មហាធៀ ជួប ពូទីន ពិភាក្សាពីបញ្ហាយន្តហោះចម្បាំងរុស្ស៊ី

2018-11-14 03:52:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក មហាធៀ មហាម៉ាត់ នាយករដ្ឋមន្រ្តីម៉ាឡេស៊ី កាលពីយប់ថ្ងៃទី១៣ ខែវិច្ឆិកា ២០១៨ ម្សិលមិញ បានជួបពិភាក្សាទ្វេភាគីជាមួយលោក វ្លាឌីមៀ ពូទីន ប្រធានាធិបតីរុស្ស៊ី នៅក្នុងប្រទេសសិង្ហបុរី អំឡុងមេដឹកនាំទាំងពីរចូលរួមកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធផ្សេងទៀត។

តាមការចុះផ្សាយរបស់ The Star បញ្ជាក់ថា ជំនួបពិភាក្សានេះ ត្រូវបានស្នើឡើងដោយលោក ពូទីន។

លោក មហាធៀ មហាម៉ាត់ នាយករដ្ឋមន្រ្តីម៉ាឡេស៊ី (ឆ្វេង) ចាប់ដៃជាមួយលោក វ្លាំឌីមៀ ពូទីន ប្រធានាធីបតីរុស្ស៊ី (ស្ដាំ) ក្នុងជំនួបទ្វេភាគី នៅក្នុងប្រទេសសិង្ហបុរី កាលពីថ្ងៃទី១៣ ខែវិច្ឆិកា ២០១៨/ រូបភាព៖ Malay Mail

អំឡុងជំនួបពិភាក្សានោះ លោកនាយករដ្ឋមន្រ្តីវ័យ ៩៣ឆ្នាំរបស់ម៉ាឡេស៊ីបានប្រាប់លោក ពូទីន តាមរយៈអ្នកបកប្រែថា "ដូចអ្នកដឹងហើយ យើងបានទិញយន្តហោះចម្បាំងរុស្ស៊ីមួយចំនួន... ហើយខ្ញុំគិតថា យើងត្រូវការសិក្សាបន្ថែមអំពីមធ្យោបាយដើម្បីថែរក្សា និងជួសជុលយន្តហោះចម្បាំង"។

កាលពីខែកក្កដា ២០១៨ លោក មហាម៉ាត់ សាប៊ូ រដ្ឋមន្រ្តីក្រសួងការពារជាតិម៉ាឡេស៊ីបានទម្លាយថា មានតែយន្តហោះចម្បាំង ៤គ្រឿង ក្នុងចំណោម ២៨គ្រឿង ផលិតដោយរុស្ស៊ី (មានប្រភេទ Sukhoi Su-30MKM និង MiG-29) ដែលជាកម្មសិទ្ធិរបស់កងទ័ពម៉ាឡេស៊ី អាចធ្វើការហោះហើរបាន។

ប៉ុន្ដែប្រធានបទស្ដីពីការធ្លាក់យន្តហោះដឹកអ្នកដំណើរ MH17 របស់ម៉ាឡេស៊ី ដែលមានមនុស្ស ២៨៣នាក់នៅលើនោះ ហើយជាប់ពាក់ព័ន្ធនឹងកងទ័ពរុស្ស៊ី កាលពីឆ្នាំ២០១៤ កន្លងទៅ ពុំត្រូវបានលើកឡើងនោះទេ។

ចំណែកលោក ពូទីន វិញបានប្រាប់លោក មហាធៀ ថា "ទំនាក់ទំនងរុស្ស៊ី និងម៉ាឡេស៊ីបានកំពុងរីកចម្រើន ហើយយើងកំពុងធ្វើបានយ៉ាងល្អ"។ លោកបន្ថែមទៀតថា "ពាណិជ្ជកម្មរបស់យើងគឺពិតជាល្អ ប៉ុន្ដែយើងអាចធ្វើឲ្យកាន់តែប្រសើរឡើងថែមទៀត"៕