អ្នកទោសវៀតណាម ស្នើសុំផ្ទេរ ពីពន្ធនាគារនៅថៃ មកជាប់ពន្ធនាគារនៅខ្មែរ វិញ

2018-12-07 07:06:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

បើតាមសេចក្តីរាយការណ៍ ពីស្ថានទូតខ្មែរប្រចាំប្រទេសថៃ អ្នកទោសជាជនជាតិវៀតណាមដែលកំពុងជាប់ពន្ធនាគារនៅប្រទេសថៃ បានស្នើសុំផ្ទេរ មកជាប់ពន្ធនាគារនៅប្រទេសកម្ពុជាវិញ ខណៈបច្ចុប្បន្នអ្នកទោសជនជាតិខ្មែរ ចំនួន ២៩១០នាក់ (ស្រ្តីចំនួន ២៦៩នាក់ បុរសចំនួន ២៦៤១នាក់) កំពុងជាប់ពន្ធនាគារនៅថៃ។

សេចក្ដីជូនដំណឹងរបស់ស្ថានទូតខ្មែរប្រចាំប្រទេសថៃ ចុះថ្ងៃទី៦ ខែធ្នូ ឆ្នាំ២០១៨បានឲ្យដឹងថា ស្ថានទូតខ្មែរប្រចាំប្រទេសថៃ បានចុះសួរសុខទុក្ខទណ្ឌិត តាមមន្ទីរឃុំឃាំងជារៀងរហូត។ ចំពោះបញ្ហាផ្ទេរទណ្ឌិត គឺត្រូវអនុវត្តតាមកិច្ចព្រមព្រៀង ស្តីពី ការផ្លាស់ប្តូរអ្នកទោស រវាងកម្ពុជា និងថៃ ដែលមានដូចជា៖

ទី១-បទល្មើស ដែលអាចផ្ទេរអ្នកទោស បានលុះត្រាបទល្មើសនោះ ត្រូវជាប់ពន្ធនាគារចាប់ពីមួយឆ្នាំទ្បើងទៅ។

ទី២- ទណ្ឌិតដែលអាចផ្ទេរបាន លុះត្រាតែទណ្ឌិតនោះ ត្រូវជាប់ទោស ២/៣ នៃទោសរួម និង

ទី៣- ទណ្ឌិតដែលអាចផ្ទេរបាន លុះត្រាតែសាម៉ីខ្លួនស្នើសុំជាលាយលក្ខណ៍អក្សរ ។

សេចក្ដីជូនដំណឹងឲ្យដឹងដូច្នេះថា៖ “កន្លងមកមានអ្នកទោសខ្លះ ជាជនជាតិវៀតណាម ហើយសុំផ្ទេរមកជាប់ពន្ធនាគារនៅកម្ពុជា ប៉ុន្តែករណីនេះ ស្ថានទូតមិនអាចដោះស្រាយបានទេ ដូច្នេះស្ថានទូតត្រូវទៅមើលអ្នកទោសនោះថា គាត់សញ្ជាតិអ្វីពិតប្រាកដ ព្រោះស្ថានទូតអាចដោះស្រាយបានលុះត្រាតែអ្នកទោសនោះ ជាជនជាតិខ្មែរ”។

ប្រភពឲ្យដឹងទៀតថា មានអ្នកទោសខ្លះសុំផ្ទេរ មកជាប់នៅពន្ធនាគារកម្ពុជា ដោយផ្ទាល់មាត់។ លុះដល់ស្ថានទូត ឲ្យធ្វើពាក្យស្នើសុំផ្ទាល់ខ្លួន ដើម្បីបញ្ជាក់ថា ខ្លួនស្ម័គ្រចិត្តមកបន្តជាប់ពន្ធនាគារនៅកម្ពុជាវិញ បែរជាគាត់មិនព្រម ធ្វើលិខិតស្នើសុំទាល់តែសោះ។ ស្ថានទូត មិនអាចបង្ខិតបង្ខំទណ្ឌិត ឲ្យផ្ទេរមកកម្ពុជាបានទេ បើសាម៉ីខ្លួនមិនស្ម័គ្រចិត្ត ផ្ទេរមកកម្ពុជា៕