ប្រព័ន្ធកត់ត្រាទិន្នន័យ ដែលបង្កើតដោយកូនខ្មែរ ត្រូវបានទទួលស្គាល់ពីអន្តរជាតិ
- 2018-11-15 06:57:34
- ចំនួនមតិ 0 | ចំនួនចែករំលែក 0
ប្រព័ន្ធកត់ត្រាទិន្នន័យ ដែលបង្កើតដោយកូនខ្មែរ ត្រូវបានទទួលស្គាល់ពីអន្តរជាតិ
ចន្លោះមិនឃើញ
ស្ថាបនិកប្រព័ន្ធ CAMEMIS លោក គាំ វិបុលរិទ្ធ បានឲ្យដឹងថា ប្រព័ន្ធកត់ត្រាទិន្នន័យសម្រាប់ជួយសម្រួលដល់គ្រឹះស្ថានសិក្សាក្នុងការតាមដាននិងកត់ត្រាឯកសារផ្សេងៗរបស់សាលា (CAMEMIS) នេះ ត្រូវបានចុះកម្មសិទ្ធិបញ្ញានៅប្រទេសអាល្លឺម៉ង់ ដែលអាចប្រើប្រាស់បានជាលក្ខណៈអន្តរជាតិ។ លោក គាំ វិបុលរិទ្ធ បានឲ្យដឹងដូច្នេះ នៅក្នុងសិក្ខាសាលា ស្ដីពីអត្ថប្រយោជន៍នៃការប្រើប្រាស់ប្រព័ន្ធ CAMEMIS នៅសាលាខេត្តសៀមរាប កាលពីថ្ងៃទី ១៤ ខែវិច្ឆិកា ឆ្នាំ២០១៨។
លោក គាំ វិបុលរិទ្ធ បន្តថា ប្រព័ន្ធ CAMEMIS នេះ មានលក្ខណៈស្រដៀងគ្នាទៅនឹងប្រព័ន្ធហ្វេសប៊ុក និងប្រព័ន្ធទំនាក់ទំនងសង្គមនានាជាច្រើន។ ប៉ុន្តែ ប្រព័ន្ធនេះ ខុសប្លែកត្រង់តែបង្កើតគណនេយ្យចងជាក្រុម និងកំណត់ឲ្យប្រើប្រាស់បាន សម្រាប់តែស្ថាប័នរបស់រដ្ឋ និងគ្រឹះស្ថានសិក្សានានា។ ស្ថាប័នទាំងនោះ មានសិទ្ធិក្នុងការបញ្ចូលសមាជិករបស់ខ្លួន ដូចជាលោកគ្រូអ្នកគ្រូ សិស្សានុសិស្ស មាតាបិតា អាណាព្យាបាលសិស្ស ដើម្បីពួកគាត់ងាយស្រួលតាមដានការសិក្សា និងសកម្មភាពផ្សេងៗរបស់បុត្រធីតាពួកគាត់គ្រប់ពេលវេលា ដោយកាត់បន្ថយការចំណាយពេល និងចំណេញ ទាំងសាលា ទាំងគ្រួសារមាតាបិតាសិស្ស។
សូមបញ្ជាក់ថា ប្រព័ន្ធ CAMEMIS នេះ ត្រូវបានបង្កើតឡើងដោយវិស្វករខ្មែរ ដែលបានទៅសិក្សានៅប្រទេសអាល្លឺម៉ង់ជាច្រើនឆ្នាំ ក្នុងគោលដៅជួយសម្រួលដល់ការងារផ្នែកវិស័យសិក្សាអប់រំគ្រប់កម្រិត។ វាមានសមត្ថភាពជួយសម្រួលដល់ការគ្រប់គ្រងទិន្នន័យទូទៅរបស់សាលា ទាំងផ្នែករដ្ឋ និងឯកជន ដូចជាសាលារៀន, មជ្ឈមណ្ឌលបណ្ដុះបណ្ដាលនានារបស់អង្គការ ឬសមាគមន៍ និងសាលាចំណេះទូទៅគ្រប់កម្រិត៕
រូប៖ CAMEMIS