រដ្ឋមន្ត្រីវប្បធម៌ លើកបញ្ហាប្រឈម ៤យ៉ាង នៅរមណីយដ្ឋានអង្គរ
- 2018-12-05 03:24:53
- ចំនួនមតិ 0 | ចំនួនចែករំលែក 0
រដ្ឋមន្ត្រីវប្បធម៌ លើកបញ្ហាប្រឈម ៤យ៉ាង នៅរមណីយដ្ឋានអង្គរ
ចន្លោះមិនឃើញ
លោកស្រី ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងជាប្រធានអាជ្ញាធរជាតិអប្សរា បានមានប្រសាសន៍ថា បច្ចុប្បន្នរមណីយដ្ឋានបេតិកភណ្ឌពិភពលោក-អង្គរ លែងប្រឈមនឹងបញ្ហាអសន្តិសុខ ប្រាង្គប្រាសាទដួលរលំ ឬការលួចវត្ថុបុរាណទៀតហើយ តែជួបប្រទះនឹងបញ្ហាប្រឈមដូចជា ការប្រែប្រួលអាកាសធាតុ ការបំពុលបរិស្ថាន ការគ្រប់គ្រងការតាំងទីលំនៅថ្មីនៅក្នុងតំបន់ការពារនៃរមណីយដ្ឋានអង្គរ ការគ្រប់គ្រងលំហូរភ្ញៀវទេសចរជាដើម។
រដ្ឋមន្ត្រីក្រសួងវប្បធម៌ បានឲ្យដឹងថា វាជារឿងល្អ ដែលកម្ពុជាមានក្រមប្រតិបត្តិអង្គរសម្រាប់ឲ្យភ្ញៀវទេសចរគ្រប់ជាតិសាសន៍ គោរពតាម និងមានអង្គការធានាគុណភាពជប៉ុន (JQA) ដែលតែងធ្វើសវនកម្មផ្ទៃក្នុង/ក្រៅ លើផ្នែកគ្រប់គ្រងប្រព័ន្ធបរិស្ថាននៅតំបន់អង្គរ រហូតទទួលបានវិញ្ញាបនបត្រ ធានាគុណភាពជប៉ុន ដល់ទៅ ៥លើកសម្រាប់អាជ្ញាធរជាតិអប្សរា។ ប៉ុន្តែទោះជាយ៉ាងណាក៏កម្ពុជា នៅតែបារម្ភនិងបន្តការខិតខំរកដំណោះស្រាយបន្តទៅទៀត លើបញ្ហាទាំងនេះ។
ទាក់ទងនឹងការលើកឡើងពីបញ្ហាប្រាសាទលែងប្រឈមនឹងបញ្ហាគ្រោះថ្នាក់នោះ លោកស្រីក៏បានឲ្យដឹងថា វាជាការផ្តើមចេញដ៏ល្អពីកិច្ចសហប្រតិបត្តិការជាតិ និងអន្តរជាតិ ចេញពីឫសគល់នៃក្តីស្រឡាញ់ និងស្មារតីនៃការថែរក្សាតំបន់អង្គរ ដែលគ្រប់គ្នាចាត់ទុកថា ជាសម្បត្តិបេតិកភណ្ឌពិភពលោក ដែលមនុស្សជាតិទាំងអស់ត្រូវនាំគ្នាថែរក្សា។ ជាពិសេស គឺបានមកពីគណៈកម្មាធិការអាយស៊ីស៊ី-អង្គរ ដែលជាយន្តការអន្តរជាតិដើម្បីកៀងគរធនធានថវិកា ជំនាញបច្ចេកទេស និងធនធានមនុស្សពីសហគមន៍អន្តរជាតិដើម្បីធ្វើការជួសជុល អភិរក្ស និងលើកតម្លៃប្រាសាទនានា ក៏ដូចជាការអភិវឌ្ឍរមណីយដ្ឋានបេតិកភណ្ឌពិភពលោក-អង្គរនិងត្រូវការធនធានច្រើនក្នុងការអនុវត្តកិច្ចការនេះ៕