ចាន់ រតនា ប្រាប់ពីយុទ្ធសាស្រ្ដយកឈ្នះកីឡាករឥណ្ឌូណេស៊ី នៅ ONE Championship

2018-12-11 02:56:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កីឡាករគុនខ្មែរ ចាន់ រតនា បានយកឈ្នះកីឡាករឥណ្ឌូណេស៊ី Abro Fernandes ក្នុងទឹកទី២ នៅកម្មវិធី ONE: Destiny of Champions របស់ស្ថាប័ន ONE Championship នៅទីក្រុងកូឡាឡាំពួរ ប្រទេសម៉ាឡេស៊ី កាលពីថ្ងៃទី៧ ខែធ្នូកន្លងទៅ។

ចាន់ រតនា កំពុងវាយកីឡាករឥណ្ឌូណេស៊ី Abro Fernandes (រូបភាព៖ ONE Championship)

តើរតនា មានយុទ្ធសាស្រ្ដពិសេសអ្វី ដើម្បីបំបាក់កីឡាករម្ចាស់ខ្សែក្រវាត់ឥណ្ឌូណេស៊ី ដែលមិនធ្លាប់ចាញ់រូបនោះ?

ថ្លែងប្រាប់ [ខ្លីៗ] នៅក្រោយការប្រកួត ចាន់ រតនា បានឲ្យដឹងថា៖ ""ក្នុងទឹក១ ខ្ញុំបានស្ទង់ពីកម្លាំងរបស់ដៃគូ គេពូកែចាប់ មានទម្ងន់ដៃ និងកម្លាំងខ្លាំង ហើយគាត់ផ្លាស់ទីលឿន តែខ្ញុំបានហ្វឹកហាត់ច្រើនជាមួយគ្រូ ក្នុងការទប់ក្បាច់ចាប់ក្លេនេះ។ ខ្ញុំដឹងថាគាត់ពូកែវាយកាត់ ដូច្នេះខ្ញុំត្រូវវាយកាត់មុន"។

រតនា បន្ថែមថា ក្រោយដឹងថាគូប្រកួតអន់ជើងក្រោម និងធ្លាក់កម្លាំង ក្នុងទឹកទី២ ទើបខ្លួនព្យាយាមទាត់ជើងក្រោម និងដេញវាយផ្ដាច់ក្នុងទឹកនោះតែម្ដង។

មួយដៃរបស់រតនា ចំមុខកីឡាករឥណ្ឌូណេស៊ី (រូបភាព៖ ONE Championship)

នៅក្នុងការប្រកួតនោះ Abro បានព្យាយាមចាប់បោក និងចាប់ក្លេរតនា ជាច្រើនដង ប៉ុន្តែរតនា បានដោះរួច និងបានវាយសងវិញផងដែរ។ ឈានចូលទឹកទី២ រតនា បានវាយចូល ២ដៃ ដែលធ្វើឲ្យកីឡាករឥណ្ឌូណេស៊ីរូបនោះដួល។ ក្រោយមករតនា ក៏ដេញវាយកីឡាកររូបនោះ និងបានឡើងមួយជង្គង់ មុនបន្ថែមប៉ុន្មានដៃទៀត រហូតអាជ្ញាកណ្ដាលបញ្ឈប់ការប្រកួតក្នុងទឹកទី២ តែម្ដង។

សូមបញ្ជាក់ថា នេះជាជ័យជម្នះលើកទី៥ ក្នុងអាជីពជាកីឡាករក្បាច់គុនចម្រុះ MMA របស់ចាន់ រតនា ហើយក៏ជាជ័យជម្នះលើកទី៤ ក្នុងទ្រុង ONE Championship ផងដែរ (ប្រកួត ៨ដង)។ ចំណែក Fernandes វិញ នេះជាបរាជ័យលើកដំបូងក្នុងអាជីព ក្រោយឈ្នះ ៧ដងជាប់គ្នា។ ក្រោយជ័យជម្នះនេះ រតនា អាចនឹងវិលចូលប្រកួតគុនខ្មែរសិន មុនរង់ចាំដំណឹងពី ONE Championship នាឆ្នាំក្រោយ៕

សូមទស្សនាវីដេអូខ្លី ពីការប្រកួតនេះ ដូចខាងក្រោម៖

ចុចអាន៖ ចាន់ រតនា បញ្ចប់កំណត់ត្រាមិនចាញ់របស់កីឡាករឥណ្ឌូណេស៊ី

អត្ថបទ៖ សុខ សុវត្ថិ