វៀតណាម ដាក់ផែនការ១ ដើម្បីធ្វើកំណែទម្រង់ឧស្សាហកម្មស្វាយចន្ទី

2018-11-26 03:27:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងកសិកម្ម និងអភិវឌ្ឍន៍ជនបទរបស់វៀតណាម បានដាក់ចេញផែនការកំណែទម្រង់ឧស្សាហកម្មស្វាយចន្ទី ដោយបង្កើនការផលិតឲ្យបាន ៥០% ក្នុងនោះ វៀតណាមត្រូវឆ្លើយតបនឹងស្ដង់ដារដោយប្រើប្រាស់ជីសរីរាង្គ។ នេះបើតាមវេបសាយ Vietnam Plus ចុះផ្សាយកាលពីថ្ងៃទី២៥ ខែវិច្ឆិកា ឆ្នាំ២០១៨។

កម្មការិនីវៀតណាម ធ្វើការរបស់ពួកគេនៅរោងចក្រកែច្នៃគ្រាប់ស្វាយចន្ទី ដើម្បីនាំចេញ (រូបថត៖ Vietnam News)

តាម Vietnam Plus វិទ្យាស្ថានវិទ្យាសាស្ត្រកសិកម្ម សម្រាប់តំបន់ឆ្នេរភាគខាងត្បូងវៀតណាម ហៅកាត់ ASISOV បានឲ្យដឹងថា ក្នុង១ហិកតា កសិករវៀតណាមអាចផលិតគ្រាប់ស្វាយចន្ទីបានជាង ១,៥តោន។ ទន្ទឹមនេះ សមាគមស្វាយចន្ទីវៀតណាម បានស្នើក្រសួងកសិកម្មវៀតណាម សហការជាមួយប្រទេសកម្ពុជា ក្នុងការដាំដុះស្វាយចន្ទី ដើម្បីនាំចូលគ្រាប់ស្វាយចន្ទី។

ក្នុងកិច្ចសហការនេះ កម្ពុជា យល់ព្រមអនុវត្តឲ្យក្រុមហ៊ុនវៀតណាម អភិវឌ្ឍតំបន់ដាំដុះស្វាយចន្ទីក្នុងផ្ទៃដីទំហំ ៥០ម៉ឺនហិកតា ដោយរំពឹងថា អាចផលិតគ្រាប់ស្វាយចន្ទីបាន ១លានតោន ដើម្បីនាំទៅកាន់វៀតណាម ក្នុងមួយឆ្នាំៗ។

បើតាមក្រសួងដដែល វៀតណាម អាចកែច្នៃគ្រាប់ស្វាយចន្ទីឲ្យក្លាយជាផលិតផលសម្រេចបាន ១,៨លានតោនក្នុងមួយឆ្នាំ។ គ្រាប់ស្វាយចន្ទីសម្រាប់កែច្នៃ ប្រមាណ ៧០% ត្រូវបាននាំចូលពីក្រៅប្រទេស ហើយវៀតណាមមាន រោងចក្រកែច្នៃគ្រាប់ស្វាយចន្ទីជាង ៤៨០រោងចក្រ។

គិតត្រឹមពាក់កណ្ដាលខែតុលា ឆ្នាំ២០១៨ វៀតណាមនាំចេញគ្រាប់ស្វាយចន្ទីសម្រេច បាន ២៨៦០០០ តោន (កើន ៤,៨% ធៀបនឹងឆ្នាំមុន) ស្មើទឹកប្រាក់ ២,៧ពាន់លានដុល្លារអាមេរិក (ធ្លាក់ចុះ ១,៨% ធៀបនឹងឆ្នាំមុន)។ ទីផ្សារសំខាន់ៗ ដែលវៀតណាមនាំចេញ មានដូចជា អាមេរិក ចិន ហុល្លង់ អាល្លឺម៉ង់ និងកាណាដា៕

អត្ថបទទាក់ទង