កាសែតខេមបូឌាដេលី ប្រកាសមិនវិលមកបើកកាសែតនៅស្រុកខ្មែរវិញទេ

2018-12-07 01:59:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ម្ចាស់កាសែត ឌឹ ខេមបូឌា ដេលី (The Cambodia Daily) ប្រកាសមិនវិលមកបើកកាសែតនៅស្រុកខ្មែរវិញទេ ដោយអ្នកស្រីលើកឡើងថា ព្រោះខ្លាចការធ្វើទុក្ខបុកម្នេញដដែលៗ និងអំពើពុករលួយ។

កាសែត ឌឹ ខេមបូឌា ដេលី

អ្នកស្រី ដេប្រា គ្រីស័រ ស្ទាល (Deborah Krisher Steele) ប្រាប់តាមសារអេឡិចត្រូនិក កាលពីថ្ងៃទី៦ ខែធ្នូនេះថា អ្នកស្រីសុខចិត្តបន្តដំណើរការកាសែតអ្នកស្រី នៅក្រៅប្រទេសកម្ពុជា ដោយបន្តផ្សាយព័ត៌មាន ដោយមិនយកប្រាក់កម្រៃ តាមប្រព័ន្ធអ៊ីនធឺណិត។

អ្នកស្រី ដេប្រា គ្រីស័រ ស្ទាល បញ្ជាក់ថា គោលជំហររបស់កាសែតអ្នកស្រីគឺនៅដដែល គឺនៅតែបន្តផ្ដល់ព័ត៌មានក្ដៅ ដោយគ្មានភ័យខ្លាច និងដោយឥតលម្អៀង។

ក្នុងសេចក្ដីថ្លែងការណ៍ចុះថ្ងៃទី៣ ខែធ្នូ ក្រសួងការបរទេសកម្ពុជា ប្រកាសថា វិទ្យុអាស៊ីសេរី និងវិទ្យុសំឡេងសហរដ្ឋអាមេរិក ដែលបានបិទការិយាល័យតំណាងរបស់ខ្លួននៅកម្ពុជាអស់រយៈពេលជាងមួយឆ្នាំមកហើយនេះ អាចមានសេរីភាពបើកការិយាល័យខ្លួន នៅកម្ពុជាឡើងវិញបាន។ បន្ថែមលើស្ថាប័នវិទ្យុទាំងពីរនេះ រាជរដ្ឋាភិបាលបានអះអាងថា នឹងអនុញ្ញាតឲ្យសារព័ត៌មានជាភាសាអង់គ្លេស និងខ្មែរ ឌឹ ខេមបូឌា ដេលី អាចចាប់ផ្ដើមប្រតិបត្តិការរបស់ខ្លួនឡើងវិញបានដែរ ប៉ុន្តែក្នុងលក្ខខណ្ឌ ដែលដោះស្រាយបំណុលពន្ធដារ រួចរាល់សិនប៉ុណ្ណោះ។

កាសែត ឌឹ ខេមបូឌា ដេលី ត្រូវបិទការិយាល័យរបស់ខ្លួន កាលពីថ្ងៃទី៤ ខែកញ្ញា ឆ្នាំ២០១៧ ដោយសារជំពាក់ពន្ធរដ្ឋរយៈពេល ១០ឆ្នាំ ដែលគិតជាទឹកប្រាក់ជាង ៦លាន ៣សែនដុល្លារ។ ក្នុងនោះជិត ៣លានដុល្លារ គឺជាថ្លៃការប្រាក់ ដែលអាជ្ញាធរពន្ធកម្ពុជា ថាកាសែតនេះជំពាក់រដ្ឋ ក្នុងរយៈពេល ១០ឆ្នាំ។

អ្នកស្រី ដេប្រា គ្រីស័រ ស្ទាល បន្តថា សព្វថ្ងៃនេះ កាសែតអ្នកស្រីផ្សាយតាមហ្វេសប៊ុក (Facebook) និងតាមគេហទំព័រ www.cambodiadaily.com ដែលអ្នកតាមដានព័ត៌មានអាចបើកមើលបាន៕

ប្រភព៖ Radio Free Asia ប្រែសម្រួល៖ លាភ.