ប្រធានសហព័ន្ធ ប្រកាសថា នឹងធ្វើទីលានបាល់ទាត់ស្តង់ដា នៅតាមសាលារៀន ឱ្យរួចនៅឆ្នាំក្រោយ

2018-12-09 08:30:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក សៅ សុខា ប្រធានសហព័ន្ធកីឡាបាល់ទាត់កម្ពុជា បានប្រកាសថា នឹងធ្វើទីលានបាល់ទាត់ស្តង់ដានៅតាមសាលារៀននានា ក្នុងបណ្តាខេត្ត-រាជធានី ឱ្យរួចក្នុងឆ្នាំ២០១៩។ ពិសេសគឺសហព័ន្ធនឹងឧបត្ថម្ភប្រាក់ដល់លោកគ្រូអ្នកគ្រូក្នុងម្នាក់ ២លានរៀលក្នុងមួយខែ។ ការប្រកាសបែបនេះ ធ្វើឡើងក្នុងកម្មវិធីសម្ពោធទីលានបាល់ទាត់នៅក្នុងវិទ្យាល័យ ជា ស៊ីម ត្បែងមានជ័យ និងបើកការប្រកួតបាល់ទាត់ជ្រើសរើសជើងឯកយុវជនក្រោមអាយុ១៥ឆ្នាំ យុវជនក្រោមអាយុ១៧ឆ្នាំ និងការប្រកួតបាលទាត់នារីឆ្នាំ២០១៨ កាលពីរសៀលថ្ងៃទី៨ ខែធ្នូ ឆ្នាំ២០១៨ នៅខេត្តព្រះវិហារ។

លោក សៅ សុខា បានលើកឡើងថា ការប្រកួតជម្រើសជើងឯកយុវជន អាយុក្រោម១៥ឆ្នាំ ក្រោម១៧ឆ្នាំ និងប្រកួតជម្រើសជើងឯកបាល់ទាត់នារី ឆ្នាំ២០១៨នេះ គឺជាផ្នែកមួយយ៉ាងសំខាន់នៅ ក្នុងគំរោងការអភិវឌ្ឍន៍ថ្នាលបាល់ទាត់យុវជនដែលសហព័ន្ធកីឡាបាល់ទាត់កម្ពុជាបានដាក់ចេញ នៅក្នុងមហាសន្និបាតប្រចាំឆ្នាំរបស់ខ្លួនកាលពីឆ្នាំ២០១៧។

លោក សៅ សុខា ទាត់បាល់នៅលើទីលានក្នុងវិទ្យាល័យ ជា ស៊ីម ត្បែងមានជ័យ កាលពីថ្ងៃទី៨ធ្នូ ២០១៨។ រូបថត៖ សហព័ន្ធកីឡាបាល់ទាត់កម្ពុជា

ប្រធានសហព័ន្ធរូបនេះ បន្តថា៖ «**នោះគឺការពង្រីកហេដ្ឋារចនាសម្ព័ន្ធបាល់ទាត់និងផែនការអភិវឌ្ឍន៍បាល់ទាត់ឆ្ពោះទៅកាន់ខេត្តទាំង២៥រាជធានី-ខេត្ត។ ហើយតាមរយៈការប្រកួតនេះគឺយើងបានជ្រើសរើសនូវកីឡាករឆ្នើម សម្រាប់រៀបចំជាក្រុមជម្រើសជាតិចេញ ទៅប្រកួតក្នុងក្របខណ្ឌបាល់ទាត់ ដែលរៀបចំដោយ សមាគមបាល់ទាត់អាស៊ីអាគ្នេយ៍ AFF ការប្រកួតបាល់ទាត់ទ្វីបអាស៊ី AFC ឬបាល់ទាត់អន្តរជាតិ ដែលរៀបចំដោយ FIFA**»។

ការប្រកួតនៅពេលនេះ គឺមានសារៈសំខាន់ក្នុងការដុសខាត់ជំនាញបច្ចេកទេសកីឡាករ កីឡាការិនី និងឱកាសសម្រាប់អភិវឌ្ឍន៍ធនធានមនុស្សផ្នែកបាល់ទាត់ ដូចជាគ្រូអាជ្ញាកណ្តាលមន្ត្រីបច្ចេកទេសរដ្ឋបាល។ល។ សហព័ន្ធកីឡាបាល់ទាត់កម្ពុជាមកទល់ពេលនេះ មានគ្រូ ១០០នាក់ទូទាំងប្រទេសដែលក្នុងមួយខេត្តមានគ្រូ៤នាក់ទទួលបណ្តុះបណ្តាលកីឡាករចំនួន២ក្រុម ដែលក្នុងក្រុមនីមួយៗ មានកីឡាករ២៥រូប។ នេះបើតាមការបញ្ជាក់ឱ្យដឹងបន្ថែមរបស់លោក សៅ សុខា៕

ប្រភព៖ រស្មីកម្ពុជា ប្រែសម្រួល៖ សំភី