ក្រុមហ៊ុនផលិតឧបករណ៍អគ្គិសនីចិន ចាប់អារម្មណ៍វិនិយោគនៅខេត្តព្រះសីហនុ

2018-11-14 04:05:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុន Suzhou Zhongchu Puhua Electric Technology Co., Ltd បានបង្ហាញការពេញចិត្ត និងចាប់អារម្មណ៍ក្នុងការវិនិយោគបង្កើតរោងចក្រផលិតឧបករណ៍សម្ភារៈអគ្គិសនីនៅតំបន់សេដ្ឋកិច្ចពិសេស ខេត្តព្រះសីហនុ។

លោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម ជួបជាមួយប្រតិភូក្រុមហ៊ុន Suzhou Zhongchu Puhua Electric Tecnology Co,Ltd (រូបថត៖ ក្រសួងឧស្សាហកម្ម និងសិប្បកម្ម)

ការឲ្យដឹងនេះ ត្រូវបានធ្វើឡើងក្នុងជំនួបពិភាក្សាការងាររវាងលោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម ជាមួយប្រតិភូក្រុមហ៊ុន Suzhou Zhongchu Puhua Electric Tecnology Co,Ltd មកពីទីក្រុង Suzhou ខេត្ត Jiangsu នៃប្រទេសចិន ដឹកនាំដោយលោក Hongjian Wang ជាប្រធានក្រុមហ៊ុន កាលពីថ្ងៃទី ១៣ ខែវិច្ឆិកា ឆ្នាំ២០១៨ នៅទីស្តីការក្រសួងឧស្សាហកម្ម និងសិប្បកម្ម ។

លោក Hongjian Wang បានឲ្យដឹងថា ក្រុមហ៊ុនត្រូវបានបង្កើតឡើងតាំងពីឆ្នាំ១៩៨៣ មកម្ល៉េះ។ តាមរយៈភាពរីកចម្រើនផ្នែកបច្ចេកវិទ្យាជាបន្តបន្ទាប់ ក្រុមហ៊ុនបានផលិតឧបករណ៍អគ្គិសនី ដូចជាប្រអប់ភ្លើង និងកុងតាក់បិទបើកភ្លើងជាដើម ដើម្បីលក់ទៅកាន់ទីផ្សារសហរដ្ឋអាមេរិក និងសហគមន៍អឺរ៉ុប។ ចំពោះទីផ្សារកម្ពុជា លោកមានជំនឿថា នឹងមានកម្លាំងទិញល្អប្រសើរ។

យោងតាមលោក ចម ប្រសិទ្ធ តាំងពីឆ្នាំ២០១៥ មក វិស័យឧស្សាហកម្មចាប់ផ្តើមមានអត្រាកំណើនខ្ពស់ជាងវិស័យកសិកម្ម ដោយមានកំណើនប្រមាណ ពី ១០ ទៅ ១២% ក្នុងមួយឆ្នាំ ស្របពេលដែលវិស័យកសិកម្ម មានកំណើនត្រឹម ១ ទៅ ២% ប៉ុណ្ណោះ៕

អត្ថបទ៖ លាភ.