សម្តេច ហេង សំរិន៖ ចលនា២ធ្នូ ជាមេរៀនសម្រាប់កម្ពុជា កុំឱ្យធ្លាក់ក្នុងសង្គ្រាមទៀត
- 2018-12-02 04:08:22
- ចំនួនមតិ 0 | ចំនួនចែករំលែក 0
សម្តេច ហេង សំរិន៖ ចលនា២ធ្នូ ជាមេរៀនសម្រាប់កម្ពុជា កុំឱ្យធ្លាក់ក្នុងសង្គ្រាមទៀត
ចន្លោះមិនឃើញ
សម្តេច ហេង សំរិន បានលើកឡើងថា ថ្ងៃទី២ធ្នូ ១៩៧៨ មិនត្រឹមតែជាថ្ងៃដែលកម្ពុជា បោះជំហានចេញពីភាពហិនហោចខ្លោចផ្សា និងមិនត្រឹមតែបានបង្ហាញពីស្មារតីលះបង់ និងការរួបរួមកម្លាំងអ្នកតស៊ូស្នេហាជាតិប៉ុណ្ណោះទេ ប៉ុន្តែក៏បានក្លាយទៅជាកញ្ចក់ប្រវត្តិសាស្រ្តដ៏សំខាន់ផងដែរ សម្រាប់កម្ពុជាយកធ្វើជាមេរៀន កុំឲ្យភ្លាំងភ្លាត់ធ្លាក់ក្នុងសង្គ្រាមជាថ្មីទៀត។ ការថ្លែងនេះធ្វើឡើងពីពិធីអបអរសាទរខួបអនុស្សាវរីយ៍លើកទី៤០ នៃថ្ងៃបង្កើតរណសិរ្សសាមគ្គីអភិវឌ្ឍន៍មាតុភូមិកម្ពុជា (ពីមុនឈ្មោះថា "រណសិរ្សសាមគ្គីសង្គ្រាះជាតិកម្ពុជា") នាព្រឹកថ្ងៃទី២ ធ្នូ ឆ្នាំ២០១៨ នៅវិមានអនុស្សាវរីយ៍២ធ្នូ ក្នុងស្រុកស្នួល ខេត្តក្រចេះ។
សម្តេច ហេង សំរិន ដែលជាប្រធានស្ថាបនិកនៃរណសិរ្សនេះ បានបញ្ជាក់ថា ការប្រារព្ធខួបអនុស្សាវរីយ៍លើកទី៤០នេះ គឺក្នុងស្មារតីរំលឹកការចងចាំជានិច្ចនូវ គុណូបការៈដ៏ឧត្តុង្គឧត្តមរបស់វីរកម្មាភិបាល យុទ្ធជន យុទ្ធនារី នៃរណសិរ្សសាមគ្គីសង្រ្គោះជាតិកម្ពុជា និងវីរកងទ័ពស្ម័គ្រចិត្តវៀតណាម ដែលបានបូជា សាច់ស្រស់ឈាមស្រស់ក្នុងបុព្វហេតុប្រយុទ្ធផ្តួលរំលំរបបប្រល័យពូជសាសន៍ប៉ុលពត។
ជាមួយគ្នានេះ សម្តេចប្រធានរដ្ឋសភា បានអំពាវនាវឱ្យប្រជាពលរដ្ឋ ពិសេសយុវជនកម្ពុជាទំាងអស់ចងចាំថា សន្តិភាពគឺជាកត្តាមូលដ្ឋានគ្រឹះ ដើម្បីធានាដល់ដំណើររីកចម្រើននៃលទ្ធិប្រជាធិបតេយ្យ និងសិទ្ធិមនុស្ស ធានាការអភិវឌ្ឍប្រកបដោយចីរភាព សមធម៌ និងធានានូវជីវភាពរស់នៅដ៏សុខសាន្ត ប្រកបដោយកិត្តិយសរបស់ប្រជាជនកម្ពុជា។ «បើយើងបាត់បង់សន្តិភាព នោះយើងនឹងត្រូវបាត់បង់អ្វីៗទាំងអស់។ ម្យ៉ាងទៀត ទម្រាំប្រទេសជាតិមានសុខសន្តិភាព និងការអភិវឌ្ឍដែលកើតមានដូចពេលនេះ គឺយើងបានឆ្លងកាត់អស់រាប់សតវត្សរ៍នូវរឿងរ៉ាវមហាទុក្ខសោកវេទនាជាទីបំផុត»។
សូមជម្រាបថា ជាផ្នែកមួយនៃការចូលរួមអបអរសាទរថ្ងៃបង្កើតរណសិរ្ស២ធ្នូនេះ សហភាពសហព័ន្ធយុវជនកម្ពុជា បានរៀបចំព្រឹត្តិការណ៍ដើរ “៤០គីឡូម៉ែត្រទៅកាន់ប្រវត្តិសាស្រ្ត” ផងដែរ ដែលជាព្រឹត្តិការណ៍មួយយុវជនប្រមាណជាង ៧០០នាក់ បានចូលរួម ដោយធ្វើសកម្មភាពដើររយៈពេល២ថ្ងៃ កាត់ទឹក ឆ្លងព្រៃ ទំាងយប់ទំាងថ្ងៃ ដើម្បីស្វែងយល់ ពីដំណើរតស៊ូរបស់យុវជនខ្មែរសម័យនោះ។ ព្រឹត្តិការណ៍នេះ បានធ្វើពីថ្ងៃទី២៩ ខែវិច្ឆិកា ដល់ថ្ងៃទី១ ខែធ្នូ ដោយចុងបញ្ចប់ គឺជួបជុំគ្នានៅវិមានអនុស្សាវរីយ៍២ធ្នូនេះតែម្តង៕