រដ្ឋមន្ត្រីអប់រំ៖ បញ្ហាចម្បង២ ធ្វើឲ្យសិស្សកម្ពុជា រៀនខ្សោយ

2018-12-13 02:02:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍ថា ការបាត់ម៉ោងសិក្សា និងគុណភាពបង្រៀន ជាបញ្ហាចម្បងដែលធ្វើឲ្យសិស្សនៅកម្ពុជា រៀនខ្សោយ។ នេះបើយោងតាមមន្ទីរព័ត៌មានខេត្តសៀមរាប ចុះផ្សាយថ្ងៃទី១២ធ្នូ។

ប្រសាសន៍របស់លោករដ្ឋមន្ត្រី ត្រូវបានធ្វើឡើងក្នុងសិក្ខាសាលាផ្សព្វផ្សាយ ស្តីពីលទ្ធផលនៃកម្មវិធីអន្តរជាតិវាយតម្លៃការសិក្សារបស់សិស្សសម្រាប់ប្រទេសកំពុងអភិវឌ្ឍ ហៅកាត់ PISA-D នៅសណ្ឋាគារខេមរាអង្គរ ក្នុងក្រុងសៀមរាប កាលពីថ្ងៃទី១២ ខែធ្នូ ឆ្នាំ២០១៨។

លោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា

លោករដ្ឋមន្ត្រី ហង់ ជួន ណារ៉ុន លើកឡើងថា កម្ពុជាត្រូវការវិធានការបន្ទាន់ដើម្បីពង្រឹងគុណភាពអប់រំ ដូចជា សិស្សរៀនត្រួតថ្នាក់ សិស្សចូលរៀនយឺត រៀនក្រោមកម្រិតថ្នាក់ដែលខ្លួនត្រូវរៀនបើធៀបនឹងអាយុ ការបាត់ម៉ោងសិក្សាដោយសារគ្រូនិងសិស្សមកយឺត។ ខណៈដែលការមកយឺតរបស់គ្រូ បានឆ្លុះបញ្ចាំងពីការគ្រប់គ្រងតាមសាលារៀននៅកម្ពុជា ដែលជាកត្តាឲ្យសិស្សមករៀនយឺត និងកត្តាប៉ះពាល់ដល់គុណភាពបង្រៀន និងការសិក្សារបស់សិស្ស។

លោកបន្តថា ចំនួនម៉ោងសិក្សានៅកម្ពុជា ពីបឋមដល់អនុវិទ្យាល័យ ប្រហាក់ប្រហែលនឹងបណ្តាប្រទេសទទួលពិន្ទុខ្ពស់លើការវាយតម្លៃ PISA ដូចជាកូរ៉េខាងត្បូង ចិនម៉ាកាវ ជប៉ុន និងសិង្ហបុរី។

លោករដ្ឋមន្ត្រីមានប្រសាសន៍ទៀតថា លទ្ធផល PISA-D បានបង្ហាញពីសិស្សអាយុ១៥ឆ្នាំនៅកម្ពុជា មានសមត្ថភាពខ្ពស់ជាងសិស្សអាយុ១៥ឆ្នាំ នៅប្រទេសសេណេហ្គាល់ និងសំប៊ី លើគ្រប់មុខវិជ្ជា និងមានសមត្ថភាពលើមុខវិជ្ជាគណិតវិទ្យា ប្រហាក់ប្រហែលនឹងសិស្សក្នុងបណ្តាប្រទេសចូលរួមក្នុងកម្មវិធីអន្តរជាតិវាយតម្លៃការសិក្សារបស់សិស្សសម្រាប់ប្រទេសកំពុងអភិវឌ្ឍ។

ប៉ុន្តែលោកថា ចំពោះអំណាន និងវិទ្យាសាស្ត្រវិញ សិស្សកម្ពុជា ជាមធ្យមមានសមត្ថភាពទាបជាងសិស្សនៅបណ្តាប្រទេសជាសមាជិក PISA-D និងប្រទេសសមាជិកអាស៊ាន មានវៀតណាម ថៃ ឥណ្ឌូណេស៊ី និងសឹង្ហបុរី ហើយសិស្សកម្ពុជា។ លោកបន្ថែមថា សិស្សកម្ពុជា មានវិន័យល្អក្នុងថ្នាក់រៀន ស្តាប់គ្រូ មិនឡូឡា ប្រសើរជាងសិស្សនៃប្រទេសជាសមាជិក PISA-D និង OECD ជាពិសេសពួកគេភាគច្រើនបង្ហាញពីទស្សនៈវិជ្ជមានចំពោះគ្រូបង្រៀន។

លោក ហង់ ជួន ណារ៉ុន មានប្រសាសន៍ថា កម្ពុជាបានចូលរួមក្នុងកម្មវិធីអន្តរជាតិវាយតម្លៃការសិក្សារបស់សិស្សសម្រាប់ប្រទេសកំពុងអភិវឌ្ឍ ហៅកាត់ថា PISA-Dក្នុងឆ្នាំ២០១៦ ដែលជាគម្រោងតែមួយគត់ផ្ដួចផ្ដើមបង្កើតឡើង ដោយអង្គការសហប្រតិបត្តិការសេដ្ឋកិច្ច និងអភិវឌ្ឍ ហៅកាត់ថា OECD និងដៃគូអភិវឌ្ឍន៍មួយចំនួនទៀត។ គម្រោងនេះ មានបំណងធ្វើតេស្តវាយតម្លៃការសិក្សារបស់សិស្សសម្រាប់ប្រទេសចំណូលទាប និងមធ្យម ដែលរួមចំណែកក្នុងការពិនិត្យតាមដានគោលដៅអប់រំជាសកល ទាក់ទងទៅនឹងគោលដៅអភិវឌ្ឍន៍ប្រកបដោយចិរភាព៕

អត្ថបទ៖ លាភ.