រដ្ឋសភាអនុម័តសេចក្តីស្នើច្បាប់ បើកផ្លូវឲ្យអតីតមន្ត្រី CNRP មានសិទ្ធិធ្វើនយោបាយឡើងវិញ

2018-12-13 02:00:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋសភាបានអនុម័ត សេចក្តីស្នើច្បាប់ស្តីពីវិសោធនកម្មមាត្រា ៤៥ថ្មី (ស្ទួន) នៃច្បាប់ស្តីពីគណបក្សនយោបាយ តាមសំណើរបស់តំណាងរាស្ត្រហត្ថលេខីចំនួន៨៧រូប របស់គណបក្សប្រជាជនកម្ពុជា ដើម្បីបើកផ្លូវឲ្យអតីតមន្ត្រីជាន់ខ្ពស់នៃអតីតគណបក្សសង្គ្រោះជាតិ មានសិទ្ធិធ្វើនយោបាយឡើងវិញ។ ការសម្រេចអនុម័តនេះ ធ្វើឡើងនាព្រឹកថ្ងៃទី១៣ ខែធ្នូ ឆ្នាំ២០១៨នេះដោយសំឡេងចំនួន ១១៥ លើ ១១៥សំឡេង។

កិច្ចប្រជុំរដ្ឋសភា នាព្រឹកថ្ងៃទី១៣ ខែធ្នូ ឆ្នាំ២០១៨

សូមរំលឹកថា កាលពីថ្ងៃទី៣ ខែធ្នូ ឆ្នាំ២០១៨ តំណាងរាស្ត្រហត្ថលេខីចំនួន ៨៧រូប របស់គណបក្សប្រជាជនកម្ពុជា បានផ្តួចផ្តើមធ្វើសេចក្តីស្នើច្បាប់ស្តីពីវិសោធនកម្មមាត្រា ៤៥ថ្មី (ស្ទួន) នៃច្បាប់ស្តីពីគណបក្សនយោបាយ។ សេចក្តីស្នើច្បាប់នេះ ជាការបន្ថែមនូវវាក្យខណ្ឌមួយថ្មីក្នុងមាត្រា៤៥ថ្មី (ស្ទួនមួយ) គឺ៖ «**បុគ្គលដែលត្រូវបានតុលាការសម្រេចហាមឃាត់ការធ្វើសកម្មភាពនយោបាយ មិនអាចបង្កើតគណបក្សនយោបាយ ឬចូលរួមក្នុងគណបក្សនយោបាយណាមួយ ឬឈរឈ្មោះឲ្យគេបោះឆ្នោត ឬធ្វើសកម្មភាពណាមួយគាំទ្រ ឬប្រឆាំងគណបក្សណាមួយបានឡើយ។ បុគ្គលដែលបានតុលាការសម្រេចហាមឃាត់ធ្វើសកម្មភាពនយោបាយនេះ នឹងអាចទទួលបាននូវសិទ្ធិនយោបាយពេញលេញដោយពេញច្បាប់ បន្ទាប់ពីផុតរយៈពេលនៃការហាមឃាត់ដែលកំណត់ដោយសាលដីការបស់តុលាការកំពូល ឬក្នុងករណីដែលបុគ្គលនោះត្រូវបានផ្តល់នីតិសម្បទាឡើងវិញដោយព្រះមហាក្សត្រ តាមសំណើរបស់នាយករដ្ឋមន្ត្រី តាមសេចក្តីស្នើសុំរបស់រដ្ឋមន្ត្រីក្រសួងមហាផ្ទៃ**»។

លោក ជាម យៀប ប្រធានគណៈកម្មការទី២ នៃរដ្ឋសភា បានថ្លែងថា ច្បាប់ស្តីពីគណបក្សនយោបាយត្រូវបានរដ្ឋសភាពិភាក្សា និងអនុម័តដំបូង នៅថ្ងៃទី១៨ ខែវិច្ឆិកា ឆ្នាំ១៩៩៧ ដោយច្បាប់នេះដំបូងមានតែ៤៥មាត្រា និងបានធ្វើវិសោធនកម្មចំនួនពីរដង គឺវិសោធនកម្មលើកទី១ នៅថ្ងៃទី០៧ ខែមីនា ឆ្នាំ២០១៧ និងវិសោធនកម្មលើកទី២ នៅថ្ងៃទី២៧ ខែកក្កដា ឆ្នាំ២០១៧។

លោកថា ចំណែកការធ្វើវិសោធនកម្មច្បាប់នេះ ជាលើកទី៣ គឺដើម្បីធានាភាពច្បាស់លាស់របស់បុគ្គល ដែលត្រូវបានតុលាការកំពូលសម្រេចហាមឃាត់ការធ្វើសកម្មភាពនយោបាយ និងប្រសិទ្ធភាពនៃការអនុវត្តច្បាប់ដែលនៅជាធរមាន ដើម្បីលើកកម្ពស់ស្មារតីបង្រួបបង្រួមជាតិ និងពង្រឹងលទ្ធិប្រជាធិបតេយ្យសេរីពហុបក្សនៅកម្ពុជា។

លោក ជាម យៀប បញ្ជាក់ថា មានមជ្ឈដ្ឋានខ្លះថា ការធ្វើវិសោធនកម្មមាត្រា ៤៥ថ្មី (ស្ទួន) នៃច្បាប់ស្តីពីគណបក្សនយោបាយនោះ ដោយសារមានសំពាធពីបរទេស គឺមិនត្រឹមត្រូវទេ តែជាស្មារតីបង្រួបបង្រួមជាតិ។ ការធ្វើវិសោធនកម្មនេះ ដើម្បីតួនាទីនិងការទទួលខុសត្រូវរបស់គណបក្សនយោបាយនៅកម្ពុជា៕

អត្ថបទ៖ សោភា