អាជ្ញាធរខេត្តកំពង់ស្ពឺគ្រោងរៀបចំ "ទឹកធ្លាក់ជ្រាវ" ឱ្យក្លាយជារមណីយដ្ឋានអេកូទេសចរណ៍ថ្មីមួយ

2018-12-12 04:40:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មន្ទីរទេសចរណ៍ខេត្តកំពង់ស្ពឺ រួមនឹងអាជ្ញាធរស្រុកថ្ពង រៀបចំបង្កើតតំបន់រមណីយដ្ឋានអេកូទេសចរណ៍ទឹកធ្លាក់៧ជាន់ ឬទឹកធ្លាក់ជ្រាវ ក្នុងពេលខាងមុខនេះ ដើម្បីដាក់បង្ហាញជូនភ្ញៀវទេសចរជាតិ និងអន្តរជាតិ។ នេះបើតាមការចុះផ្សាយរបស់ AKP នៅថ្ងៃទី១២ ខែធ្នូ ឆ្នាំ២០១៨។

លោក សុខ ភា អភិបាលរងខេត្តកំពង់ស្ពឺ បានប្រាប់ឱ្យដឹងថា ការរៀបចំ "ទឹកធ្លាក់ជ្រាវ" ជារមណីយដ្ឋានអេកូទេសចរណ៍ គឺដើម្បីជួយបង្វែរអ្នកស្រុកនៅតំបន់នេះ ឱ្យងាកមកលក់ដូរចំណីអាហារ វត្ថុអនុស្សារវីយ៍ជូនភ្ញៀវទេសចរវិញ ចៀសវាងចូលព្រៃកាប់ឈើ បរបាញ់សត្វព្រៃ។

លោកបន្តថា នាពេលអនាគតនៅតំបន់នេះ អាជ្ញាធរពាក់ព័ន្ធនឹងរៀបចំជាកន្លែងផលិតផលទាក់ទាញភ្ញៀវទេសចរមួយថ្មី ឱ្យក្លាយទៅជារមណីយដ្ឋានបែបវប្បធម៌ធម្មជាតិ និងប្រវត្តិសាស្ត្រ។

លោក ជាម ឈួន សមាជិកសមាគមនៅភូមិតាំងសំរោង ឃុំអមលាំង ស្រុកថ្ពង បានគាំទ្រចំពោះការដាក់តំបន់ទឹកធ្លាក់ជ្រាវ ជាតំបន់អេកូទេសចរណ៍ ព្រោះប្រជាពលរដ្ឋក៏ចង់ឱ្យមានការអភិវឌ្ឍដែរ ដើម្បីធ្វើឱ្យភូមិ ឃុំ មានតំបន់អេកូទេសចរណ៍ មានភ្ញៀវទេសចរទៅលេងច្រើន។ ហើយម៉្យាងទៀត នឹងអាចធ្វើឱ្យក្មេងៗជំនាន់ក្រោយបានស្គាល់ប្រភេទដើមឈើផ្សេងក្នុងតំបន់ដីព្រៃដែលត្រូវបានអភិរក្សដូចជាដើមឈើទាល ស្រឡៅ នាងនួន ដើមបេង…ជាដើម។

សូមជម្រាបថា ទឹកធ្លាក់ជ្រាវ ស្ថិតនៅក្នុងភូមិតាំងសំរោង ឃុំអមលាំង ស្រុកថ្ពង ខេត្តកំពង់ស្ពឺ មានចម្ងាយប្រមាណ ៦០គីឡូម៉ែត្រ ពីក្រុងច្បារមន។ ទឹកធ្លាក់នេះ មានជម្រាលច្រើនដំណាក់ ដែលអំណោយផលដល់ការងូតទឹកលេងកម្សាន្តពីសំណាក់ភ្ញៀវទេសចរ៕

អត្ថបទទាក់ទង៖ រមណីយដ្ឋានទឹកធ្លាក់៧ជាន់ជ្រាវ កំពុងស្រូបទាញទេសចរកាន់តែច្រើន

ប្រភព៖ AKP ប្រែសម្រួល៖ សំភី