កសិករដាំកាហ្វេនៅខេត្តមណ្ឌលគិរី លែងបារម្ភពីតម្លៃលក់ចេញ

2018-11-13 02:17:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កសិករដែលធ្វើការដាំដុះដំណាំកាហ្វេនៅខេត្តមណ្ឌលគិរី លែងព្រួយបារម្ភលើតម្លៃលក់ លើកចេញទៀតហើយ ខណៈដែលសព្វថ្ងៃមានក្រុមហ៊ុនមួយ បានចុះមកទទួលទិញទិន្នផល កាហ្វេបញ្ជួនទៅក្រៅប្រទេស ដោយផ្តល់ជូននូវតម្លៃសមរម្យដល់កសិករ។ នេះបើតាមទីភ្នាក់ងារសារព័ត៌មានកម្ពុជា កាលពីថ្ងៃទី១២ ខែវិច្ឆិកា ឆ្នាំ២០១៨។

ដើមកាហ្វេ នៅខេត្តមណ្ឌលគីរី

កសិកររស់នៅក្នុងស្រុកពេជ្រាដា បានឲ្យដឹងកាលពីថ្ងៃទី១២ ខែវិច្ឆិកាថា តម្លៃកាហ្វេ ស្ងួតលក់បានរហូតដល់ទៅ១ម៉ឺនរៀល បើធៀបនឹងឆ្នាំមុនគឺលក់បានតម្លៃថ្លៃបំផុត ត្រឹមតែ ៧ ពាន់រៀលប៉ុណ្ណោះ។ កសិករឈ្មោះ រ៉ូយ ទើប រស់នៅភូមិពូចារ ឃុំប៊ូស្រា ស្រុកពេជ្រាដា បានឲ្យដឹងថា គ្រួសាររបស់គាត់មានផ្ទៃដីដាំកាហ្វេចំនួន ៨ហិកតា ហើយសព្វថ្ងៃកំពុងប្រមូលផល។

លោក រ៉ូយ ទើប បន្តថា កាហ្វេជាដំណាំមួយប្រភេទងាយស្រួលដាំនិងថែទាំ មិនពិបាកដូចដំណាំម្រេចទេ។ ចំណែករយៈពេលនៃការប្រមូលផល មានរយៈពេល ២ឆ្នាំកន្លះ ដោយគិតចាប់ពីថ្ងៃដាំ។ កសិករដដែលបានបញ្ជាក់ថា តម្លៃកាហ្វេកាលពីឆ្នាំ២០១៧ លក់បានត្រឹមតែ ៦ពាន់រៀលទៅ ៧ពាន់រៀលប៉ុណ្ណោះ តែនៅឆ្នាំនេះ គាត់អាចលក់បានតម្លៃមួយគីឡូក្រាមរហូតដល់ ១ម៉ឺនរៀល ចំពោះគ្រាប់កាហ្វេស្ងួត។ ឯគ្រាប់កាហ្វេស្រស់វិញ ក្នុងមួយគីឡូក្រាមតម្លៃ ៤ពាន់រៀល។ ចំណែកទិន្នផលដែលទទួលបាន គឺមួយហិកតា បានគ្រាប់កាហ្វេស្រល់ប្រមាណ ៧ ទៅ ៨តោន បើហាលស្ងួតអាចនៅសល់ត្រឹម ៤ ទៅ ៥តោន។

ចម្ការកាហ្វេ នៅខេត្តមណ្ឌលគីរី

តំណាងក្រុមហ៊ុន Coffe Timor ប្រចាំខេត្តមណ្ឌលគិរីលោក យស ចាន់ថា បានបញ្ជាក់ថា ក្រុមការងាររបស់លោក បាននិងកំពុងបង្កើនសកម្មភាពចុះបង្រៀន និងជួយផ្តល់ជា ដើមទុនសម្រាប់ប្រជាកសិករដាំដំណាំកាហ្វេ បែបធម្មជាតិដើម្បីអាចនាំចេញទៅក្រៅប្រទេស ហើយទទួលបានតម្លៃថ្លៃ។

លោក យស ចាន់ថា បានបញ្ជាក់ថា ក្រុមការងាររបស់លោក បានចុះធ្វើសកម្មភាព ជួយដល់ប្រជាកសិករដាំកាហ្វេ នៅស្រុកពេជ្រាដា រយៈពេល ២ឆ្នាំមកហើយ ដោយបានផ្តល់ជាបច្ចេកទេស ឧបករណ៍ប្រើប្រាស់ដើមទុន រួមនឹងទទួលទិញគ្រាប់កាហ្វេ ពីកសិករក្នុងតម្លៃខ្ពស់ជាងទីផ្សារធម្មតា។ តែបានតម្លៃថ្លៃសម្រាប់តែគ្រាប់កាហ្វេដែលដាំដោយ ប្រើជីកសិកម្ម គ្មានគីមីប៉ុណ្ណោះ។

តំណាងក្រុមហ៊ុន Caffe Timor បានបង្ហាញពីការថែទាំកាហ្វេ គឺចាំបាច់ត្រូវដើរបេះខ្នែងវាដុះចេញពីមែក និងត្រូវស្រោចទឹកនៅរដូវប្រាំង ឲ្យបានក្នុង១គុម្ព ចំណុះទឹក ១០ ទៅ ២០លីត្រ ក្នុងមួយថ្ងៃ។ បើនៅរដូវវស្សា ទឹកមិនបាច់ស្រោចក៏បាន ព្រោះអាកាសធាតុត្រជាក់ និងមានភ្លៀងធ្លាក់សើមដី។ តែបើដីស្ងួត អាចស្រោចទឹក ៣ថ្ងៃម្ដង និងថែមជីក្នុង ១គុម្ព ២បង្គីសម្រាប់ជីកំប៉ុស្ត។

តំណាងក្រុមហ៊ុនរូបនេះបានអះអាងថា ការថែទាំកាហ្វេដិតដល់ នឹងហុចផលក្នុងរយៈពេល ៣ឆ្នាំ។ នៅឆ្នាំទី៤ ទើបគេចាប់ផ្ដើមប្រមូលផល។ ដើមកាហ្វេ បើគេអាចថែទាំវាបានល្អ ដោយស្រោចទឹក ដាក់ថែមជីគ្រប់គ្រាន់ នោះវានឹងឲ្យផលបេះផ្លែបានរហូតដល់ជិត ២០ឆ្នាំ។ ហើយវាអាចផ្តល់ទិន្នផលប្រមាណពី ៣ ទៅ ៦តោនក្នុងមួយហិកតា។

កសិករ កំពុងបេះគ្រាប់កាហ្វេ

ប្រធានមន្ទីរកសិកម្មខេត្តមណ្ឌលគិរី លោក សុង ឃាង បានឲ្យដឹងដែរថា សព្វថ្ងៃ ផ្ទៃដីដាំដំណាំកាហ្វេក្នុងខេត្ត មានសរុបចំនួន ២៨៥ ហិកតា ក្នុងនោះ កាហ្វេក្រុមហ៊ុន មានចំនួន ១៣៥ហិកតា។ ចំណែកទីផ្សារកាហ្វេសព្វថ្ងៃនេះ លោកប្រធានមន្ទីរបានបន្តថា កំពុងមានតម្រូវការខ្ពស់ដោយសារតែប្រជាពលរដ្ឋ ជាពិសេសអ្នកនិយមពិសាកាហ្វេបានយល់ដឹងច្បាស់ពីផលប្រយោជន៍នៃការពិសាកាហ្វេធម្មជាតិ និងកាហ្វេគីមីមានភាពខុសគ្នា៕

រូបថត៖ AKP

អត្ថបទ៖ លាភ.