប្រធានក្រុមប្រឹក្សាភិបាល សមាគមភាពយន្តកម្ពុជា។

លោក ឆាយ បូរ៉ា បញ្ជាក់ថា ការលាលែងនេះដោយសារតែរូបលោក ទទួលបានការបោះឆ្នោតឱ្យទទួលតំណែងជាប្រធាននេះ ២ឆ្នាំជាប់គ្នាមកហើយ។ លោកបន្តថា មានបញ្ហាជាច្រើនក្នុងវិស័យភាពយន្ត ដែលលោកបានខិតខំដោះស្រាយ ហើយក៏នៅមានបញ្ហាជាច្រើនទៀត ដែលរូបលោកមិនអាចសម្រេចបានក្នុងនាមជាប្រធានសមាគមមួយនេះ។

លោក ឆាយ បូរ៉ា ចាងហ្វាងផលិតកម្មដើមត្នោត ថ្លែងនាពេលកន្លងមក

ចំណែកហេតុផលមួយទៀត លោក ឆាយ បូរ៉ា ពន្យល់ថា លោកចង់ផ្តោតការងារក្នុងផលិតកម្មដើមត្នោតរបស់ខ្លួន ឱ្យបានច្រើនជាងមុន និងផ្តល់ឱកាសជាប្រធានសមាគមនេះទៅកាន់អ្នកថ្មីដែលអាចដឹកនាំ ព្រមទាំងដោះស្រាយបញ្ហាជូនផលិតករភាពយន្តខ្មែរ ឱ្យកាន់តែប្រសើរជាងមុន។

«ការខិតខំក្នុងវិស័យភាពយន្តខ្មែរ ដើម្បីធ្វើឱ្យសិល្បៈនេះមានភាពល្បីល្បាញ ជាបេសកម្មមួយវែងឆ្ងាយសម្រាប់កម្ពុជា ពិសេសផលិតករភាពយន្តខ្មែរគ្រប់រូប។ ភាពយន្ត ជាទម្រង់មួយសំខាន់ក្នុងមែកធាង វប្បធម៌របស់ជាតិ ដែលពាំនាំយកកិត្យានុភាពជាតិទៅកាន់ពិភពលោក។ មិនត្រឹមតែប៉ុណ្ណោះ វាជាផ្នែកមួយដ៏សំខាន់ក្នុងប្រព័ន្ធសេដ្ឋកិច្ចរបស់ប្រទេស ដែលបង្កើតការងារឱ្យមនុស្សរាប់ពាន់នាក់ ហើយនឹងឈានដល់ការទាញយករូបិយប័ណ្ណអន្តរជាតិជូនជាតិថែមទៀត។ កុំរង់ចាំវាស្លាប់ហើយមកសង្គ្រោះ»។ នេះជាសារចុងក្រោយ ដែលលោក ឆាយ បូរ៉ា ផ្ញើមកកាន់សារព័ត៌មាន Sabay៕

ប្រភព៖ Sabay News អត្ថបទ៖ Sunny