រដ្ឋមន្ត្រីពាណិជ្ជកម្មឡាវ ស្នើឲ្យភាគីកម្ពុជា យកចិត្តទុកដាក់លើបញ្ហា២

2018-12-06 06:38:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋមន្ត្រីឧស្សាហកម្ម និងពាណិជ្ជកម្មឡាវ បានស្នើសុំភាគីកម្ពុជា ជាពិសេសវិស័យឯកជន បន្តជំរុញពាណិជ្ជកម្ម វិនិយោគនិងទេសចរណ៍នៅក្នុងប្រទេសឡាវ និងអភិវឌ្ឍហេដ្ឋារចនាសម្ព័ន្ធរូបវន្តនិងបណ្តាញអគ្គិសនីថែមទៀត ជាពិសេសតំបន់នៅជាប់ព្រំដែនផ្លូវគោក ដើម្បីសម្រួលដល់ការធ្វើពាណិជ្ជកម្ម និងការពង្រឹងកិច្ចសហប្រតិបត្តិការរវាងប្រទេសទាំងពីរ។

វេទិកាធុរកិច្ចឡាវ-កម្ពុជា ដែលភាគីឡាវ ដឹកនាំដោយ លោកស្រី ខែមម៉ានី ភូលសេនា (Khemmani Pholsena) រដ្ឋមន្ត្រីឧស្សាហកម្ម និងពាណិជ្ជកម្មប្រទេសឡាវ និងភាគីកម្ពុជា ដឹកនាំដោយ លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មកម្ពុជា (រូបថត៖ ក្រសួងពាណិជ្ជកម្ម)

សំណើរបស់រដ្ឋមន្ត្រីឧស្សាហកម្ម និងពាណិជ្ជកម្មប្រទេសឡាវ លោកស្រី ខែមម៉ានី ភូលសេនា (Khemmani Pholsena) ត្រូវបានធ្វើឡើងក្នុងវេទិកាធុរកិច្ចឡាវ-កម្ពុជា ជាមួយរដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្ដិ ដែលដឹកនាំគណៈប្រតិភូកម្ពុជា នៅរាជធានីវៀងចន្ទន៍ ប្រទេសឡាវ កាលពីថ្ងៃទី៥ ខែធ្នូ ឆ្នាំ២០១៨។

សូមជម្រាបថា វេទិកាធុរកិច្ចឡាវ-កម្ពុជា គឺជាផ្នែកមួយនៃកម្មវិធីដំណើរទស្សនកិច្ចផ្លូវរដ្ឋ រយៈពេលពីរថ្ងៃ របស់សម្ដេច ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា នៅលើទឹកដីនៃសាធារណរដ្ឋប្រជាធិបតេយ្យប្រជាមានិតឡាវ។ ទស្សនកិច្ចនេះ គឺដើម្បីពង្រឹង និងពង្រីកកិច្ចសហប្រតិបត្តិការទ្វេភាគី លើវិស័យសេដ្ឋកិច្ច ពាណិជ្ជកម្ម វិនិយោគ ទេសចរណ៍ អប់រំ សន្តិសុខតាមព្រំដែន និងវិស័យដទៃទៀត ដែលភាគីទាំងពីរធ្លាប់បានធ្វើកិច្ចសហប្រតិបត្តិការជាមួយគ្នា នាពេលកន្លងមកឲ្យកាន់តែប្រសើរឡើងថែមទៀត៕

អត្ថបទ៖ លាភ.