Macron ប្រកាសវិធានការ ដើម្បីបញ្ចប់បាតុកម្មហិង្សាក្នុងប្រទេសបារាំង

2018-12-11 01:54:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Emmmanuel Macron ប្រធានាធិបតីបារាំង កាលពីថ្ងៃទី១០ ខែធ្នូ ឆ្នាំ២០១៨ បានប្រកាសវិធានការហិរញ្ញវត្ថុនានា ដើម្បីស្វែងរកការបញ្ចប់បាតុកកម្មហិង្សារបស់ក្រុម "អាវកាក់ពណ៌លឿង" ដែលបានផ្ទុះការតវ៉ាទូទាំងប្រទេស កាលពីចុងសប្ដាហ៍មុន។

លោក Emmmanuel Macron ប្រធានាធិបតីបារាំង ថ្លែងទៅកាន់ប្រជាជាតិរបស់លោក ពីវិមានប្រធានាធីបតីបារាំង/ រូបភាព៖ AFP

ក្នុងសុន្ទរកថា ១៥នាទី ពីវិមានប្រធានាធិបតីបារាំង លោកប្រធានាធិបតីបារាំងបានថ្លែងទៅកាន់ប្រជាជាតិរបស់លោកថា "ខ្ញុំទទួលយកការចូលរួមនៃទំនួលខុសត្រូវរបស់ខ្ញុំ សម្រាប់វិបត្តិនេះ"។

លោក Macron ថ្លែងថា "ខ្ញុំដឹងថា ខ្ញុំបានធ្វើអ្នកមួយចំនួនឈឺចាប់ជាមួយនឹងសេចក្តីថ្លែងការណ៍របស់ខ្ញុំ"។ លោកសង្កត់ធ្ងន់ថា ទោះយ៉ាងណា ការតវ៉ាដោយអ្នកដែលមានចំណូលទាបភាគច្រើន នៅក្នុងក្រុង និងតំបន់ជនបទតូចៗរបស់បារាំង គឺជាលទ្ធផលនៃបញ្ហាអស់រយៈពេលជាយូរមកហើយ។ លោកបញ្ជាក់ថា "នេះជាជំងឺ ៤០ឆ្នាំ ដែលបានលេចចេញជារូបរាងហើយ"។

វិធានការហិរញ្ញវត្ថុដែលលោក Macron បានប្រកាស៖

លោក Macron ប្រកាសដំឡើង ១០០អឺរ៉ូ (ប្រមាណ ១១៣ដុល្លារ) លើបៀវត្សអប្បបរមា សម្រាប់ឆ្នាំ២០១៩ ខាងមុខ។ បៀវត្សអប្បបរមា ឆ្នាំ២០១៨ គឺ ១៤៩៨អឺរ៉ូ ដោយក្រោយកាត់ពន្ធរួច គឺនៅត្រឹម ១១៨៥អឺរ៉ូ។
លោក Macron បញ្ជាក់ថា លោកគ្រោងដកវិញនូវការដំឡើងពន្ធលើអ្នកចូលនិវត្តន៍ ដែលត្រូវបានដាក់ចេញដោយរដ្ឋាភិបាលរបស់លោក។
លោក Macron អំពាវនាវឲ្យអ្នកជំនួញដែលមានលទ្ធភាព ផ្ដល់បុគ្គលិកនូវប្រាក់បន្ថែមចុងឆ្នាំ (ប្រាក់ខែទី១៣) ដែលនឹងត្រូវបានលើកលែងពន្ធ។
លោក Macron ប្រកាសថា លោកនឹងដកចេញនូវការយកពន្ធលើប្រាក់ដែលបានមកពីការធ្វើការងារលើសម៉ោង ដែលវិធានការនេះ ត្រូវបានដាក់ចេញដោយអតីតប្រធានាធិបតីបារាំង Nicolas Sarkozy។

សូមបញ្ជាក់ថា កាលពីចុងសប្ដាហ៍មុន នៅទូទាំងប្រទេសបារាំងមានអ្នកចេញប្រមូលផ្ដុំតវ៉ាប្រមាណ ១៣៦០០០នាក់ ក្នុងនោះ ប៉ូលិសបារាំងបានចាប់ខ្លួន ៤៥០០នាក់៕

ប្រភព៖ Channelnewsasia ប្រែសម្រួល៖ វាសនា