ទាហានកូរ៉េខាងជើង រត់ចូលកូរ៉េខាងត្បូង ក្រោយស្ថានភាពព្រំដែនធូរស្រាល

2018-12-01 04:43:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ទាហានកូរ៉េខាងជើងម្នាក់ បានរត់គេចទៅកាន់កូរ៉េខាងត្បូង តាមរយៈតំបន់គ្មានយោធា ចំណុចព្រំដែនកូរ៉េទាំងពីរ នៅថ្ងៃសៅរ៍ ទី១ ខែធ្នូ ឆ្នាំ២០១៨នេះ។ ការរត់គេចនេះ គឺបន្ទាប់ពីប៉ុស្តិ៍យាមជាច្រើននៅតាមព្រំដែន ត្រូវបានបំផ្លាញចោល នៅក្នុងសប្ដាហ៍នេះ។

ទាហានយាមនៅព្រំដែនកូរ៉េទាំងពីរ (រូបថត៖ Strait Time)

សេចក្ដីថ្លែងការណ៍មួយរបស់កូរ៉េខាងត្បូង បានឲ្យដឹងថា ទាហានកូរ៉េខាងជើងដែលបានរត់គេចនោះ ត្រូវបានឃាត់ខ្លួន និងកំពុងស្ថិតក្នុងការសាកសួរពីសេចក្ដីលម្អិតជុំវិញការរត់គេចមកកូរ៉េខាងត្បូង។ ប្រភពដដែលបន្តថា មិនមានសកម្មភាពមិនប្រក្រតីណាមួយ ពីកងកម្លាំងកូរ៉េខាងជើងនៅព្រំដែនឡើយ។

ការរត់គេចរបស់ទាហានកូរ៉េខាងជើងនេះ គឺក្រោយពី ប្រទេសទាំងពីរបានអនុវត្តកិច្ចព្រមព្រៀមមួយដែលចុះកាលពីខែកញ្ញាកន្លងទៅ ដើម្បីកាត់បន្ថយភាពតានតឹងនៅតំបន់ព្រំដែន។ ក្រសួងការពារជាតិកូរ៉េខាងត្បូង បានឲ្យដឹងកាលពីថ្ងៃទី៣០វិច្ឆិកាថា ប៉ុស្តិ៍យាមចំនួន ២០ នៅព្រំដែនត្រូវបានកម្ទេចចោល។

ប៉ុស្តិ៍យាមមួយ ត្រូវបានកម្ទេចចោល នៅព្រំដែនកូរ៉េទាំងពីរ (រូបថត៖ Telegraph)

សូមជម្រាបថា ហេតុការណ៍រត់គេចស្រដៀងគ្នានេះ ធ្លាប់កើតមានលើកចុងក្រោយកាលពីខែវិច្ឆិកា ឆ្នាំ២០១៧ ដោយទាហានកូរ៉េខាងជើងម្នាក់ ត្រូវបានរងរបួសធ្ងន់ធ្ងរនៅពេលព្យាយាមរត់គេចពីគ្រាប់កាំភ្លើងរបស់ទាហានកូរ៉េខាងជើងផ្សេងទៀតដែលបាញ់តម្រង់មកលើរូបគេ។

យ៉ាងហោចណាស់ មានទាហានកូរ៉េខាងជើង ៣ម៉ឺននាក់ បានរត់គេចចូលទៅរស់នៅកូរ៉េខាងត្បូង ដែលភាគច្រើនរត់គេចចូលតាមច្រកព្រំដែនប្រទេសចិន ដោយសារតែតំបន់ព្រំដែនកូរ៉េទាំងពីរ មានបង្កប់គ្រាប់មីន និងខ្សែលួស ពិបាកឆ្លង៕

ប្រភព៖ telegraph ប្រែសម្រួល៖ លាភ.