កម្ពុជា ជំរុញឱ្យជប៉ុន និងកូរ៉េ វិនិយោគលើការអភិវឌ្ឍខ្សែចង្វាក់តម្លៃដំឡូងមី និងកសិផលផ្សេងៗទៀត
- 2018-11-25 02:14:56
- ចំនួនមតិ 0 | ចំនួនចែករំលែក 0
កម្ពុជា ជំរុញឱ្យជប៉ុន និងកូរ៉េ វិនិយោគលើការអភិវឌ្ឍខ្សែចង្វាក់តម្លៃដំឡូងមី និងកសិផលផ្សេងៗទៀត
ចន្លោះមិនឃើញ
រដ្ឋមន្រ្តីក្រសួងពាណិជ្ជកម្ម លោក ប៉ាន សូរស័ក្តិ បានជំរុញឱ្យប្រទេសជប៉ុន និងកូរ៉េខាងត្បូង ធ្វើការវិនិយោគលើការអភិវឌ្ឍខ្សែចង្វាក់តម្លៃដំណាំដំឡូងមី និងកសិផលផ្សេងទៀត មានដូចជា ស្រូវ ពោត សណ្តែក និងឈើហូបផ្លែ ដើម្បីពង្រីកវត្តមានផលិតផលខ្មែរនៅលើទីផ្សារ និងជំរុញការនាំចេញរបស់កម្ពុជា ទៅកាន់ទីផ្សារអន្តរជាតិឱ្យបានអតិបរមា។
សំណើខាងលើនេះ ត្រូវបានធ្វើឡើងក្នុងឱកាសដែលលោក ប៉ាន សូរស័ក្តិ ដឹកនាំប្រតិភូចូលរួមកម្មវិធី “A Small-Business-Group Seated Dinner” រៀបចំឡើងដោយស្ថានទូតជប៉ុនប្រចាំទីក្រុងប៉ារីស ប្រទេសបារាំង កាលពីថ្ងៃទី២២ ខែវិច្ឆិកា ឆ្នាំ២០១៨ ក្នុងគោលបំណងចែករំលែកព័ត៌មានផ្សេងៗ ទាក់ទងនឹងវិស័យសេដ្ឋកិច្ច ពាណិជ្ជកម្ម ការទូត កសិកម្ម វប្បធម៌ និងទេសចរណ៍។ កម្មវិធីនេះ ត្រូវបានដឹកនាំដោយ លោក Manatsu ICHINOKI អគ្គលេខាធិការ នៃលេខាធិការដ្ឋាន គណៈកម្មការរៀបចំពិព័រណ៍ពិភពលោកជប៉ុន ឆ្នាំ២០២៥ និងមានការចូលរួមពីអង្គទូតនៃប្រទេសបារាំង កូរ៉េ ប៊ែលហ្សិក និងបុគ្គលិកលេធិការដ្ឋាន ប្រមាណជាង ១៥នាក់។
បន្ថែមលើនេះ លោក ប៉ាន សូរស័ក្តិ ក៏បានពន្យល់ភ្ញៀវកិត្តិយសទាំងអស់ អំពីអត្ថប្រយោជន៍នៃគោលនយោបាយគាំពារវិនិយាគរបស់កម្ពុជា និងការលើកទឹកចិត្តផ្សេងៗរបស់រាជរដ្ឋាភិបាល ដូចជា ការលើកលែងពន្ធលើប្រាក់ចំណេញ និងពន្ធលើការនាំចូលសម្ភារៈ និងឧបករណ៍កសិកម្ម ក៏ដូចជាសក្តានុពលនៃវិស័យវប្បធម៌ និងទេសចរណ៍ធម្មជាតិ។
ជាការឆ្លើយតប លោកអគ្គលេខាធិការ Manatsu ICHINOKI និងអង្គទូតទាំងអស់ ដែលមានវត្តមាននៅក្នុងកម្មវិធី បានសម្តែងការសាទរចំពោះកំណើនសេដ្ឋកិច្ចរបស់កម្ពុជា ហើយ បានសន្យាថា នឹងពាំនាំយកសំណើរបស់រដ្ឋមន្ត្រីកម្ពុជា ទៅជម្រាបរដ្ឋាភិបាលរបស់ខ្លួន ព្រមទាំងជួយផ្សព្វផ្សាយអំពីសក្តានុពលរបស់កម្ពុជា ទៅដល់វិស័យឯកជនថែមទៀត ដើម្បីឱ្យចូលទៅបណ្តាក់ទុនកាន់ច្រើននៅក្នុងប្រទេសកម្ពុជាផងដែរ៕