តើរទេះគោខ្មែរ អាចនឹងក្លាយជាទំនិញអេតចាយឬ នាពេលអនាគត?

2018-12-04 03:07:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

“អាចដែរ បើអត់មានអ្នកណាជួយគិតគូរ ថែរក្សាអី...” ។ នេះគឺជាការលើកឡើងរបស់ លោក នីម សំអឿន អ្នកទទួលទិញទំនិញអេតចាយដ៏ធំ នៅភូមិស្នោ ឃុំត្រពាំងប្ញស្សី ស្រុកកំពង់ស្វាយ ខេត្តកំពង់ធំ កាលពីពេលថ្មីៗនេះ ឆ្លើយតបទៅនឹងសំណួរដែលថា "តើរទេះគោខ្មែរ អាចនឹងក្លាយជាទំនិញអេតចាយឬ នាពេលអនាគត?"

ថៅកែអេតចាយវ័យ ៤០ឆ្នាំរូបនេះ បានឱ្យដឹងថា លោកបានចាប់ផ្តើមទិញរទេះគោចាស់ៗ ពីប្រជាកសិករ តាំងពីដើមឆ្នាំ២០១៧ មកម៉្លេះ។ កាលដំបូង លោកចុះទៅទិញដល់ផ្ទះអ្នកស្រុក តែពេលនេះ លោកនៅចាំទទួលទិញ ពីកូនកញ្ឆេរ (អ្នកដើរទិញអេតចាយតាមភូមិ) ឬទិញពីអ្នកស្រុកដែលយកមកលក់ឱ្យលោកដល់ផ្ទះវិញ។

លោក នីម សំអឿន

លោករំលឹកថា កាលពីច្រើនឆ្នាំកន្លងទៅ លោកធ្លាប់ទិញរទេះគោចាស់ៗ យកទៅលក់ឱ្យឈ្មួញ ដែលយកទៅលក់បន្តនៅប្រទេសថៃ។ តែបច្ចុប្បន្ន លោកលក់ឱ្យតែអ្នកក្នុងស្រុក ដែលគេទិញទៅតាំងលម្អតាមផ្ទះ តាមវីឡា តាមហាង ឬតាមរមណីយដ្ឋានតែប៉ុណ្ណោះ។ អ្នកដែលមកទិញរទេះគោរបស់លោក មានមកពីគ្រប់ខេត្តក្នុងប្រទេសកម្ពុជា។

ថៅកែជើងចាស់រូបនេះ បន្តទៀតថា មូលហេតុដែលនាំឱ្យប្រជាកសិករនាំគ្នាលក់រទេះគោចាស់ៗ ព្រោះពួកគេឈប់ប្រើរទេះគោ និងសត្វពាហនៈជាកម្លាំងអូសទាញទៀតហើយ ។ ឥឡូវគេប្រើតែគោយន្តតែប៉ុណ្ណោះ ហើយរទេះគោត្រូវពួកកសិករបោះបង់ចោល។

ចំពោះតម្លៃរទេះគោវិញ លោក នីម សំអឿន ប្រាប់ថា រទេះគោចាស់ៗ លោកទិញក្នុងតម្លៃពី ៣០ម៉ឺនរៀល ទៅ៤០ម៉ឺនរៀល ហើយលក់ទៅវិញក្នុងតម្លៃពី ៤០ម៉ឺនរៀល ទៅ៥០រៀល។ ចំណែកកង់រទេះចាស់ៗលោកទិញ ក្នុងតម្លៃពី៣ម៉ឺនរៀល ទៅ៤ម៉ឺនរៀលក្នុងកង់មួយ ហើយលក់ទៅវិញ ក្នុងតម្លៃពី ៧ម៉ឺន ទៅ៨ម៉ឺនរៀល។

បច្ចុប្បន្នថៅកែអេតចាយរូបនេះ មានរទេះគោចាស់ៗជិត១០០រទេះ និង កង់រទេះរាប់ពាន់កង់៕