EU ៖ ការកំណត់ពន្ធលើអង្ករកម្ពុជា ស្ថិតក្នុងភាពមិនច្បាស់លាស់
- 2018-12-05 07:58:50
- ចំនួនមតិ 0 | ចំនួនចែករំលែក 0
EU ៖ ការកំណត់ពន្ធលើអង្ករកម្ពុជា ស្ថិតក្នុងភាពមិនច្បាស់លាស់
ចន្លោះមិនឃើញ
ប្រទេសសហភាពអឺរ៉ុបទាំង២៨ នៅថ្ងៃទី៤ ខែធ្នូ ឆ្នាំ២០១៨ បានបោះឆ្នោត ប៉ុន្ដែមិនមានសំឡេងគាំទ្រគ្រប់គ្រាន់លើដាក់ពន្ធការនាំចូលអង្ករពីប្រទេសកម្ពុជាទេ ចាប់ពីចាប់ពីដើមឆ្នាំ២០១៩ ខាងមុខ ដែលសហភាពអឺរ៉ុបមានបំណងកាត់បន្ថយការនាំចូលទៅក្នុងប្លុកមួយនេះ។
ក្នុងនោះ មានប្រទេសចំនួន៨ បានបោះឆ្នោតប្រឆាំង ខណៈប្រទេសចំនួន៧ ទៀត សម្រេចបោះឆ្នោតអនុបវាទ។ នេះបើតាម Khmertimes។
ប្រទេសអឺរ៉ុបភាគច្រើនបានគាំទ្រឲ្យមានការបង្កើតយន្តការគាំពារនានា សម្រាប់រយៈពេល ៣ឆ្នាំ ប៉ុន្ដែពុំមានមតិភាគច្រើនគ្រប់គ្រាន់ ដើម្បីសម្រេចលើយន្តការនេះ។
គណៈកម្មការសហភាពអឺរ៉ុប ដែលត្រួតពិនិត្យលើគោលនយោបាយពាណិជ្ជកម្មនៃសហភាពអឺរ៉ុបទាំង ២៨ប្រទេស បានបង្កើតយន្តការនានា ហើយអាចនៅតែអនុម័តលើយន្ដការទាំងអស់នេះ នៅពេលដែលគ្មានសំឡេងភាគច្រើនគ្រប់គ្រាន់ពីរដ្ឋសមាជិក ក្នុងសម្រេចជាឯកច្ឆន្ទ។
តាមគម្រោងគណៈកម្មការអឺរ៉ុបគ្រោងដាក់ពន្ធ ១៧៥អឺរ៉ូ (១៩៨,៣១ដុល្លារ) ក្នុងអង្ករមួយតោននៅឆ្នាំទី១ ហើយធ្លាក់មកនៅ ១៥០អឺរ៉ូ ក្នុងឆ្នាំទី២ និងនៅ ១២៥អឺរ៉ូនៅឆ្នាំទី៣។
ប្រទេសកម្ពុជាបានទទួលប្រយោជន៍ពីគម្រោងអនុគ្រោះពន្ធរបស់សហភាពអឺរ៉ុប "អ្វីគ្រប់យ៉ាងលើកលែងតែអាវុធ" ដែលអនុញ្ញាតឲ្យកម្ពុជានាំចេញទំនិញទៅកាន់សហភាពអឺរ៉ុប ដោយមិនជាប់ពន្ធ។
ប៉ុន្ដែកម្ពុជា រួមជាមួយមីយ៉ាន់ម់ា កំពុងប្រឈមនឹងការបាត់បង់នឹងការទទួលបានការអនុគ្រោះពន្ធពីប្លុកពាណិជ្ជកម្មដ៏ធំបំផុតក្នុងពិភពលោកនេះ លើបញ្ហាសិទ្ធិមនុស្ស។ ជាមួយគ្នានេះ គណៈកម្មការសហភាពអឺរ៉ុបបានបើកការស៊ើបអង្កេតលើការនាំចូលអង្ករលើកម្ពុជា និងមីយ៉ាន់ម៉ា ចាប់តាំងពីខែមីនា ២០១៨ ក្រោយទទួលបណ្ដឹងមួយពីប្រទេសអ៊ីតាលី ដែលជាប្រទេសផលិត និងផ្គត់ផ្គង់អង្ករដ៏ធំមួយនៅក្នុងសហភាពអឺរ៉ុបផងដែរ៕