កម្ពុជា-ADB នឹងសង់ប្រឡាយជាបេតុង ប្រវែងជិត ៤០០គីឡូម៉ែត្រ ក្នុងខេត្តចំនួន៥

2018-11-14 06:12:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

តាមរយៈការអនុវត្តគម្រោង Irrigated Agriculture Improvement Project (IAIP) ក្រសួងធនធានទឹក និងឧតុនិយម និងធនាគារអភិវឌ្ឍន៍អាស៊ី (ADB) នឹងសាងសង់ប្រព័ន្ធប្រឡាយជាបេតុង ប្រវែងសរុប ៣៨១,២គីឡូម៉ែត្រនៅកម្ពុជា។ នេះបើតាមការចុះផ្សាយរបស់ក្រសួងធនធានទឹក ដោយដកស្រង់ខ្លឹមសារពីជំនួបពិភាក្សារវាង លោក លឹម គានហោ រដ្ឋមន្រ្តីក្រសួងធនធានទឹក និងគណៈប្រតិភូ ADB នៅព្រឹកថ្ងៃទី១៤ ខែវិច្ឆិកា ឆ្នាំ២០១៨។

គម្រោង IAIP នឹងត្រូវអនុវត្តក្នុងខេត្តចំនួន៥ រួមមានខេត្តបាត់ដំបង កំពង់ចាម តាកែវ កំពង់ធំ និងខេត្តកំពត ដោយធ្វើទំនើបកម្ម ធ្វើការជួសជុលស្តារឡើងវិញ និងធ្វើការកែលម្អលើប្រព័ន្ធធារាសាស្ត្រ ឲ្យទៅជាប្រព័ន្ធធារាសាស្រ្តមានលក្ខណៈគ្រប់ជ្រុងជ្រោយ ដែលប្រើបានសម្រាប់ស្រោចស្រពបានទាំងរដូវប្រាំង និងរដូវវស្សា។

ប្រព័ន្ធធារាសាស្រ្តមួយកន្លែង ក្នុងខេត្តកំពង់ចាម (រូបថត៖ FB ក្រសួងធនធានទឹក)

ក្រៅពីការសាងសង់ប្រព័ន្ធប្រឡាយជាបេតុង គម្រោង IAIP ដែលមានតម្លៃសរុប ១៣៥ លានដុល្លារនេះ នឹងត្រូវវិនិយោគលើការងារជាច្រើនទៀតដូចខាងក្រោម៖

-ធ្វើទំនប់អាងទឹកជាបេតុង ប្រវែង ៦,៥គម។

-ធ្វើទំនប់បង្ហៀរខ្នាតធំ ប្រវែង ៨០០ ម។

-បំពាក់ស្ថានីយបូមទឹកដើរដោយថាមពលអគ្គិនីយខ្នាតធំមានក្បាលបូម ៥ចំនួន ០២កន្លែង ជាប្រភេទ Smart Pumping Systems។

-សាងសង់សំណង់សិល្បការធំតូចដ៏ច្រើន ដើម្បីធានាឲ្យប្រព័ន្ធធារាសាស្ត្រទាំងនោះ មានលក្ខណៈគ្រប់ជ្រុងជ្រោយ ក្នុងខេត្តទាំង៥ ខាងលើ ធ្វើការប្រើប្រាស់បានគ្រប់គ្រាន់ក្នុងការស្រោចស្រពដំណាំស្រូវ បាន ៣ដង ក្នុង ១ឆ្នាំ។

-សាងសង់ Join Reservoir Operations (JOROP) ដើម្បីធានាបានលើរបបទឹកឲ្យនៅតែជាទឹករស់ទាំងរដូវវស្សា និងរដូវប្រាំង សម្រាប់ប្រព័ន្ធធារាសាស្រ្តទាំងអស់ក្នុងខេត្តទាំង៥ ខាងលើ។

-ធ្វើបញ្ជីសារពើភ័ណ្ឌក្នុងលក្ខណៈទំនើបកម្មលើប្រព័ន្ធធារាសាស្ត្រ។

-វិនិយោគលើការថែទាំជាប្រចាំ និងការថែទាំ រយ:ពេល ២ឆ្នាំ មុនពេលផ្ទេរការងារទាំងនេះទៅឲ្យអ្នកទទួលផល។

-ធ្វើការរៀបចំអ្នកទទួលផលទាំងអស់ឲ្យក្លាយទៅជា សកបទ ដើម្បីដំណើរការប្រព័ន្ធធារាសាស្ត្រក្នុងខេត្តទាំង ៥ខាងលើ ឲ្យមាននិរន្តរភាព។

-គម្រោង IAIP នឹងចំណាយទៅលើការសាងសង់មជ្ឈមណ្ឌលទិន្នន័យទឹកដ៏ទំនើប ដើម្បីធ្វើការគ្រប់គ្រង បញ្ជា ផ្សព្វផ្សាយ ព្យាករណ៍ សំយោគ និងយុទ្ធសាស្ត្រ ដាក់ផែនការដំណោះស្រាយ និងរក្សាទុកលើទិន្នន័យទឹក។

-បំពាក់សម្ភារទំនើបគ្រប់យ៉ាងទាំងអស់ ដែលបម្រើឲ្យការបញ្ជា គ្រប់គ្រង និងដាក់យុទ្ធសាស្ត្រទឹក ប្រកបដោយប្រសិទ្ធភាពខ្ពស់ ក្នុងលក្ខណៈ Real Time Forcasting។

-IAIP នឹងវិនិយោគទៅលើការងារដំឡើងប្រព័ន្ធ Doppler Radar តេជោសែនទី ២ ថ្មី ០១ទៀត នៅខេត្តកំពង់ធំ ដើម្បីជួយដល់ការព្យាករ គ្រប់គ្រង ផ្សព្វផ្សាយ និងសំយោគទិន្នន័យទឹក ក្នុងលក្ខណៈ Real Times ។

-IAIP ក៏ផ្តល់អាហារូបករណ៍រយ:ពេលវែង លើជំនាញទាំងអស់ដែលបម្រើឲ្យមជ្ឈមណ្ឌលទិន្នន័យទឹកខាងលើ ។

-ចំណាយលើការបំពាក់សម្ភារៈគ្រប់យ៉ាងទាំងអស់ក្នុងមជ្ឈមណ្ឌលខាងលើ។

-បំពាក់បន្ថែមលើ Hydrometers and AWSs៕

អត្ថបទទាក់ទង៖