កម្ពុជា-វៀតណាម នឹងចុះហត្ថលេខាលើឯកសារ៦ ទាក់ទងនឹងការពង្រឹងកិច្ចសហប្រតិបត្តិការសេដ្ឋកិច្ច

2018-12-05 03:53:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រទេសកម្ពុជា និងវៀតណាមនឹងចុះហត្ថលេខាលើឯកសារចំនួន ៦ នៅក្នុងដំណើរទស្សនកិច្ចផ្លូវការរបស់សម្តេចតេជោហ៊ុនសែនទៅ កាន់ប្រទេសវៀតណាម ។ ឯកសារទាំង៦នោះ ផ្តោតទៅលើកិច្ចសហប្រតិបត្តិការលើវិស័យដឹកជញ្ជូនផ្លូវគោក ផ្លូវទឹក ផ្លូវអាកាស វិស័យអប់រំ ការបោះបង្គោលព្រំដែន និងការសម្រួលពាណិជ្ជកម្ម។ នេះបើយោងតាមការឲ្យដឹងរបស់លោក ស្រ៊ី ថាមរុង្គ រដ្ឋមន្ត្រីប្រតិភូអមនាយករដ្ឋមន្ត្រី។

សម្ដេច ហ៊ុន សែន នាយករដ្ឋមន្រ្តីកម្ពុជា ចាប់ដៃជាមួយលោក ង្វៀន សួនហ្វុក នាយករដ្ឋមន្រ្តីវៀតណាម អំឡុងកិច្ចប្រជុំមួយ នៅរាជធានីភ្នំពេញ នាពេលកន្លងមក/ រូបភាព៖ ហ្វេសប៊ុកផេកសម្ដេច ហ៊ុន សែន

តបតាមការអញ្ជើញរបស់លោក ង្វៀន សួនហ្វុក (Nguyen Xuan Phuc) នាយករដ្ឋមន្ត្រីនៃសាធារណរដ្ឋសង្គមនិយមវៀតណាម នៅព្រឹកថ្ងៃទី៧ ខែធ្នូ ២០១៨ ខាងមុខនេះ សម្តេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានឹងដឹកនាំគណៈប្រតិភូជាន់ខ្ពសរាជរដ្ឋាភិបាលកម្ពុជាអញ្ជើញទៅបំពេញទស្សនកិច្ចផ្លូវការនៅប្រទេសវៀតណាមពីថ្ងៃទី ៧ដល់៨ ខែធ្នូ។

សម្តេចនាយករដ្ឋមន្ត្រីក៏នឹងជួបពិភាក្សាការងារទ្វេភាគីជាមួយលោក ង្វៀន ស៊ុនហ្វ៊ូក នាយករដ្ឋមន្ត្រីវៀតណាមនៅព្រឹកថ្ងៃទី៧ ខែធ្នូ ។ បន្ទាប់ពីជំនួបនោះមេដឹកនាំនៃប្រទេសទាំងពីរក៏នឹងអញ្ជើញធ្វើជាសាក្សីក្នុងពិធីចុះហត្ថលេខាលើឯកសារចំនួន៦រួមមាន៖ ឯកសារចំនួន៣ទាក់ទងកិច្ចព្រមព្រៀងសហប្រតិ បត្តិការលើវិស័យដឹកជញ្ជូនផ្លូវគោក ផ្លូវទឹក និង ផ្លូវអាកាស។ ទី៤. កិច្ចព្រមព្រៀងស្តីពីផែនការកិច្ចសហប្រតិបត្តិការលើវិស័យអប់រំសម្រាប់ឆ្នាំ២០១៩ ។ ទី៥. ឯកសារស្តីពីកំណត់ហេតុនៃការបោះបង្គោលព្រំដែនរវាងប្រទេសទាំងពីរ និងទី៦. កិច្ចសម្របសម្រួលជំរុញពាណិជ្ជកម្មសម្រាប់ឆ្នាំ ២០១៨-២០១៩។

បើយោងតាមលោកស្រ៊ី ថាមរុង្គ កិច្ចសម្រួលពាណិជ្ជកម្មនេះ គឺនឹងធ្វើការកែប្រែលើការកំណត់ការប្រកាសពន្ធគយដែលកន្លងមកវៀតណាមបានស្នើ គឺទំនិញដែលមានតម្លៃត្រឹម ៥០០០ដុល្លារចុះមិនបាច់ប្រកាសពន្ធគយទេ តែលើកនេះកម្ពុជាស្នើសុំថាទំនិញក្រោម ១ម៉ឹនដុល្លារមិនចាំបាច់ប្រកាសពន្ធគយទេ។ ការធ្វើបែបនេះគឺដើម្បី សម្រួលដល់ប្រជាពលរដ្ឋទាំងពីរក្នុងការដោះដូរទំនិញគ្នាទៅវិញទៅមក ។

គួរបញ្ជាក់ថាទំហំពាណិជ្ជកម្មទ្វេភាគីរវាងកម្ពុជានិងវៀតណាមមានទំហំមានជាង ៣០០០លានដុល្លារនៅឆ្នាំ ២០១៨ ហើយរដ្ឋាភិបាលនៃប្រទសទាំងពីប្តេជ្ញាជំរុញឲ្យដល់ ៥០០០លានដុល្លារអាមេរិក៕

ប្រភព៖ រស្មីកម្ពុជា ប្រែសម្រួល៖ វាសនា