កម្មវិធីថែទាំផ្លូវលើស្មាតហ្វូន នឹងត្រូវដាក់ឲ្យដំណើរការនៅថ្ងៃទី១៣ធ្នូ
- 2018-12-11 08:35:05
- ចំនួនមតិ 0 | ចំនួនចែករំលែក 0
កម្មវិធីថែទាំផ្លូវលើស្មាតហ្វូន នឹងត្រូវដាក់ឲ្យដំណើរការនៅថ្ងៃទី១៣ធ្នូ
ចន្លោះមិនឃើញ
ក្រសួងសាធារណការ និងដឹកជញ្ជូន នឹងដាក់ឲ្យប្រើប្រាស់ជាផ្លូវការ កម្មវិធីថែទាំផ្លូវ (ROAD CARE app) នាថ្ងៃទី១៣ ខែធ្នូ ឆ្នាំ២០១៨ ខាងមុខ ដោយអាចទាញយកមកប្រើប្រាស់តាម Play Store និង App Store ។ នេះបើតាមការបញ្ជាក់នៅលើទំព័រហ្វេសប៊ុកផ្លូវការរបស់ក្រសួង នាថ្ងៃទី១១ធ្នូនេះ។
តាមប្រសាសន៍លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ក្នុងពិធីដាក់ឲ្យដំណើរការ នូវមជ្ឈមណ្ឌលបណ្ដុះបណ្ដាល បើកបររថយន្តធុនធ្ងន់ កាលពីថ្ងៃទី៣១តុលា ឆ្នាំ២០១៨ កម្មវិធីថែទាំផ្លូវ (ROAD CARE app) ត្រូវបានបង្កើតឡើងក្នុងគោលបំណងជំរុញឲ្យប្រជាពលរដ្ឋចូលរួម ក្នុងការងារជួលជុលថែទាំផ្លូវ ដោយប្រជាពលរដ្ឋថតផ្លូវសំបុកមាន់ រួចបញ្ជូនមកកាន់ក្រសួងដើម្បីឲ្យ ខាងក្រសួងចាត់វិធានការ ជួសជុលជាបន្ទាន់។
លោករដ្ឋមន្ត្រីមានប្រសាសន៍ទៀតថា App នេះ មានសារសំខាន់ណាស់ នៅពេលពលរដ្ឋថតបញ្ជូនមកភ្លាម កម្មវិធីនៅក្នុង App នឹងដឹងទីតាំងពិតប្រាកដ តើមានសំបុកមាន់នៅកន្លែងណា? ម៉ោងណាគាត់ថតផ្លូវសំបុកមាន់មកក្រសួង? ដូច្នេះក្រសួងបានព័ត៌មានទាំងនេះ រួចបញ្ជូនទៅតាមមន្ទីរសាធារណការខេត្ត ក្រុង ដើម្បីឲ្យពួកគាត់ចុះទៅពិនិត្យនៅកន្លែងផ្ទាល់ និងជួសជុលផ្លូវសំបុកមាន់ភ្លាមៗ។
លោក ស៊ុន ចាន់ថុល ថ្លែងបន្ថែមថា នៅក្នុង App នឹងមានរូបថតប្រធានមន្ទីរសាធារណការ គ្រប់ខេត្ត-ក្រុង ដើម្បីឲ្យពលរដ្ឋស្គាល់មុខ។ ដូច្នេះខេត្តណាមានសំបុកមាន់ប៉ុន្មាន ពលរដ្ឋដឹងឭទាំងអស់គ្នាតាមរយៈ App នេះ៕