ក្រុងប៉េកាំង ជ្រើសរើសកំពូលយុវជន២៤នាក់ ដើម្បីអភិវឌ្ឍកម្មវិធីអាវុធ AI

2018-11-14 09:27:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

យុវជន ២៤នាក់ ក្នុងចំណោម ៥០០០នាក់ដែលមានកម្រិតវិទ្យាល័យ ត្រូវបានជ្រើសរើសឲ្យចូលរួមកម្មវិធីអ្នកវិទ្យាសាស្ត្រវ័យក្មេងដើម្បីអភិវឌ្ឍអាវុធបញ្ញាសិប្បនិម្មិត (AI) ។ នេះបើយោងតាមការប្រកាសរបស់វិទ្យាស្ថានបច្ចេកវិទ្យាក្រុងប៉េកាំង ហៅកាត់ BIT កាលពីពេលថ្មីៗកន្លងទៅ។

យុវជនវិទ្យាល័យ ២៤នាក់ ត្រូវបានជ្រើសរើសឲ្យចូលរួមកម្មវិធីអ្នកវិទ្យាសាស្ត្រវ័យក្មេងដើម្បីអភិវឌ្ឍអាវុធបញ្ញាសិប្បនិម្មិត (AI)/ រូបថត៖ South China Morning Post

យុវជនទាំង២៤នាក់ (ប្រុស/ស្រី) ដែលមានអាយុក្រោម ១៨ឆ្នាំ នឹងចូលរួមកម្មវិធីពិសោធន៍ប្រព័ន្ធអាវុធឆ្លាតវៃ ដែលមានរយៈពេល ៤ឆ្នាំ ជាមួយវិទ្យាស្ថាន BIT ដែលជាវិទ្យាស្ថានមួយក្នុងចំណោមវិទ្យាស្ថានស្រាវជ្រាវអាវុធ AI ល្បីៗនៅក្នុងប្រទេសចិន។

វិទ្យាស្ថាន BIT បានឲ្យដឹងថា យុវជនដែលខ្លួនជ្រើសរើស មិនត្រឹមតែមានភាពឆ្លាតវៃប៉ុណ្ណោះទេ ប៉ុន្តែថែមទាំងមានគំនិតច្នៃប្រឌិត ឆន្ទៈក្នុងការប្រយុទ្ធ និងភាពអត់ធ្មត់ក្នុងការប្រឈមនឹងឧបសគ្គផ្សេងៗផងដែរ។ លើសពីនេះ ពួកគេ ត្រូវតែជាអ្នកស្នេហាជាតិពិតប្រាកដ។

សូមជម្រាបថា ចិន កំពុងប្រកួតប្រជែងជាមួយអាមេរិក និងបណ្ដាប្រទេសផ្សេងៗ ដើម្បីអភិវឌ្ឍបច្ចេកវិទ្យា AI ក្នុងវិស័យយោធា ដូចជា នាវាមុជទឹកនុយក្លេអ៊ែរឆ្លាតវៃ និងរ៉ូបូតតូចល្អិតដែលអាចដាក់ចូលក្នុងសរសៃឈាមមនុស្សជាដើម៕

ប្រភព៖ South China Morning Post ប្រែសម្រួល៖ លាភ.