ព្រឹទ្ធាចារ្យចាប៉ី​ដងវែង​ លោកតា ប្រាជ្ញ ឈួន ទទួលមរណភាព

  • 2018-11-17 01:31:32
  • ចំនួនមតិ 0 | ចំនួនចែករំលែក 100

ចន្លោះមិនឃើញ

ព្រឹទ្ធភិរម្យវោហាសាស្រ្ត​ ប្រាជ្ញ​ ឈួន​ បាន​ទទួល​មរណភាព​ហើយ​នៅ​វេលា​ម៉ោង ១:៣០​ នាទីរំលងអាធ្រាត្រ ឈាន​ចូល​ថ្ងៃទី១៧ ខែវិច្ឆិកា ឆ្នាំ២០១៨ ដោយ​រោគា​ពាធ ក្នុង​ព្រះ​ជន្ម៨២​ឆ្នាំ នៅ​មន្ទីរពេទ្យ​កាល់​ម៉ែត្រ។

លោកតា ប្រាជ្ញ ឈួន ជា​ស្ដេចបាប៉ីដងវែង របស់ខ្មែរ (រូបថត៖ RFA)

បើ​តាម​ទំព័រហ្វេសប៊ុក​ឈ្មោះ វត្តបទុមវតីរាជវរារាម សពស្តេចចាប៉ី ប្រាជ្ញ ឈួន បានដឹកចេញពីមន្ទីរពេទ្យកាលម៉ែត្រ យកមកតម្កល់ទុកនៅសាលាធម្មសភាវត្តបទុមវតី​ សង្កាត់ចតុមុខ​ ខណ្ឌដូនពេញ​ រាជធានីភ្នំពេញ​ ដើម្បីប្រារព្ធធើ្វបុណ្យតាមប្រពៃណីព្រះពុទ្ធសាសនា។

ព្រឹទ្ធាចារ្យ​ចាប៉ី​ដង​វែង លោក​តា​ភិរម្យ ប្រាជ្ញ ឈួន មាន​ស្រុក​កំណើត​នៅភូមិ​ត្រពាំង​កក់ ឃុំខ្វាង ស្រុកទ្រាំង ខេត្ត​តាកែវ។ លោក​មាន​កូនចំនួន​៥នាក់។ មុនទទួល​មរណភាព លោក​ត្រូវ​បាន​ក្រុម​គ្រួសារ​បញ្ជូន​ពី​ខេត្តតាកែវ មក​សង្គ្រោះ និង​សម្រាក​ព្យាបាល​នៅ​មន្ទីរពេទ្យ​កាល់ម៉ែត កាលពីថ្ងៃទី៩ ខែវិច្ឆិកា ឆ្នាំ២០១៨។

លោក​តា ប្រាជ្ញ ឈួន ​ចាប់​កំណើត​នៅ​ខែ​តុលា​ឆ្នាំ​១៩៣៦។ លោកតា ជា​កូន​ពៅ​ក្នុង​គ្រួសារ​កសិករ​ ដែល​មាន​កូន ៦នាក់។ ក្នុង​វ័យ៩ឆ្នាំ លោក​តា បាន​ចាប់​ផ្តើម​រៀន​ចាប៉ី​​ពី​ឪពុក​មារ។

សូមជម្រាបថា លោកព្រឹទ្ធាចារ្យសិល្ប:ភិរម្យវោហារ ប្រាជ្ញ ឈួន ត្រូវបានក្រសួងវប្បធ៌មនិងវិចិត្រសិល្បៈ ចាត់ចូលជា សម្បត្តិបេតិកភណ្ឌ័មនុស្សរបស់កម្ពុជា និងអង្គការយូណេស្កូ ដោយសារទេពកោសល្យក្នុងការប្រើប្រាស់ពាក្យពេជ្រ និងកេរ្ត៍ឈ្មោះ ល្បីល្បាញតាមរយៈចម្រៀងចាប៉ីដងវែងជាច្រើនទសវត្សមកហើយនៅព្រះរាជាណាចក្រកម្ពុជា។

នៅថ្ងៃទី២៩ ខែកញ្ញា ឆ្នាំ២០១៧ ក្នុងឱកាសដែលសម្តេច ហ៊ុន សែន អញ្ជើញសំណេះសំណាល និងបំពាក់គ្រឿងឥស្សរិយយស ជូនព្រឹទ្ធាចារ្យកោសល្យវោហារ គង់ ណៃ នោះ លោកតា ប្រាជ្ញ ឈួន បានបង្ហើបសំនៀងយ៉ាង ក្រអួនក្រអៅជាសាធារណៈដ៏កម្រ បន្ទាប់ពីលោកតាបានឈប់ច្រៀងចាប៉ីអស់ជាច្រើនឆ្នាំដោយសារតែបញ្ហាសុខភាព។ នៅក្នុងកម្មវិធីនោះ សម្តេច ហ៊ុន សែន ក៏បានបំពាក់មេដាយកិត្តិយស «មុនីសារភ័ណ្ឌ ថ្នាក់មហាសេរីវឌ្ឍន៍» និងផ្តល់ឋានៈ ស្មើនឹងថ្នាក់ អគ្គនាយក ជូនលោកតា ដែលទទួលបានប្រាក់ខែពីរាជរដ្ឋាភិបាល ដើម្បីជាការតបស្នង ចំពោះស្នាដៃរបស់លោក ជាមរតកមនុស្សរស់ដែលបានប្រឹងប្រែងលើកស្ទួយសិល្បៈចាប៉ីដងវែងរបស់កម្ពុជា៕


អត្ថបទ៖ លាភ.