កីឡាករថៃ Yodsanklai ក្លាយជាគូឯកប្រចាំកម្មវិធី ONE Championship នៅម៉ាឡេស៊ី

2018-12-07 03:57:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កីឡាករប្រដាល់ថៃ Yodsanklai Fairtex បានក្លាយជាគូឯកក្នុងកម្មវិធី ONE: Destiny of Champions របស់ស្ថាប័ន ONE Championship នាល្ងាចថ្ងៃទី៧ ខែធ្នូនេះ នៅទីក្រុងកូឡាឡាំពួរ ប្រទេសម៉ាឡេស៊ី ដោយត្រូវប៉ះកីឡាករអូស្រ្ដាលី Luis Regis។

ការប្រកួតនេះ ជាការប្រកួតប្រដាល់សេរីបែបថៃ ក្នុង ONE Super Series ដែលជាផ្នែកមួយទៀតនៃ ONE Championship បន្ថែមលើការប្រកួតក្បាច់គុនចម្រុះ។

Yodsanklai និយាយជាមួយអ្នកកាសែត មុនការប្រកួតមកដល់

កីឡាករវ័យ ៣៣ឆ្នាំ បាននិយាយថា៖ "ខ្ញុំពិតជារំភើបណាស់ ដែល ONE បានផ្ដល់ឱកាសឲ្យខ្ញុំក្លាយជាគូឯកប្រចាំកម្មវិធី។ វាពិតជាកិត្តិយសណាស់សម្រាប់ខ្ញុំ។ របួសរបស់ខ្ញុំ បានជាសះស្បើយមួយរយៈហើយ តែខ្ញុំនៅមានអារម្មណ៍ថាមិនទាន់វិលមកដូចដើម ១០០% នៅឡើយទេ ព្រោះខ្ញុំមិនសូវបានប្រកួតជាប់ជាប្រចាំនោះទេ"។

ទោះជាបែបនេះក្ដី កីឡាករប្រដាល់ដែលមានរហស្សនាមថា ‎The Boxing Computer រូបនេះ ជឿជាក់ថានឹងអាចវាយ Luis ឲ្យសន្លប់នៅទឹកណាមួយបាន។

កាលពីខែឧសភាកន្លងទៅ Yod បានចូលប្រកួតលើកដំបូងនៅ ONE Championship ដោយទទួលជ័យជម្នះលើកីឡាករ Chris Ngimbi នៅសិង្ហបុរី ដោយពិន្ទុ។

សូមបញ្ជាក់ថា កីឡាករ កីឡាការិនីកម្ពុជា ២រូប ក៏ប្រកួតនៅក្នុងកម្មវិធី ONE: Destiny of Champions ផងដែរ គឺ ចាន់ រតនា ប៉ះកីឡាករឥណ្ឌូណេស៊ី Abro Fernandes និងកីឡាការិនី ឯម សុវណ្ណារី ប៉ះកីឡាការិនីអ៊ុយក្រែន IRYNA KYSELOVA៕