រដ្ឋមន្ដ្រីពាណិជ្ជកម្ម ស្នើឲ្យវិស័យឯកជនកម្ពុជា-វៀតណាមវិនិយោគបន្ថែម
- 2018-12-07 08:06:11
- ចំនួនមតិ 0 | ចំនួនចែករំលែក 0
រដ្ឋមន្ដ្រីពាណិជ្ជកម្ម ស្នើឲ្យវិស័យឯកជនកម្ពុជា-វៀតណាមវិនិយោគបន្ថែម
ចន្លោះមិនឃើញ
រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បានអំពាវនាវឲ្យវិស័យឯកជនកម្ពុជា-វៀតណាម បង្កើនការវិនិយោគទៅវិញទៅមក ដើម្បីឈានទៅសម្រេចបាននូវទំហំពាណិជ្ជកម្មទ្វេភាគីចំនួន ៥ពាន់លានដុល្លារ ដែលបានកំណត់កាលពីឆ្នាំ២០១៥ និងកំណើនសេដ្ឋកិច្ចសម្រាប់ប្រជាជននៃប្រទេសទាំងពីរ។
លោករដ្ឋមន្ត្រីបានបញ្ជាក់ថា បច្ចុប្បន្នវៀតណាម គឺជាដៃគូវិនិយោគធំបំផុតទី៥ របស់កម្ពុជា។ ការវិនិយោគរបស់ក្រុមហ៊ុនវៀតណាម នៅប្រទេសកម្ពុជា មានប្រមាណ ២០៦គម្រោង ស្មើនឹងទឹកប្រាក់ ៣,០២ ពាន់លានដុល្លារ ខណៈក្រុមហ៊ុនរបស់កម្ពុជា វិនិយោគនៅប្រទេសវៀតណាម មានត្រឹមតែ ១៨គម្រោង ស្មើនឹងទឹកប្រាក់ ៥៨,១លានដុល្លារប៉ុណ្ណោះ។
នេះបើតាមការចុះផ្សាយរបស់សារព័ត៌មានវៀតណាម (Viet Nam News) ក្នុងឱកាសវេទិកាពាណិជ្ជកម្មកម្ពុជា-វៀតណាម កាលពីសប្ដាហ៍មុននៅរាជធានីភ្នំពេញ នៅក្នុងរយៈពេល ៧ខែ ឆ្នាំ២០១៨នេះ ទំហំពាណិជ្ជកម្ម កម្ពុជា និងវៀតណាម សម្រេចបានទឹកប្រាក់ ២,៧ ពាន់លានដុល្លារ គឺបានកើនឡើង ១៨,៧% ប្រៀបធៀបទៅនឹងរយៈពេលដូចគ្នា កាលពីឆ្នាំ២០១៧។ ទន្ទឹមគ្នានេះដែរ កាលពីឆ្នាំ២០១៧ ការដោះដូរពាណិជ្ជកម្មរវាងកម្ពុជា និងវៀតណាម មានទំហំជាទឹកប្រាក់ ៣,៨ ពាន់លានដុល្លារ គឺកើនឡើង ២៩% ប្រៀបធៀបនឹងឆ្នាំ២០១៦៕