ចិន ផ្តល់រថយន្តគ្លីនិកចល័ត ២០គ្រឿងឱ្យកម្ពុជា សម្រាប់ប្រើនៅរាជធានី-ខេត្ត ចំនួន១៥

2018-12-13 01:42:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងសុខាភិបាលកម្ពុជា បានទទួលរថយន្តគ្លីនិកចល័តចំនួន២០គ្រឿង លើកទីពីរ ដែលជាជំនួយឥតសំណងរបស់ប្រទេសចិន។ ពិធីប្រគល់-ទទួលរថយន្តនេះ ធ្វើឡើងក្រោមអធិបតីភាពលោក ម៉ម ប៊ុនហេង រដ្ឋមន្រ្តីក្រសួងសុខាភិបាល និងលោក ដេង បូហ្គីង អនុប្រធានទីប្រធានទីភ្នាក់ងារសហប្រតិបត្តិការអន្តរជាតិចិនសម្រាប់ការអភិវឌ្ឍ កាលពីថ្ងៃទី១២ ខែធ្នូ ឆ្នាំ២០១៨។

លោក ម៉ម ប៊ុនហេង ក្នុងពេលទទួលរថយន្តគ្លីនិកពីភាគីចិន កាលពីថ្ងៃទី១២ ធ្នូ ២០១៨។ រូបថត៖ ក្រសួងសុខាភិបាល

ក្រសួងសុខាភិបាល ឱ្យដឹងថា រថយន្តគ្លីនិកចល័តទាំង២០គ្រឿងនេះ នឹងត្រូវប្រគល់ឱ្យមន្ទីរសុខាភិបាលរាជធានីភ្នំពេញ ខេត្តកំពង់ធំ ខេត្តកំពត ខេត្តកោះកុង ខេត្តក្រចេះ ខេត្តមណ្ឌលគីរី ខេត្តព្រះវិហារ ខេត្តព្រៃវែង ខេត្តពោធិ៍សាត់ ខេត្តរតនគីរី ខេត្តស្ទឹងត្រែង ខេត្តឧត្តរមានជ័យ ខេត្តកែប ខេត្តប៉ៃលិន និងខេត្តត្បូងឃ្មុំ។

លោករដ្ឋមន្រ្តីក្រសួងសុខាភិបាល បានលើកឡើងថា នេះជាសមិទ្ធផលថ្មីមួយទៀត បន្ទាប់ពីគម្រោងមួយចំនួន ដែលបាននឹងកំពុងអនុវត្ត រួមមាន រថយន្តគិលានសង្គ្រោះចំនួន ២០០គ្រឿង ម៉ាស៊ីនអេកូសាស្រ្តចំនួន២០០គ្រឿង ការសាងសង់អគារមន្ទីរពេទ្យមិត្តភាពកម្ពុជា-ចិន ព្រះកុសុមៈ មន្ទីរពេទ្យបង្អែកខេត្តត្បូងឃ្មុំ និងរថយន្តគ្លីនិកចល័ត ដែលសរុបទាំងពីរលើកចំនួន ៤០គ្រឿង។

លោក ម៉ម ប៊ុនហេង បានបន្ថែមថា តាមរយៈកិច្ចសហប្រតិបត្តិការក្នុងភាពជាដៃគូយុទ្ធសាស្រ្តគ្រប់ជ្រុងជ្រោយរវាងប្រទេសទាំង២ កម្ពុជានឹងទទួលបានជំនួយថ្មីៗបន្ថែមទៀត ជាពិសេសគម្រោងនានាមួយចំនួន ដូចជា គម្រោងពង្រឹងសមត្ថភាពមជ្ឈមណ្ឌលប្រយុទ្ធនឹងជំងឺឆ្លង និងគម្រោងពង្រីកមន្ទីរពេទ្យព្រះអង្គឌួង ដែលអាចនឹងទទួលបានការអនុម័ត នាពេលឆាប់ៗខាងមុខ៕

អត្ថបទ៖ សំភី