ចិន នឹងយកយន្តហោះមកយកក្រុមជំរិតទារប្រាក់ ២៣៥នាក់ពីកម្ពុជា

2018-11-28 03:27:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកឧត្ដមសេនីយ៍ អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ បានថ្លែងប្រាប់ [ខ្លីៗ] នៅព្រឹកថ្ងៃទី២៨វិច្ឆិកានេះថា ប៉ូលិសចិន នឹងយកយន្តហោះពិសេសមកយកជនជាតិចិនចំនួន ២៣៥នាក់ ពាក់ព័ន្ធករណីជំរិតទារប្រាក់តាមប្រព័ន្ធ VOIP ពីប៉ូលិសកម្ពុជា នៅក្នុងរយៈពេលពីរសប្ដាហ៍ទៀត។

ជនជាតិចិន ត្រូវបានបញ្ជូនត្រឡប់ទៅកាន់ប្រទេសរបស់ពួកគេវិញ តាមយន្តហោះរបស់ចិន កាលពីខែកក្កដា ឆ្នាំ២០១៨

លោកឧត្ដមសេនីយ៍ អ៊ុក ហៃសីឡា បានបញ្ជាក់ថា បច្ចុប្បន្ននេះ ជនជាតិចិនទាំង ២៣៥នាក់ កំពុងតែស្ថិតនៅអគ្គនាយកដ្ឋានអន្តោប្រវេសន៍។

សូមជម្រាបថា ប៉ូលិសកម្ពុជាបានបង្ក្រាបក្រុមសង្គមងងឹតចិនចំនួន ២៣៥នាក់ ពាក់ព័ន្ធនឹងករណីជំរិតទារប្រាក់តាមប្រព័ន្ធ VOIP ទៅប្រទេសចិន ដោយយកកម្ពុជាធ្វើជាមូលដ្ឋាន។ ការបង្ក្រាបនេះ បានធ្វើឡើងកាលពីថ្ងៃទី២៦ ខែវិច្ឆិកា ឆ្នាំ២០១៨ នៅស្រុកត្រាំកក់ និងស្រុកបាទី ខេត្តតាកែវ។

លោកឧត្ដមសេនីយ៍ អ៊ី សុខឃី ប្រធាននាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន បានប្រាប់ [ខ្លីៗ] កាលពីព្រលប់ថ្ងៃទី២៦វិច្ឆិកាថា ករណីបង្ក្រាបនេះ សមត្ថកិច្ចឃាត់ខ្លួនជនជាតិចិនចំនួន ២៣៥នាក់ ក្នុងនោះមានស្រីចំនួន ៣៥នាក់ ទាក់ទងនឹងការជំរិតទារប្រាក់តាមប្រព័ន្ធ VOIP ទៅក្រៅប្រទេស គឺទៅប្រទេសចិន។

សេចក្តីរាយការណ៍បានឲ្យដឹងថា ការបង្ក្រាបនេះស្ថិតនៅស្រុកត្រាំកក់ និងស្រុកបាទី ខេត្តតាកែវ ដោយនៅ ៤ទីតាំងផ្សេងៗគ្នា ក្នុងនោះ

ទីតាំងទី១៖ ស្ថិតនៅភូមិបុស្សតាផង់ ឃុំត្រពាំងក្រញូង ស្រុកត្រាំកក់ ឃាត់ខ្លួនជនជាតិចិនចំនួន ៦៣នាក់ ស្រី ៧នាក។
ទីតាំងទី២៖ ស្ថិតនៅភូមិបុស្សតាផង់ ឃុំត្រពាំងក្រញូង ស្រុកត្រាំកក់ ឃាត់ខ្លួនជនជាតិចិន ចំនួន ១២នាក់ (ប្រុស)។
ទីតាំងទី៣៖ ស្ថិតនៅភូមិតាំងដូង ឃុំតាំងដូង ស្រុកបាទី ឃាត់ខ្លួនជនជាតិចិន ចំនួន ៧០នាក់ ស្រី ២៤នាក់។
ទីតាំងទី៤៖ ស្ថិតនៅភូមិព្រៃក្រាយ ឃុំតាំងដូង ស្រុកបាទី ឃាត់ខ្លួនជនជាតិចិនចំនួន ៩០នាក់ ស្រី ០៥នាក់ សរុបទាំង ០៤ទីតាំង ចំនួន ២៣៥នាក់ ស្រី ៣៦នាក់៕