ផ្លូវរត់ថ្មីសម្រាប់ទទួលយន្តហោះធុនធំ នៅអាកាសយានដ្ឋានភ្នំពេញ ត្រូវបានបើកឱ្យដំណើរការ

2018-11-16 04:10:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ផ្លូវរត់យន្តហោះថ្មីនៅអាកាសយានដ្ឋានអន្តរជាតិភ្នំពេញ ដែលមានសមត្ថភាពអាចទទួលយន្តហោះធុនធំបានដោយសុវត្ថិភាព និងមានភាពងាយស្រួល ត្រូវបានបើកឱ្យដំណើរការហើយកាលពីថ្ងៃទី១៥ ខែវិច្ឆិកា ឆ្នាំ២០១៨។ នេះបើតាមការចុះផ្សាយរបស់វិបសាយក្រសួងព័ត៌មាន។

ក្នុងពិធីសូត្រមន្តប្រោសព្រំបញ្ចប់គម្រោងអ៊ុតផ្លូវរត់យន្តហោះថ្មីនេះ លោក Eric Delobel អគ្គនាយកក្រុមហ៊ុន Cambodia Airport បានឲ្យដឹងថា ផ្លូវនេះ មានលទ្ធភាពទាក់ទាញការចុះចតយន្តហោះអន្តរជាតិធំៗកាន់តែច្រើន រហូតដល់រយៈពេល ១៥ឆ្នាំទៅមុខទៀត ដែលនឹងជួយលើកកម្ពស់វិស័យដឹកជញ្ជូនតាមផ្លូវអាកាសកាន់តែមានលក្ខណៈល្អប្រសើរ។

លោកបញ្ជាក់ថា ផ្លូវថ្មីនេះ ត្រូវបានប្រើប្រាស់បច្ចេកទេសសាងសង់ទំនើប ដែលធានាបានទំាងសុវត្ថិភាពនៃការចុះចត និងការរត់ឡើងរបស់យន្តហោះ។

ផ្លូវរត់យន្តហោះថ្មី នៅព្រលានយន្តហោះអន្តរជាតិភ្នំពេញ (រូបថត៖ វិបសាយក្រសួងព័ត៌មាន)

ចំណែក លោក សយ សុខាន់ អនុរដ្ឋលេខាធិការនៃរដ្ឋលេខាធិការដ្ឋានអាកាសចរណ៍ស៊ីវិល បានលើកឡើងថា ការស្ថាបនាផ្លូវរត់យន្តហោះថ្មីនេះ គឺបានបង្កើននូវភាពកក់ក្តៅដល់អ្នកធ្វើដំណើរ ខណៈដែលចំនួនអ្នកធ្វើដំណើរតាមផ្លូវអាកាសនេះ កំពុងមានកំណើនខ្ពស់ច្រើន ពីមួយឆ្នាំទៅមួយឆ្នាំ។

សូមបញ្ជាក់ថា ផ្លូវរត់យន្តហោះថ្មីនេះ មានប្រវែង ៣ពាន់ម៉ែត្រ ដោយចំណាយថវិកាដល់ជាង ១២លានដុល្លារ។ ក្រុមហ៊ុននេះ ក៏គ្រោងសាងសង់ចំណតយន្តហោះចំនួន ១០ចំណតបន្ថែមទៀតផងដែរ ដើម្បីកាន់តែផ្តល់ភាពងាយស្រួលក្នុងការទទួលយន្តហោះធំៗមកពីក្រៅប្រទេស។

គិតត្រឹមរយៈពេល ៦ខែ នៃឆ្នាំ២០១៨ ភ្ញៀវជាតិ និងអន្តរជាតិ ដែលធ្វើដំណើរតាមយន្តហោះមកកាន់កម្ពុជា មានចំនួន ៥លាន១សែននាក់ កើនឡើង ២៤% បើប្រៀបធៀបនឹងរយៈពេលដូចគ្នាកាលពីឆ្នាំ ២០១៧។ ក្នុងនោះភ្ញៀវដែលធ្វើដំណើរតាមព្រលានយន្តហោះអន្តរជាតិភ្នំពេញ មានចំនួន ២លាន ៦សែននាក់។ នេះបើតាមការឱ្យដឹងពីលោក ពេជ្រ សុប៉ុនតារា ប្រធានផ្នែកពង្រីកការហោះហើរនៅព្រលានយន្តហោះកម្ពុជា កាលពីខែកក្កដាកន្លងទៅ៕

អត្ថបទ៖ សំភី